2020-ci ildə dövlət ali təhsil müəssisələri arasında dövlət sifarişi ilə tələbə qəbulunda magistratura üzrə ən zəif nəticə göstərən ali təhsil müəssisələrinin adı açıqlanıb.
Siyahıda Naxçıvan Dövlət Universiteti, Mingəçevir Dövlət Universiteti, Bakı Slavyan Universiteti, Lənkəran Dövlət Universiteti, Azərbaycan Texnologiya Universiteti və Naxçıvan Müəllimlər İnstitutu yer alır. Qeyd edək ki, bu ali təhsil müəssisələrində dövlət sifarişi üzrə ayrılan yerlərə qəbul faizi 20-dən aşağı olub.
Ali təhsil müəssisələrinə dövlət sifarişi əsasında tələbə qəbulunda magistratura üzrə qeyd etdiyimiz universitetlərdə nəticə nə səbəbdən aşağıdır? Bu barədə təhsil eksperti Kamran Əsədovla söhbət etdik.
“Bakalavrlardan heç biri Bakı Xoreoqrafiya Akademiyası və Daxili İşlər Nazirliyinin Polis Akademiyasında təhsil almaq istəməyib”
K.Əsədov bildirdi ki, dövlət sifarişi ilə təhsil almaq hüququ qazanan bakalavrlardan heç biri Bakı Xoreoqrafiya Akademiyası və Daxili İşlər Nazirliyinin Polis Akademiyasında təhsil almaq istəməyib: “Onu da qeyd edim ki, 2020-ci ilin magistratura imtahanlarının nəticələri Bakı Avrasiya Universiteti, Bakı Qızlar Universiteti, Bakı Biznes Universiteti və Azərbaycan Əmək və Sosial Münasibətlər Akademiyasının yüksək hazırlıqlı bakalavrlar arasında heç bir nüfuza malik olmadıqlarını göstərib. Maraqlı məqam ondan ibarətdir ki, 2020-ci ildə dövlət sifarişi ilə təhsil almaq hüququ qazanan bakalavrlar bu təhsil müəssisələrində də təhsil almaq istəməyiblər.
Naxçıvan Dövlət Universiteti, Mingəçevir Dövlət Universiteti, Bakı Slavyan Universiteti, Lənkəran Dövlət Universiteti, Azərbaycan Texnologiya Universiteti və Naxçıvan Müəllimlər İnstitutunun bakalavrları magistratura üzrə ən zəif nəticə göstəriblər”.
Məlumat üçün bildirim ki, 2020-ci ildə yüksək nəticə göstərən 99 bakalavr müsabiqə nəticəsində öz istəkləri ilə müxtəlif özəl ali təhsil müəssisələrinə qəbul olunublar. Bu gənclərin 50 nəfəri (50.51%) təhsilini Xəzər Universitetində davam etdirmək istəyib”.
Günel CƏLİLOVA
