Bal insan üçün ən dəyərli qida məhsulu hesab olunur. Balın tərkibində insan üçün xeyirli olan 500-dən artıq maddə və zülallar var. Əlverişli təbii iqlim şəraiti, zəngin yem bazası ehtiyatları və qiymətli cinslərə malik arı genefondu Azərbaycanda arıçılığın inkişaf etdirilməsinə həmişə geniş imkanlar yaradıb.
Hələ bir neçə onillik əvvəl qədimdən arıçılığın vətəni kimi tanınmış Azərbaycanın istehsal etdiyi yüksək keyfiyyətli arı məhsulları daxili tələbatı ödəməklə yanaşı, qonşu ölkələrə də ixrac edilir və bu məhsullar alıcı dövlətlərdə həmişə yüksək qiymətləndirilirdi. Lakin zaman keçdikcə müəyyən səbəblərdən bu ənənələr davam etdirilmədi. Bu isə, nəticə etibarilə, ona gətirib çıxarıb ki, Azərbaycan arıçılığını inkişaf səviyyəsi dünya arıçılığından xeyli geri qaldı.
Məlumat üçün bildirək ki, Azərbaycanın arı genefondu əsasən Qafqaz arı cinslərinin ölkəmizin təbii iqlim şəraitinə uyğun olaraq formalaşmış populyasiyalarından ibarətdir. Böyük Qafqaz arı cinsinin Azərbaycanda Qabaqtəpə və Şahdağ arı populyasiyası mövcuddur ki, onlar əsasən, Kiçik Qafqaz və Böyük Qafqaz dağlarının Azərbaycana aid ərazilərində yayılıb.
Artıq ölkəmizdə arıçılığın inkişafı üçün lazımi işlər görülür. Bu işlə məşğul olanlara dövlət tərəfindən müəyyən dəstək göstərilib. Ancaq arıçılıqla məşğul olanlar mövsumqabağı narahat olmağa başlayıblar. Onların da narahat olmalarının səbəbi məhsuldar ana növlərinin gətirilməsi ilə bağlıdır.
“Azərbaycanda tam tələbatı ödəyən ana arı yetişdirmə mərkəzi yoxdur”
Arıçılıqla məşğul olan Xəyal Qarayev bildirdi ki, bu gün yerli arıçıların ana arı problemi var: “Məlumat üçün bildirim ki, Azərbaycanda tam tələbatı ödəyən ana arı yetişdirmə mərkəzi yoxdur. Kimlərsə bu sistemi hazırlayıb yetişdirə bilir. Amma bu, arıçıların tələbatını tam ödəyə bilmir. Bu səbəbdən də ana arı yetişdirmə mərkəzləri açılsa, arıçılar lazımi vaxtda o arılardan alıb anaları yeniləsələr, xaricdən gələn ana arı asılılığandan qurtarmaq olar”.
Günel CƏLİLOVA
