Gəncə şəhəri, İsmət Qayıbov küçəsi 123 ünvanında yaşayan Dəmirova Sevil Zeynal qızı üzləşdiyi problemlə bağlı redaksiyamıza üz tutub. S.Dəmirova bildirdi ki, iki övlad anasıdır və övladlarının biri birinci, o biri isə ikinci qrup əlildir. İndiyə qədər nə özünün, nə də həyat yoldaşının adına hər hansı bir ev, torpaq sahəsi olmadığını deyən S.Dəmirova uzun illərdir ki, ata evində yaşadığını vurğuladı.
Şikayətçinin sözlərinə görə, 2017-ci ildən Gəncə şəhəri Nizami rayon İcra hakimiyyətinə və Nizami bələdiyyəsinə müraciət edərək, onlara torpaq sahəsinin ayrılmasını istəyib. “Bizim həm torpaq növbəmiz var, həmçinin də nə özümün, nə də yoldaşımın adına heç yerdə ev və torpaq sahəsi yoxdur. Eyni zamanda hər iki övladım əlildir, onlardan biri birinci, o biri isə ikinci qrup əlildir. Biz heç yerdə nə evlə, nə də torpaq sahəsi ilə təmin olunmamışıq, atamın evində yaşayırıq. Bu ev də 120 il bundan əvvəl çiy kərpicdən tikilmiş evdir və artıq sökülüb-tökülür, içində yaşamaq həddən artıq çətindir. Mən dəfələrlə evin təmirinə kömək üçün Nizami rayon İcra hakimiyyətinin başçısı Nizami Hacıyevə müraciət etdim, bildirdim ki, əgər ev təmir edilməsə uçacaq və bədbəxt hadisə baş verəcək, xahiş edirəm mənə köməklik göstərəsiniz. O da dedi ki, sizin mənziliniz xüsusi mənzil olduğu üçün sizə yardım edə bilmərik. Mən icra başçısından xahiş etdim ki, yaşadığımız ev qəzalı vəziyyətdədir, siz heç olmasa bizə torpaq sahəsi ayırın, gedib orada ev tikib yaşayaq”.
“Bu torpaq sahəsinin oğlumun adına sənədləşməsinə 3 saylı Gəncə ərazi İdarəsi və Gəncə Regional Mədəniyyət İdarəsi maneçilik törədir”
S.Dəmirova qeyd etdi ki, Prezident əlillərin sosial vəziyyətinin yaxşılaşdırılması üçün sərəncam verib və həmin sərəncamda bu kateqoriyadan olan insanların torpaq sahəsilə təmin olunması vurğulanıb. “Mənə İcra Hakimiyyətindən dedilər ki, Prezidentin sərəncamına əsasən torpaq sahəsi ayrılıb, amma paylanması barədə hələ qərar yoxdur. Mən də onlara dedim ki, bizim yaşadığımız ərazidə bələdiyyənin mülkiyyətinə aid olan torpaq sahəsi var. Nizami rayon bələdiyyəsindən isə mənə dedilər ki, əgər o torpaq sahəsi bələdiyyənin balansındadırsa biz onu sizə ayırarıq. Həmin torpaq sahəsi İsmət Qayıbov 3-cü döngədə yerləşir. Bu ərazi isə “Nizami” filminin çəkilişi üçün 1981-ci ildə inşa edilən pavilyonun qarşısındadır, o ərazinin pavilyonun ərazisinə heç bir aidiyyatı yoxdur, bələdiyyəyə məxsus boş sahədir və cəmi 4 sotdan ibarətdir. Bələdiyyə əvvəlcə bu sahənin onun balansında olduğunu inkar etsə də, sonra sputnikdən çəkilmiş xəritəyə baxanda göründü ki, bu sahə bələdiyyənin torpağıdır, xəritədə də o hissə yaşıl rəngdə göstərilib. Bələdiyyə həmin torpaq sahəsinin bizə ayrılmasına qərar verdi və onun sənədləşdirilməsinə