Suraxanıda Samir Əliyev adlı şəxsin torpağını zəbt edib tikinti aparırlar, İcra Hakimiyyəti susur…

Suraxanı Rayon İcra Hakimiyyəti: “Həmin ərazi Suraxanı ərazisi olduğundan, onunla bağlı Xətai Rayon İcra başçısı sərəncam verə bilməz”

img

Torpaqların təyinatdan kənar və əsassız istifadə edilməsi, özbaşına zəbt olunması, qanunsuz tikintilərin aparılması halları ilə bağlı məlumatlara tez-tez rast gəlirik. Növbəti belə hadisə Bakının Suraxanı rayonu, S. Mehmandarov küçəsində qeydə alınıb. Adıçəkilən ərazidə yerləşən 6 sot torpaq sahəsi 20 gündən çoxdur ki, zəbt olunub.

Bakı şəhər sakini Samir Əliyev bildirir ki, ona məxsus torpaq sahəsində bünövrə qazılıb, beton tökülüb və qanunsuz tikinti aparılır: “Dəfələrlə polis orqanları tərəfindən tikintiyə müdaxilə olunsa da, bir müddət ara verilir, sonra yenidən inşaat işləri davam etdirilir. Torpaq sahəsi 2000-ci ildə Xətai Rayon İcra Hakimiyyəti tərəfindən verilən sərəncam əsasında alınıb. Lakin ötən aydan etibarən ərazidə tanımadığım şəxslər tərəfindən inşaat işlərinə başlanılıb. Bu ərazi Xətai və Suraxanı rayonlarının kəsişməsində yerləşir və 2012-ci ilədək hər iki rayonun ərazisi sayılıb. Mənim əlimdə Xətai RİH tərəfindən verilmiş sərəncam var, bütün sənədlərim qaydasındadır. Ötən ay torpaq sahəsinə baxanda gördüm ki, ərazidə tikinti işləri aparırlar. İradımı bildirdim, xəbərdarlıq etdim. Tikinti aparan şəxslər dedilər ki, burada tikintiyə Suraxanı Rayon İcra Hakimiyyəti tərəfindən icazə verilib. “102” xidmətinə müraciət olundu və əraziyə polis əməkdaşları gəldilər. Onlar da tikintinin qeyri-qanuni olduğunu bildirib dayandırılmasını tələb etdilər. Bakı Şəhərsalma və Arxitektura Komitəsindən də gəlib tikintinin qeyri-qanuni olduğunu bildirdilər. Tikintini aparan şəxslərin heç bir sənədi yoxdur. Hazırda ümumilikdə 12 sot torpaq sahəsində tikinti işləri aparılır. Nə tikildiyi, kim tərəfindən tikildiyi məlum deyil”.

  • “Samir Əliyev Xətai rayonundan saxta sərəncam gətirib ki, bu torpaq ona məxsusdur, bu ərazi Suraxanı rayonu ərazisinə aiddir, əraziyə Xətai RİH başçısı sərəncam verə bilməz”

Məsələ ilə bağlı Suraxanı Rayon İcra Hakimiyyətindən bildirildi ki, həmin ərazi Suraxanı ərazisi olduğundan, onunla bağlı Xətai rayon icra başçısı sərəncam verə bilməz: “Samir Əliyev isə Xətai rayonundan saxta sərəncam gətirib ki, bu torpaq ona məxsusdur. Hansı ki, bu ərazi Suraxanı rayonu ərazisinə aiddir, bu əraziyə Xətai RİH başçısı sərəncam verə bilməz. Vətəndaşa deyilib ki, iddianız varsa, bunun hüquqi yolu var, məhkəməyə müraciət edin. Kimindirsə, məhkəmə müəyyən edər və o da torpağında işini görər”.

Günel CƏLİLOVA

Son xəbərlər