“III ixtisas qrupunda bəzi ixtisaslar üzrə imtahan fənləri dəyişdirilir. Yəni “Beynəlxalq münasibətlər” və “Regionşünaslıq (regionlar üzrə)” ixtisasları II ixtisas qrupundan çıxarılaraq III ixtisas qrupuna daxil edilib. Bu da abituriyentlər üçün əlavə imkan deməkdir. Universitetlərin tələbləri də nəzərə alınaraq, elə şəxslər oxumalıdır ki, coğrafiyadan orta məktəb səviyyəsində biliklərə malik olsunlar.
Müzakirələr aparılır, 2022-2023-cü ildə I qrupda informatika üzrə ixtisasını seçən abituriyentlər həmin qrupda kimyadan yox, informatika fənnindən imtahan versinlər. Gələn həftə bu barədə elan olunacaq”.
Bunu Dövlət İmtahan Mərkəzinin Direktorlar Şurasının sədri Məleykə Abbaszadə media nümayəndələrinə açıqlamasında deyib.
Qeyd edildiyi kimi, III ixtisas qrupunda bəzi ixtisaslar üzrə imtahan fənləri dəyişdirilir. Belə ki, III ixtisas qrupuna daxil olan ixtisaslar dil-tarix (DT) və tarix-coğrafiya (TC) altqrupuna daxil edilən ixtisaslar olmaqla 2 altqrupa bölünür. TC altqrupuna daxil edilən “Beynəlxalq münasibətlər” və “Regionşünaslıq” ixtisaslarının müsabiqəsində iştirak etmək istəyən abituriyentlərin imtahanın II mərhələsində Azərbaycan (rus) dili və tarix fənləri ilə yanaşı coğrafiya fənnindən imtahan verilməsi nəzərdə tutulur. DT altqrupuna daxil olan digər ixtisasların müsabiqəsində iştirak etmək istəyən abituriyentlərin isə ədəbiyyat fənnindən imtahan verməsi nəzərdə tutulur. Hər iki altqrupa daxil olan ixtisasların müsabiqəsində iştirak etmək istəyən abituriyentlər isə II mərhələdə Azərbaycan (rus) dili, tarix və ədəbiyyat fənləri üzrə imtahan verdikdən sonra əlavə olaraq coğrafiya fənnindən fərq imtahanı verməlidirlər.
Qeyd edək ki, ali məktəbə qəbul imtahanına bir neçə ay qalmış belə bir dəyişikliyin elan olunması həm abituriyentlərin, həm də müəllimlərin narazılığına səbəb olub. Məlumdur ki, hər il abituriyentlər universitet hazırlıqlarına sentyabr ayının əvvəlindən başlayır. Bu qərar həmin dövrdə verilsə idi, daha məqsədəuyğun olardı. Coğrafiya fənnindən imtahana salınan suallar abituriyentlər üçün çətinlik yaradacaq. Maraqlıdır, bu vəziyyətlə bağlı imtahanda iştirak edəcək şəxslərə hər hansı bir güzəşt olacaqmı?
“Qərar gecikib, çünki artıq oktyabrın sonudur, qəbul imtahanlarına 7-8 ay qalıb və bu səbəbdən də abituriyentlər stress yaşayacaqlar”
Təhsil eksperti Kamran Əsədov bildirdi ki, dəyişikliyi yüksək qiymətləndirmir: “Yeni qərar abituriyentləri əlavə yükə salacaq. Abituriyentlərdən çox, repetitorlara müsbət təsir göstərəcək. Nəzərə alsaq ki, orta məktəblərdə şagirdlər coğrafiya fənnini oxuyur və bölgə, region barədə məlumatı heç imtahan vermədən də öyrənə bilərlər. Bu, digər qruplarla müqayisədə abituriyentlərin daha çox fəndən imtahan verməsinə gətirib çıxarır. Hesab edirəm ki, belə olan halda abituriyentlərin yükü daha çox olacaq. Daha bir mənfi tərəf isə ondan ibarətdir ki, bu qərar gecikib, çünki artıq oktyabrın sonudur. Qəbul imtahanlarına 7-8 ay qalıb və bu səbəbdən də abituriyentlər stress yaşayacaqlar”.
K.Əsədov Dövlət İmtahan Mərkəzinin Direktorlar Şurasının sədri Məleykə Abbaszadənin 2022-2023-cü ildə I qrupda informatika ixtisasını seçən abituriyentlərin həmin qrupda kimyadan yox, informatika fənnindən imtahan verməsi müzakirələri ilə bağlı sözlərinə də münasibət bildirdi.
Ekspert hesab edir ki, I ixtisas qrupunda da III ixtisas qrupunda olduğu kimi alt qrup yaradılmalıdır: “Hazırda I ixtisas qrupunun əsas perspektivli fənləri kompüter mühəndisliyi, kompüter elmləri, informasiya texnologiyaları, informasiya təhlükəsizliyi, proseslərin avtomatlaşdırılması kimi ixtisaslardır ki, bunlar özündə daha çox informatika fənnini əks etdirir. Etiraf edək ki, ali təhsil müəssisələrinin bu ixtisaslarına birinci ixtisas qrupda ən yüksək ballı abituriyentlər qəbul olurlar. Amma onlar ali təhsil müəssisəsinə qəbul olanda ümumilikdə bu ixtisas haqqında geniş biliklərə malik olmurlar, anlayışları olmur. Hesab edirəm ki, I ixtisas qrupunda da alt qrup yaradılmalıdır. Amma I ixtisas qrupundan kimya fənni çıxarıla bilməz. Çünki kimya mühəndisliyi, kimya müəllimliyi 4-cü ixtisas qruplarında olsa, I qrupda da buna yaxın ixtisaslar var. Bunu nəzərə alsaq, hesab edirəm ki, tam olaraq kimya fənninin birinci qrupdan çıxrılması yox, alt qrup halında təşkil edilməsi daha yaxşı olar. Burada müəyyən ixtisaslarda mütləq şəkildə kimya fənninin öyrədilməsi zəruridir. Ümumilikdə ali təhsil müəssisələrinə qəbul qaydalarında dəyişiklik günün tələbidir. Amma bu heç də şagirdlərin əlavə informasiya ilə yüklənməsinə gətirib çıxarmamalıdır”.
Günel CƏLİLOVA