başladı. Bu minvalla bələdiyyə həmin sahəni torpaq quruluşu qurumuna təqdim etdi və həmin qurum da öz rəyini bildirdi ki, bu sahə bələdiyyəyə aiddir, o satıla, hər hansı bir sakinin sosial probleminin həllinə yönəldilə bilər. Eyni zamanda Gəncə şəhər Memarlıq İdarəsi də həmin torpaq sahəsinin bələdiyyə torpağı olduğunu təsdiq etdi. İsmət Qasıbov 3-cü döngədəki bələdiyyə torpağının bütün sənədləri toplanaraq Əmlak Məsələləri Dövlət Xidməti yanında Daşınmaz Əmlakın Dövlət Reyestri Xidmətinin 3 saylı Gəncə ərazi İdarəsinə təqdim edildi və Gəncə Ərazi İdarəsi də həmin sənədləri təsdiq üçün Bakıya Dövlət Reyestr Xidmətinə göndərdi. Sənədlərin təsdiqinin bir qədər gecikdiyini görüb, 3 saylı Gəncə Ərazi İdarəsinə getdim ki, gecikmənin səbəbini öyrənim. 3 saylı Gəncə Ərazi İdarəsində məsləhətçi işləyən İlqar Mustafayev mənə dedi ki, nə torpaq sahəsi, 50 minlik torpaq sahəsinə yiyələnmək istəyirsən, mən heç elə kateqoriyaya aid olan torpaq sahəsi tanımıram. Sonra bildim ki, eyni zamanda Dövlət Xidməti həmin torpaq sahəsinin ikinci qrup əlil olan övladım Dəmirov Qabil Mahir oğluna verilməsini təsdiqləyib. Dövlət Xidməti o torpaq sahəsinin oğluma verilməsinə müsbət yanaşıb. Buna isə Gəncə Ərazi İdarəsi rəy bildirməli idi, lakin hələ də rəy bildirməyib, işi indiyə qədər yubadır”.
Pavilyonun qarşısındakı bələdiyyəyə məxsus boş sahə ilə bağlı müəyyən şəxslərin maraqlı olduğunu deyən S.Dəmirova bildirdi ki, torpaq sahəsinin Dəmirovlar ailəsinə verilməsinə bütün mənalarda mane olanlar var. S.Dəmirovanın sözlərinə görə, Nizami bələdiyyəsi həmin ərazinin Mədəniyyət Nazirliyinin regional idarəsinin balansında olmamasının təsdiqlənməsi üçün nazirliyə müraciət edib, nazirlik isə o ərazinin onun balansında olmadığını təsdiqləyib. “Nazirlikdən rəsmən bildirilib ki, onlara aid ərazi pavilyonun yerləşdiyi ərazidir, pavliyonun özüdür, fasadıdır. İkinci dəfə də Nizami rayon icra hakimiyyəti Mədəniyyət Nazirliyinin Gəncə regional idarəsinə müraciət edib, idarədən də bildirilib ki, biz o torpaq sahəsinə münasibət bildirə bilmərik, çünki o bizim idarənin balansında deyil. Nizami rayon bələdiyyəsi İsmət Qayıbov 3-cü döngədəki torpaq sahəsini oğlum Dəmirov Qabil Mahir oğluna ayırıb və bununla bağlı Dövlət Xidmətinə müraciət edib, Dövlət Xidməti isə bunu rəsmən təsdiqləyib. Bələdiyyə həmin torpaq sahəsinin oğluma verilməsinə razılıq versə də, buna Dövlət Xidmətinin də rəsmi razılığı olsa da, Mədəniyyət Nazirliyinin Gəncə Regional Mədəniyyət İdarəsinin yeni təyin edilmiş rəisi Vasif Cənnətov bu işə mane olur. O bu vəzifəyə 3 saylı Gəncə Ərazi İdarəsinin Samux rayon şöbəsindən gəlib. Bu adam torpaq alqı-satqısı barədə məlumatlı olduğundan, həmin torpaq sahəsini mənimsəmək məqsədilə məktub yazıb