“…Ümumiyyətlə, gənclər son illər ərzində ictimai həyatda çox fəal rol oynayırlar. Mən xüsusilə könüllüləri qeyd etmək istərdim. Bu il mənim sərəncamımla “Könüllülər ili” elan edilmişdir. Mən çox şadam ki, qısa müddət ərzində Azərbaycanda çox böyük, çoxminli könüllülər ordusu yaradılıb və könüllülər öz işi, öz əməlləri ilə cəmiyyətdə çox böyük rəğbət qazana biliblər, bizim ümumi işimizə çox böyük töhfə verirlər.
Könüllülər hərəkatı ASAN könüllülərdən başlamışdır. Bu gün ASAN könüllüləri, sözün əsl mənasında, Azərbaycan gəncliyinə xas olan ən gözəl xüsusiyyətləri özlərində birləşdirirlər, o xüsusiyyətləri təcəssüm etdirirlər. Hazırda digər sahələrdə də könüllülər kifayət qədər geniş fəaliyyət göstərirlər. Mən daim onların fəaliyyətini izləyirəm və onların fəaliyyətinə yüksək qiymət verirəm.
Mənim göstərişimlə mərkəzi və yerli icra orqanlarında da könüllülər işə cəlb edilməlidirlər. Siz də icra hakimiyyəti başçısı kimi bu məsələyə diqqət yetirin ki, həm ictimai nəzarət baxımından işlər daha yaxşı getsin, həm ictimai fəallıq artsın və bu gün insanları narahat edən məsələlər öz həllini tapsın. Buna nail olmaq üçün, əlbəttə ki, ilk növbədə, mərkəzi və yerli icra orqanları səmərəli fəaliyyət göstərməlidirlər, eyni zamanda, ictimai nəzarət yüksək səviyyədə olmalıdır. Ona görə sizin təyinatınız həm sizə göstərilən etimaddır, eyni zamanda, gənclərə göstərilən diqqətdir. Bir daha demək istəyirəm ki, siz bu yüksək etimadı öz işinizlə doğrultmalısınız”. Bu fikirləri Prezident İlham Əliyev mayın 13-də Azər Qocayevi Kəlbəcər Rayon İcra Hakimiyyətinin başçısı vəzifəsinə təyin olunması ilə əlaqədar videoformatda qəbul edərkən bildirib.
“…onlar dərhal hərəkətə keçməlidir”
Mərkəzi və yerli icra hakimiyyəti orqanlarının Prezidentin göstərişinə məsuliyyətlə əməl etməli olduğunu deyən Azərbaycan Milli Qeyri-Hökumət Təşkilatları Forumunun (MQF) prezidenti Rauf Zeyni “Bakı-Xəbər”ə bildirdi ki, Prezident İlham Əliyevin sərəncamı ilə 2020-ci il Azərbaycanda “Könüllülər İli” elan edilib. “Bu, ölkə Prezidenti tərəfindən könüllülər hərəkatına, vətəndaş cəmiyyətinə, bütövlükdə, şəffaflıq, aşkarlıq, ictimai nəzarət, monitorinq kimi məsələlərə ciddi dəstək vermək, onların fəaliyyətini yüksək səviyyədə qiymətləndirmək deməkdir. Bildiyiniz kimi, Prezidentin tapşırığına əsasən, mərkəzi və yerli icra hakimiyyəti orqanları könüllülər hərəkatına dəstək verməyə başladılar. Bir sıra nazirliklərdə könüllülər fəaliyyətə başladı, könüllülər birlikləri yarandı. Bu həm də qeyri-hökumət təşkilatları üçün böyük imkanların yaradılması deməkdir.
Mən də belə düşünürəm ki, hansı mərkəzi və yerli icra hakimiyyətlərində könüllülərin fəaliyyəti təmin edilməyib, orada könüllülərin işi passivdir, bu məsələyə diqqət yetirilməyib, onlar dərhal hərəkətə keçməlidir. Mərkəzi və yerli icra hakimiyyətləri könüllüləri cəlb etməli və burada könüllülər hərəkatını gücləndirməlidirlər. Bu qurumlar könüllüləri dəvət edib onları təşkilatlandırmalıdırlar. Eyni zamanda, onlara dəstək verməlidirlər və onları müxtəlif şəhərlərin, rayonların, bütövlükdə, ölkəmizin inkişafına yönəltməlidirlər. Bu çox böyük hərəkatdır. Baxmayaraq ki, pandemiya bizim bir qədər imkanlarımızı məhdudlaşdırır, ancaq yenə də bu ili “Könüllülər ili” kimi xüsusi dəyərləndirməliyik və könüllülərin potensialından daha yüksək səviyyədə istifadə etməliyik. Bu bizə həm də ona görə lazımdır ki, cəmiyyətimiz saflaşsın, güclənsin, kamilləşsin və dövlətimiz də onların timsalında böyük könüllülər ordusu qazansın”.
R.Zeyni, həmçinin, əlavə etdi ki, bu il Ədliyyə Nazirliyində və digər nazirliklərdə, “ASAN xidmət”də könüllülər hərəkatı yaradılıb, o cümlədən də Milli Qeyri-Hökumət Təşkilatları Forumunda “Könüllülər birliyi” fəaliyyətə başlayıb. “Karantin rejimi başa çatdıqdan sonra, təbii ki, onların fəaliyyətini genişləndirəcəyik və fəallaşdıracağıq” - deyə R.Zeyni vurğuladı.
İradə SARIYEVA
