Sosial şəbəkələrdə pullu xidmət təklif edən “ünvanlı sosial yardım” kimi səhifələri kim açıb?...

Dövlət Sosial Müdafiə Fondu - Rəşad Mehdili: “Ünvanlı dövlət sosial yardımı ilə bağlı qeydiyyatdan keçmək üçün hər hansı bir ödəniş tələb olunmur”

img

Son zamanlar sosial şəbəkələrdə ünvanlı sosial yardımın verilməsi və mövzuda insanlara kömək etmək adı altında səhifələr fəaliyyət göstərir. Bu hal daha çox İnstagramda qeydə alınır. İnstagramda “unvanli_sosial_yardim”, “sosial_yardim_qeydiyyat”, “unvanli_sos_yardim” kimi profillər yaradılmaqla, ünvanlı sosial yardım alınması üçün müraciət edilməsində ödəniş müqabilində köməklik ediləcəyinə dair elanlar verilir.

Bu elanlar kiminsə aztəminatlı ailələrin üzvlərini onların inamından və məlumatsızlığından sui-istifadə edərək aldatmaqla, dələduzluq yolu ilə qazanc əldə etməsi məqsədinə yönəlib. Onların bu hərəkəti qanunsuzdur. Qeyd edək ki, bu səhfələrin qurbanı olan şəxslər də az deyil. Onlar ünvanlı sosial yardım alacaqlarını düşünüb, səhfəni idarə edən şəxslərə müəyyən məbləğdə vəsait köçürürlər.

  • “Vətəndaşlar sosial şəbəkələrdə ünvanlı sosial yardım alınması üçün müraciət edilməsində ödəniş müqabilində  köməklik ediləcəyi kimi aldadıcı elanlarla rastlaşdıqları halda diqqətli olsunlar”

Məsələ ilə bağlı fkir bildirən Dövlət Sosial Müdafiə Fondunun (DSMF) İctimaiyyətlə əlaqələr departamentinin müdiri Rəşad Mehdili bildirdi ki, ünvanlı dövlət sosial yardımı ilə bağlı qeydiyyatdan keçmək üçün hər hansı bir ödəniş tələb olunmur: “İstənilən şəxs ünvanlı dövlət sosial yardımı, bu yardımın kimlərə şamil olunduğu, ünvanlı dövlət sosial yardımı üçün müraciət etmək qaydası barədə məlumatları Əmək və Əhalinin Sosial Müdafiəsi Nazirliyinin sosial.gov.az saytındakı “Ünvanlı dövlət sosial yardımı” bölməsindən öyrənə bilər. Eyni zamanda, həmin bölmədəki müvafiq altbölmə üzərindən ünvanlı sosial yardımla bağlı müraciət edə bilər. Ona görə də vətəndaşlara sosial şəbəkələrdə ünvanlı sosial yardım alınması üçün müraciət edilməsində ödəniş müqabilində guya köməklik ediləcəyi kimi aldadıcı elanlarla rastlaşdıqları halda diqqətli olmağı və aldanmamağı tövsiyə edirik. Elan sahiblərinə isə bu səhifələrin ləğv edilməsi barədə xəbərdarlıq edilib. Səhifələr silinməzsə, hüquqi qiymət verilməsi üçün hüquq-mühafizə orqanlarına müraciət olunacaq”.

Günel CƏLİLOVA

Son xəbərlər