Dünyanın tanınmış "Worldpopulationreview" saytı özünü ateist hesab edən vətəndaşlar üzrə ölkələrin siyahısını paylaşıb. Siyahıda Azərbaycan 6-cı yerdə qərarlaşıb. Saytın verdiyi məlumata görə, Azərbaycanda əhalinin 64%-i özünü heç bir dinə mənsub hesab eləmir.
Azərbaycan əhalisinin yarıdan çoxunun özünü ateist hiss etməsi çox qəribədir, sözün düzü, bu heç cür real görsənmir.
Azərbaycan əhalisinin 64 faizinin ateist kimi təqdim edilməsi və rəy sorğusunda 6-cı yerdə qərarlaşdırılması nə dərəcədə real seçimdi, yaxud reallığı əks etdirir?
“Azərbaycan əhalisinin 60 faizdən artığının özünü “ateist” hesab etməsi kökündən yanlışdır”
AVCİYA-nın vitse-prezidenti, professor, siyasi şərhçi Məhərrəm Zülfüqarlı hesab edir ki, Azərbaycan əhalisinin yarıdan çoxunun teist kimi qələmə verilməsi qətiyyən doğru deyil. M.Zülfüqarlının sözlərinə görə, bu, Azərbaycan reallığı deyil. “İnsanların dinə inanıb-inanmaması məsələsi həm çox maraqlı, həm də çox mürəkkəb məsələdir. Bilirsiz ki, Azərbaycan xalqı öz adət-ənənəsinə, dininə, milli-mənəvi dəyərlərinə bağlı xalqdır, dini inanclarını da həmişə qoruyub saxlamağı bacarıb. Baxmayaraq ki, 70 il Sovet rejiminin, ateizm ideologiyasının təzyiqi altında yaşayıb. Amma Qurban Bayramını da, Novruz Bayramını da keçirib, dini ritualları da icra edib, inancına sadiq qalıb, yas mərasimlərini də ənənələrə, qaydalara uyğun din xadimlərinin iştirakı ilə həyata keçirib. "Worldpopulationreview" saytının özünü ateist hesab edənlərlə bağlı sorğusuna və Azərbaycan əhalisini 6-cı yerdə qərarlaşdırmalarına gəlincə, bu şirkətlər, saytlar adətən sorğunu bir cür qoyur, cavabı başqa cür yazır. Məsələn, ola bilsin ki, sualı “siz namaz qılırsınız, oruc tutursuz, yoxsa yox?” olaraq qoyublar, bununla da insanların dinə inanıb-inanmadıqlarını “müəyyən edib”lər. Azərbaycan əhalisinin 60 faizdən artığının özünü “ateist” hesab etməsi kökündən yanlışdır. Azərbaycanda islam dininə tapınan əhalinin 90 faizi dünyanın hansı nöqtəsindəsə islama qarşı hansısa bir iftira, xoşagəlməz kampaniya aparılanda buna həssaslıq göstərib dərhal reaksiya verir, öz dini inanclarının müdafiəsinə qalxırlar. Sual oluna bilər ki, Azərbaycanda dini təəssübkeşlik nə qədərdi? Bu həddən artıq çoxdu. Elə vətənpərvərliyə bərabərdir.
Bu xarici sayt insanlara dolayı, çaşdırıcı suallarla müraciət edib və onların da “çörəyi bundan çıxır”. Yəni hardansa qrant alıb sorğu keçirirlər və ortaya bu cür qeyri-real, çaşdırıcı rəqəmlər qoyurlar. Onlar qrant aldıqları təşkilatların maraqlarına uyğun nəticələr üzə çıxarırlar. Fikrimcə, bu sorğu tamamilə yanlışdır və Azərbaycan əhalisinin 6-cı yerdə qərarlaşdırılması da qeyri-realdı. Azərbaycan xalqı vətəninə, mədəniyyətinə, dininə, dilinə, dövlətçiyinə bağlı bir xalqdır. Mənə elə gəlir ki, saytın təqdim etdiyi bu rəqəm bizə qarşı təxribatdı. Çünki 44 günlük müharibədə Azərbaycan qələbə çaldı, dövlətimizin beynəlxalq imici artdı. İndi bəzi təşkilatlar bu yolla xalqı parçalamaq, onun imicinə xələl gətirmək istəyir. Bunun da heç bir təsiri olmayacaq”-deyə M.Zülfüqarlı qeyd etdi.
İradə SARIYEVA
