Ramin Bayramlının TƏBİB-in İdarə Heyətinin sədri vəzifəsindən gözlənilməz istefasının ardınca belə bir fikirlər gündəmə gəldi ki, TƏBİB ləğv edilməli, onun bütün səlahiyyətləri isə Səhiyyə Nazirliyinə verilməlidir. Ekspertlər deyir ki, TƏBİB yaradıldıqdan sonra ölkə səhiyyəsinin idarəedilməsində ikitirəlik yaranıb.
Bu, xüsusən də özünü pandemiya ilə mübarizə məsələsində daha qabarıq şəkildə göstərir, bu istiqamətdə də ikitirəlik gözdən yayınmır. Bir koronavirus xəstəsi evindən müalicə müəssisəsinə gedib çatana qədər gah TƏBİB-ə, gah da Səhiyyə Nazirliyinə müraciət edir. İnsanlar ən çətin vəziyyətdə hansı quruma müraciət edəcəklərinə çaş-baş qalırlar. Çünki Səhiyyə Nazirliyinə zəng edəndə, “bu, TƏBİB-in səlahiyyətindədir”, TƏBİB-ə zəng vuranda isə “siz Səhiyyə Nazirliyi ilə əlaqə saxlayın” cavabını eşidirlər. Bu da prosesin bir qurumdan, vahid mərkəzdən idarə olunmasını zəruri edir. Yəni vahid qurum olmalı və xəstə müalicə üçün hara müraciət etməli olduğunu bilməlidir.
TƏBİB-in ləğv edilməsinə tərəfdar olanlar çoxdur. Bu fikirdə olanlar hesab edir ki, TƏBİB öz üzərinə düşən vəzifənin öhdəsindən elə də uğurla gəlməyib.
- Ədalət Rüstəm: “TƏBİB-in ləğv ediləcəyi gözlənilə bilər, ləğv eidlməsə də, ola bilsin ki, səlahiyyətləri azaldılsın”
Azərbaycan Həkimlər Birliyinin İdarə Heyətinin üzvü, professor Ədalət Rüstəm “Bakı-Xəbər”ə bildirdi ki, TƏBİB-in ləğvi zərurətə çevrilib. “İdarəetmədə paralel qurumlar ola bilməz, bir mərkəz olmalıdır - ya Səhiyyə Nazirliyi, ya da TƏBİB. Səhiyyənin idarəolunmasında pərakəndəlik yaxşı nəticə vermir. Bilirsiz ki, idarəetmədə ikitirəlik kimi xoşagəlməz hallar yaranır. Səhiyyə vahid mərkəzdən idarə edilməlidir. TƏBİB-in ləğv ediləcəyi gözlənilə bilər, ləğv eidlməsə də, ola bilsin ki, səlahiyyətləri azaldılsın”.
Digər ölkələrdə də TƏBİB statusunda təşkilatların olduğunu qeyd edən Ə.Rüstəmin sözlərinə görə, amma onların səlahiyyətləri elə də yüksək deyil, məhduddur. Hər bir qurumun özünün konkret funksiyası, işi olmalı olduğunu deyən ekspert qeyd edir ki, ölkəmizdə səhiyyənin, xüsusən də pandemiya ilə mübarizənin vahid mərkəzdən, vahid səhiyyə qurumundan idarə olunmaması müəyyən qarışıqlıqlar yaradıb: “Bu məsələdə səlahiyyətlər əsasən TƏBİB-ə verilmişdi. Bu da ikitirəliyin yaranması və bir-birinə buynuz göstərmələri ilə nəticələnirdi. Bu məsələ vahid mərkəzdən idarə olunmalıdır”.
- Şakir Ağayev: “TƏBİB-in bir qurum kimi fəaliyyəti qənaətbəxş olmadığı...”
“Novoye vremya” qəzetinin baş redaktoru Şakir Ağayev “Bakı-Xəbər”ə şərhində bildirdi ki, əslində R.Bayramlının istefası gözlənilən idi. “Çünki pandemiya ilə mübarizədə onun fəaliyyəti qənaətbəxş deyildi. Pandemiya dövründə insanların narazılığı və digər problemlərin olduğu da gizlin deyil. Camaatın narazılığı vardı. TƏBİB-in ləğv edilməsinə gəlincə, çox təəssüf ki, Azərbaycanda bəzi nazirliklər, idarə və təşkilatlar bir-birini təkrar edir, profilcə eynidirlər. Səhiyyə Nazirliyi ilə TƏBİB də həmçinin. Bu bir tərəfdən iqtisadi cəhətdən ziyanlıdır, digər tərəfdən də idarəçilik baxımından qətiyyən düzgün deyil. Üstəlik, məsuliyyət baxımından da problem yaradır. Çünki bir-birini təkrar edən təşkilatlar məsuliyyəti bir-birinin üstünə atırlar və ortada cəmiyyət, vətəndaş əziyyət çəkir. Öz üzərlərinə düşən işi görə bilməyəndə bu onun, o da bunun boynuna atır. Çıxış yolunu bunda görürlər. Ümumiyyətlə paradoksal haldı, Azərbaycanda səhiyyənin idarəedilməsi ilə üç təşkilat məşğul olur. Səhiyyə Nazirliyi, TƏBİB və İcbari Tibbi Sığorta Agentliyi var. Ya bunların üçünü birləşdirib geniş tərkibli bir dövlət qurumu yaratmaq, yaxud da TƏBİB və İcbari TİBBİ Sığortanı da Səhiyyə Nazirliyinin tabeliyinə verib fəaliyyətlərini təmin etmək olardı. Belə olduqda hər kəs öz məsuliyyətini hiss edərdi. Bu təşkilatlar bir-birini ittiham etməklə, günahı bir-birində görməklə məşğul olurlar ki, alternativ təşkilat gözdən düşsün. Bundan isə insanlar əziyyət çəkir, dövlətin gördüyü işlər gölgə altına düşür. Ona görə də, TƏBİB-in bir qurum kimi fəaliyyəti qənaətbəxş olmadığı üçün ləğvi mümkündür. Amma təbii ki, bu bizim səlahiyyətimizdə olmayan məsələdir. Buna yalnız ölkə rəhbərliyi qərar verə bilər, bu onun səlahiyyətindədir...
Fikrimcə, TƏBİB-in bir qurum kimi Səhiyyə Nazirliyinə birləşdirilməsi daha düzgün olardı. Çünki pandemiya sınağından TƏBİB üzüağ çıxa bilmədi...” - deyə Ş.Ağayev qeyd etdi.
İradə SARIYEVA
