Yumşaldılmış karantin dövründə yoluxma halları müşahidə olunsa da, vəziyyət idarəolunandır. “Trend”in məlumatına görə, bunu Nazirlər Kabineti yanında Operativ Qərargahın brifinqində Nazirlər Kabinetinin Mətbuat xidmətinin rəhbəri İbrahim Məmmədov deyib.
Onun sözlərinə görə, aidiyyəti qurumların yaratdığı maddi-texniki baza imkan verir ki, karantin qaydalarında yumşalma tədbirləri görülsün:"İki ay ərzində karantin dövründə koronavirusa qarşı mübarizə üçün ölkə daxilində məhsulların istehsalına başlamışıq. Bəzi məhsullar üzrə idxalı minumuma endirmişik, bəzi məhsullar üzrə isə idxala ehtiyac olmayıb. Sumqayıtda gündə 200 min maska istehsal gücü olan 1, sonra isə gündə 300 min istehsal gücü olan daha bir zavod açıldı. Artıq birdəfəlik kombinezon istehsalına başlamışıq. Gündə 6 min kombinezon istehsal ediləcək. Modul tipli xəstəxanaların da tikintisinə başlanılıb. Artıq tibbi heyətin təşkilati gücü var. Ona görə də bugünkü gücümüz bizə yumşalma tədbirləri görməyə imkan verir".
Bakıda polis postlarının azaldılması DİN-dən asılıdır
İ.Məmmədov SMS-lə icazə ləğv ediləndən sonra Bakı və Bakıətrafı ərazilərdə polis postlarının ləğv edilməsi və ya azaldılmasının Daxili İşlər Nazirliyinin (DİN) qərarından asılı olduğunu deyib. Onun sözlərinə görə, karantin rejimi ləğv edilməyib və karantin qaydalarına riayət olunmalıdır:"İnsanlar müəyyən standart və zəruri qaydalara əməl etməlidirlər. O ki, qaldı polis postlarının azaldılmasına, buna əməl etmək Daxili İşlər Nazirliyinin səlahiyyətindədir. Nazirlik hesab edərsə ki, əhalinin hərəkətinə nəzarət edə bilir, onda yollardakı postların azaldılmasına qərar verə bilər, eyni zamanda, postların sayını artıra bilər. Bu, nazirliyin yumşaldılma prosesindən sonrakı qərarından və gəldiyi qənaətdən asılı olacaq".
Gəncədə epidemiyanın yayılmasının qarşısı müəyyən qədər alınıb
Tibbi Ərazi Bölmələrini İdarəetmə Birliyinin (TƏBİB) sədri Ramin Bayramlı isə deyib ki, Gəncə şəhərində aparılan əksepidemik tədbirlər nəticəsində epidemiyanın yayılmasının qarşısını müəyyən qədər almaq mümkün olub. Amma bu tədbirlər davam etdirilməlidir. Onun sözlərinə görə, hər gün aparılan təhlillərə əsasən, karantin tədbirlərinin yumşaldılması və ya sərtləşdirilməsi barədə qərarlar qəbul edilir.
R.Bayramlı qeyd edib ki, ölkədə pandemiya ilə mübarizənin birinci mərhələsi ilk yoluxma faktının aşkarlanması ilə başlayıb: “Hazırda biz pandemiya ilə mübarizənin ikinci mərhələsindəyik. Aprelin 27-dən bəzi yumşaldılma tədbirlərinə başlanılıb. Təəssüflər olsun ki, bəzi ərazilərdə qaydalara məsuliyyətlə yanaşılmır. Artıq Yevlax rayonunda da 64 sakində koronavirus aşkarlanıb. Bu rayonda da ciddi epidemioloji tədbirlərin görülməsinə ehtiyac var. Lənkəran da narıncı zonada qalır”.
Mayın 2-dən sonra yoluxma halları artıb
R.Bayramlı qeyd edib ki, aprelin 27-dən mayın 2-dək olan müddətdə koronavirusa aktiv yoluxma hallarının sayı sabitləşib, mayın 2-dən sonra yoluxma hallarının sayı davamlı olaraq artıb. Onun sözlərinə görə, mayın əvvəlindən yoluxma hallarının sayı yenidən artmağa başlayıb. Bu da məhdudiyyətlərin aradan qaldırılması ilə bağlıdır.