ki, guya həmin ərazi Mədəniyyət Nazirliyinin Gəncə regional idarəsinin balansındadır. Halbuki, əlimdə olan məktublara, 2015-ci ildə Dövlət Əmlak Agentliyinin verdiyi xəritəyə və üç qurumun verdiyi təsdiqə əsasən həmin ərazi Nizami bələdiyyəsinə aiddir. Lakin Gəncə Regional Mədəniyyət İdarəsinin rəisi Vasif Cənnətov bələddiyə mülkiyyətində olan torpaq sahəsini mənimsəmək istəyir. O, eyni zamanda, həmin idarədə neqativ işlərlə də məşğuldur, idarədə artıq ştat saxlayır və bununla da dövlət büdcəsinə müəyyən ziyan vurur. Fürsətdən istifadə edib Mədəniyyət Nazirliyinə müraciət etmək istəyirəm ki, Gəncə Regional Mədəniyyət İdarəsinin rəisinin neqativ əməllərinə son qoyulmasına kömək etsinlər. Bu ərazi bələdiyyə torpağı olduğu halda Regional İdarənin rəisi ora əl qoyur. Hesab edirəm ki, bu torpaq sahəsinin oğlumun adına sənədləşməsinə 3 saylı Gəncə Ərazi İdarəsi və Gəncə Regional Mədəniyyət İdarəsi maneçilik törədir”.
S.Dəmirovanın sözlərinə görə, Gəncə Regional Mədəniyyət İdarəsinin rəisi deyib ki, həmin boş sahədə gül-çiçək əkib, həmin ərazini abadlaşdıracaq. Şikayətçi qeyd etdi ki, idarə rəisi abadlaşdırmaq istəyirsə elə sökülüb-dağılmaqda olan pavilyonu abadlaşdırsın, onun bələdiyyə torpağında nə işi var?!
S.Dəmirova bildirdi ki, Gəncə Regional Mədəniyyət İdarəsi və 3 saylı Gəncə Ərazi İdarəsi məsələnin çözümünə problem yaradır. O vurğuladı ki, problemin həlli üçün ombudsman Səbinə Əliyevaya da müraciət edib, ombudsman da problemin həll edilməli olduğunu bildirib. “Bu torpaq sahəsinin oğluma verilməsinə kömək etməsi üçün ombudsman Səbinə Əliyevaya müraciət etdim. Ombudsman isə cavab məktubu ilə Nizami rayon İcra hakimiyyətinə müraciət edib və həmin sənədləri araşdırıb ona cavab verilməsini xahiş edib. Oğlum torpaq növbəsində olduğu halda, yalandan ombudsman aparatına məlumat vermişdilər ki, Sevil xanım torpaq növbəsində yoxdur. Bəli, mən növbədə yoxam, oğlum növbədədir. Hər iki övladım əlil olduğu üçün onlara aid bütün məsələlərlə özüm məşğul oluram... Ombudsman aparatına zəng vurub məlumat verdim ki, sizə yalan məlumat veriblər, mən ali tahsilli müəlliməyəm, 17 il hökümətdə işləmişəm, komsomol, partiya işçisi olmuşam, bir müddət mətbuatda işləmişəm, amma nə mənim adıma, nə də yoldaşımın adına nə mənzil, nə də torpaq sahəsi var, sizdən xahiş edirəm ki, oğlum Dəmirov Qabil Mahir oğlunun həmin torpaq sahəsi ilə təmin olunmasına köməklik göstərəsiniz”.
Beləliklə, 2017-ci ildən müraciət etməsinə baxmayaraq, hələ də problem öz həllini tapmadığından, şikayətçi əlaqədar qurumlardan problemin həllinə kömək istəyir.
Ümid edirik ki, S.Dəmirovanın müraciəti cavabsız qalmayacaq və aidiyyəti qurumlar bu məsələyə həssas yanaşaraq problemi tez bir zamanda həll edəcək.
İradə SARIYEVA
