Kənd Təsərrüfatı Nazirliyinə məxsus “Aqrar Tədarük vəTəchizat” ASC dekabrın 20-30-da Bakının müxtəlif ərazilərində kənd təsərrüfatı və ərzaq məhsullarının satış-yarmarkalarının təşkil edilməsi üçün açıq tender elan edib.
Məlumat üçün bildirək ki, tenderdə iştirak haqqı 150 manatdır. Qeyd edək ki, ölkədə müxtəlif vaxtlarda, adətən bayramlar ərəfəsində satış-yarmarkalar təşkil olunur. Ancaq bu bir faktdır ki, yerlərdə məhsulu özü yetişdirən kəndliləri paytaxtdakı bazarlarda görmək mümkün deyil. Çünki məhsulunu Bakıdakı satış-yarmarkalara gətirərkən yol xərci, həmin müddət ərzində müəyyən qonaq evi ilə təmini vəsait tələb etdiyindən, həmin yarmarkalar heç də kəndli üçün əlçatan olmur. Onu da vurğulayaq ki, bir sıra ölkələrdə həftənin müəyyən günləri məhəllələrdə kiçik bazarlar təşkil edilir və kəndlilər öz məhsullarını bu bazarlarda sata bilirlər.
Tenderdə iştirak haqqının 150 manat olması iştirakçıların narazılığına səbəb olur.
“Qiymət artımı isə yarmarkaların təşkilinə ziddir, bu tip yarmarkaların əsas fəlsəfəsi…”
Məsələ ilə bağlı fikir bildirən iqtisadçı ekspert Natiq Cəfərli qeyd etdi ki, uzun illərdir Azərbaycanda bayram öncəsi satış yarmarkaları keçirilir: “Yarmarkaların təşkil olunmasının əsas məqsədi tarladan süfrəyə çatdırılmanı təşkil etmək, əhalinin daha ucuz məhsullara çıxışını təmin etmək və fermerlərin hər hansı bir vəsait ödəmədən bazara çıxmasına şərait yaratmaqdır. Yarmarkada iştirak üçün əlavə vəsaitin ödənilməsi düzgün deyil. Belə olan halda kəndli məcbur olub satacağı məhsulun qiymətini qaldıracaq”.
Həmsöhbətimiz onu da əlavə ki, xərclərin artırılması qiymət artımına səbəb olur. Qiymət artımı isə yarmarkaların təşkilinə ziddir: “Bu tip yarmarkaların əsas fəlsəfəsi məhsulların ucuz şəkildə vətəndaşa çatıdırılmasıdır. Eyni zamanda, fermerlərin də bazara çıxışı asan olmalıdır”.
Günel CƏLİLOVA