R.Bayramlı qeyd edib ki, hazırda 1 058 aktiv xəstə var. Onların 35-i reanimasiyada müalicə alır: “Ümumilikdə təhlillər göstərir ki, virusa yoluxanların 77,6 faizində simptomlar yüngül müşahidə edilir. Yoluxanların 11-12 faizində vəziyyət orta ağır, 4-5 faizində ağır kimi kimi qiymətləndirilib. Xəstələrin 1,6 faizinin süni tənəffüs cihazlarına ehtiyacı olub”.
R.Bayramlı qeyd edib ki, vəziyyəti ağır olan xəstələrdə müşahidə edilən yanaşı xəstəliklər şəkərli diabet, ürəyin işemik xəstəliyi, ağ ciyər xəstəlikləri və s. olub.
Koronavirusun ikinci dalğasının necə davam edəcəyi sosial məsuliyyətdən asılıdır
“Hazırda koronavirusun ikinci dalğasını yaşamaqdayıq. İkinci dalğanın irəlidə necə davam edəcəyi sosial məsuliyyətdən asılıdır” – deyən R.Bayramlının sözlərinə görə, həftələr üzrə olan göstəricilər bunu deməyə əsas verir ki, qətiyyən rahatlaşmamalıyıq.
Sədr qeyd edib ki, xaricdən idxal edilən yoluxma faizi 7,7-dir. Bakının Yasamal rayonunda yoluxma göstəricisi 17, Nəsimidə 15,8, Sabunçuda 14, Qaradağda 5, digər rayonlarda isə 8 faizdən aşağı olub.
R.Bayramlı əlavə edib ki, virusa yoluxanlar arasında 52-59 yaşlı insanlar üstünlük təşkil edir. Ölkədə 0-9 yaşlılar arasında yoluxma faizi 5 faiz, 80 yaşdan yuxarı 2 faizdir. Qadınlar arasında yoluxma 57 faiz olmaqla daha çoxdur. Kişilər arasında yoluxma göstəricisi 43 faiz təşkil edir.
Azərbaycanda 1 milyon əhaliyə düşən testlərin sayı 22 mindən çoxdur
R.Bayramlı bildirib ki, Azərbaycanda 1 milyon əhaliyə düşən testlərin sayı 22 mindən çoxdur. Onun sözlərinə görə, əhali arasında koronavirusa yoluxma göstərici nə qədər çox olarsa, onun mutasiya uğraması daha çox ola bilər.
TƏBİB sədri bildirib ki, Azərbaycanda 1 milyon əhaliyə düşən testlərin sayı 22 mindən çoxdur: “Təhlillər onu deməyə əsas verir ki, aparılan testlərin sayı yoluxma hallarının aşkarlanması üçün optimaldır. Lakin vətəndaşların qaydalara əməl etməsi testlərin sayından daha önəmlidir".
R.Bayramlı deyib ki, növbəti gündən başlayaraq, yalnız simptomları olan insanlar, onlarla təmasda olanlar, xaricdən gələnlər test ediləcək. Bu məqsədlə gündəlik olaraq 4 minə qədər testin aparılması nəzərdə tutulur.
Koronavirusla müalicə işinə 1000-dən çox tibb işçisi cəlb edilib
Koronavirusla müalicə işinə 1000-dən çox tibb işçisinin cəlb edildiyini deyən R.Bayramlının sözlərinə görə, modul tipli xəstəxanalar fəaliyyətə başladıqdan sonra bu işçilərin sayı 3000-ə çatacaq. R.Bayramlı çarpayı fondunun hazırda kifayət qədər olduğunu söyləyib.
“Bakı Tikiş Evi”ndə 64, “Baku Still Company”də 48 yoluxma faktı...
TƏBİB sədri bildirib ki, koronavirusa lokal yoluxma hallarının əksəriyyəti müəssisələrdə qeydə alınıb. Onun sözlərinə görə, bəzi müəssisələr cağırışlara məhəl qoymayıblar, ona görə də kütləvi yoluxma halları aşkarlanıb. Təkcə “Bakı Tikiş Evi”ndə 64 nəfər yoluxub. Onlar hazırda müalicə edilir. “Baku Still Company”də 48 yeni yoluxma faktı aşkarlanıb.
Daha 13 məhkum koronavirusa yoluxdu
R.Bayramlı Azərbaycanda cəzaçəkmə müəssisələrində koronavirusa yoluxma hallarının davam etdiyini də deyib. Onun sözlərinə görə, daha 13 nəfər məhkum bu virusa yoluxub:“Cəzaçəkmə müəssisələrində 33 məhkumda koronavirus aşkar edilmişdi. Hazırda koronavirusa yoluxan məhkumların sayı 46 nəfərə çatıb. TƏBİB və Penitensiar Xidmətin tibbi briqadalarının birgə səyi ilə həmin xəstələrin müalicəsi davam etdirilir”.
