Naxçıvanda koronavirus yox dərəcəsində - toylar, yaslar öz yerində, maska məcburi deyil, bölgənin özəllikləri...

Pərvanə Vəliyeva: “Naxçıvanın təbii şəraiti, əsas da yerləşdiyi coğrafi mövqe xəstəliyin sürətli yayılmasına imkan vermir”

img

Dünyanı cənginə alan koronavirusla bağlı Azərbaycanın daxilində də fərqli mənzərə hakimdir. Məlum olduğu kimi, pandemiya elan olunan bu xəstəliklə bağlı bütün dünyada məhdudiyyətlər tətbiq olunur.

Hətta dünyanın ən inkişaf etmiş ölkələri belə, bu bəla ilə mübarizədə məcburi qapanmaya, sərt karatnin tətbiqinə gedirlər. Azərbaycanın blokada şəraitində yaşayan Naxçıvan MR-də isə koronavurisla bağlı tam fərqli ab-hava hakimdir. MR-də, demək olar ki, bütün müəssisələr fəaliyyətini əvvəlki qaydada davam etdirir. Məktəb və bağçalar bağlanmayıb. İdman zalları fəaliyyət göstərir, toy və yas mərasimlərinin keçirilməsilə bağlı məhdudiyyət yoxdur. Xəstəliyin yayıldığı ilkin zamanlarda Naxçıvandan verilən rəsmi məlumatlarda bildirilirdi ki, bir nəfərdə belə həmin virus aşkarlanmayıb. Sonrakı dönəmdə maksimum ikirəqəmli yoluxma hallarının olması ilə bağlı məlumat verildi. Hazırda da vəziyyətin qənaətbəxş olduğu söylənilir. Koronavirusun Naxçıvandan yan keçməsini hansı amillərlə izah etmək olar?

 “Sağlamlığa  Xidmət” İctimai Birliyinin icracı direktoru Pərvanə Vəliyeva “Bakı-Xəbər”ə açıqlamasında bildirdi ki, Naxçıvanla bağlı yaşananların obyektiv səbəbləri var: “Təəssüf ki. bəzən biz bu yöndə reallığı əks etdirməyən xəbərlərlə rastlaşırıq. Bilirsiniz ki, virusun yayılmasının qarşısını təcridlə alırlar. Qapanma, karatin məhz bu məqsədə xidmət edir. Geniş anlamda götürdükdə, Naxçıvanın mövcud vəziyyəti bir qədər təcridi xatırladır. Bilirsiniz ki, Naxçıvan blokadadadır, giriş-çıxışı yoxdur. Karantinə görə digər dövlətlərlə quru sərhədi də bağlıdır. Yerli vətəndaşlar ora yalnız  hava yolu ilə gedə bilirlər. Uçuşlara isə COVİD 19 testi verdikdən sonra icazə verilir. Ümumiyyətlə, Naxçıvanda digər infeksion xəstəliklər də azdır. Məsələn, Respublika üzrə vərəmin ən az müşahidə olunduğu yerdir. Hər 100 min nəfərə Bərdədə  62 xəstə düşürsə, Naxçıvanda bu, hər 100 min nəfərə 2 adam təşkil edir. Yadınızdadırsa, COVİD 19 yayıldığı ilk günlərdə Bakıda çox idi. Səbəb Avropadan gələnlərin Bakıda çox olması ilə bağlıydı. Daha sonra Cənub bölgəsində İrandan gələnlərə görə yayılmağa başladı. Digər rayonlarda, demək olar ki, uzun müddət 1 yoluxma belə yox idi. Rayonlara və digər böyük şəhərlərə virus əsasən Bakıdan gediş-gəliş nəticəsində yayıldı. Bütün bunlar onu deməyə əsas verir ki, Naxçıvanın təbii şəraiti, əsas da yerləşdiyi çoğrafi mövqe xəstəliyin sürətli yayılmasına imkan vermir. Buna baxmayaraq, MR-də bütün qabaqlayıcı tədbirlərin görüldüyü haqda da məlumatlar var”.

Məhəmmədəli QƏRİBLİ

Son xəbərlər