R.Bayramlı bildirib ki, koronavirusla bağlı məhdudiyyətlərin tətbiqi ilə bağlı yenidən qərarlar verilə bilər. Bayram günləri üçün belə məhdudiyyətlərin verilməsini mümkün sayan R.Bayramlının sözlərinə görə, 10-14 gün ərzində olan göstəricilər əsasında növbəti mərhələlərlə bağlı qərarlar veriləcək:“SMS-lə icazə almaq ləğv edilib. Amma bu o demək deyil ki, biz əvvəlki həyatımıza dönməliyik”.
“10-14 gün sonra ortaya çıxacaq göstəricilərə əsasən növbəti mərhələlərlə bağlı qərar veriləcək”.
TƏBİB sədri bildirib ki, SMS-lə evdən çıxmaq ləğv edilsə də, insanlar küçələrə, bulvara və parklara axın etməməlidir. Həmçinin restoran və çay evlərində müvafiq tibbi-metodik göstərişlərə əməl olunmalıdır. O qeyd edib ki, bu qaydalara əməl etməyənlər ciddi şəkildə inzibati və cinayət məsuliyyətinə cəlb olunacaq.
Xaricdən gələnlər arasında 20 faiz yoluxma...
“Ümumilikdə son dövrlər ərzində çarter reysi ilə Azərbaycana gələnlərin analizləri onu göstərir ki, xaricdən gələnlər arasında yoluxma 20 faiz təşkil edir” – deyən TƏBİB sədrinin sözlərinə görə, vətəndaşların xaricdən Azərbaycana gətirilməsi davam edəcək: “Amma onların karantin müəssisələrinə yerləşdirilməsi də davam etdiriləcək. Təhlillər göstərir ki, bu virus uzun müddət bizimlə yaşayacaq, amma biz uzun müddət karantin şəraitində yaşaya bilmərik. Xəstəlik sürətlə yayılır. Xəstəliyi həddindən artıq ağır keçirənlər var. Bu xəstəlikdən qorunmağın yolu asandır və kontrollu sosial həyatdır. Bundan sonrakı devizimiz kontrollu sosial həyat olmalıdır. Bu da tibbi maskalardan istifadə və sosial məsafənin gözlənilməsidir. Bu qaydaların hər ikisinə birlikdə əməl edilməlidir. Nəzərə alaq ki, hər bir yoluxma tibb işçiləri üçün bir yükdür”.
Karantin rejimi ilin sonunadək davam edəcək
“Karantin rejimi ən azı bu ilin sonuna qədər davam edəcək. Ola bilsin, biz tədricən bundan çıxacağıq, ancaq müəyyən qaydalar tətbiq olunmaqda davam edəcək” – deyən R.Bayramlının sözlərinə görə, karantin rejiminin daha tez yumşaldılmasını istəyiriksə, qaydalara əməl etməliyik: "Beynəlxalq təcrübəyə baxsaq görərik ki, ölkələr sərt karantin rejimindən daha çox vətəndaşları bu virusla birgə yaşamağa öyrəşdirirlər. Görülən tədbirlərə baxmayaraq, bu virus bizim aramızda qalmaqda davam edəcək. Ola bilsin, biz tədricən bundan çıxacağıq, ancaq bütün bunlar vətəndaşların sosial məsuliyyətindən asılı olacaq".
Bakı-Naxçıvan reysinin açılması məsələsinə…
TƏBİB sədri bildirib ki, Bakı-Naxçıvan reysinin bərpası ilə bağlı qadağalar qalmaqdadır. Lakin növbəti mərhələdə bu reysin açılması məsələsinə baxıla bilər. Onun sözlərinə görə, sarı zonadan narıncı zonaya gediş-gəliş qadağan edilib:"Naxçıvan və digər bölgələr sarı zona olduğundan, Bakıya gediş-gəliş qadağan edilib. Bakıda iş yeri olan şəxslər buraya gələ bilirlər. Amma Naxçıvanla əlaqə yalnız hava yolu ilə mümkündür. Hələlik aviareyslər bağlı olduğundan bu mümkün deyil. Bu məsələ gündəmdədir. Ola bilsin ki, növbəti mərhələdə bununla bağlı qərar verilsin”.
