“Azərbaycanda turizm müəssisələrində və hotellərdə tənəffüs xəstəlikləri simptomları olan qonaqlara həkim tərəfindən baxış aparılana qədər otaqlarında qalmalıdırlar və onlara əsas gigiyena qaydaları haqqında tövsiyələr verilməlidir. Rəhbərlik həmin şəxslərin həkim tərəfindən müayinəsini dərhal təmin etməlidir”. Bu məlumatlar Tibbi Ərazi Bölmələrini İdarəetmə Birliyinin (TƏBİB) turizm və otelçilik sektorunda koronavirus (COVID-19) infeksiyasının idarə olunmasına dair hazırladığı metodiki göstərişlərdə əks olunub.
Qeyd olunur ki, hotellərdə və turizm müəssisələrində yoluxma ehtimalı yüksəkdir. Burada qonaqlar müvəqqəti olaraq yaxın məskunlaşma şəraitində yaşayırlar, öz aralarında və işçilərlə sıx qarşılıqlı münasibətdə olurlar. Məhz bu cəhətlər – qonaqların məskunlaşması ilə bağlı onlara göstərilən xidmətlər (yemək, içki, təmizlik, hər hansı bir fəaliyyətin təşkili və s.) və bu müəssisələrə xas olan qarşılıqlı münasibətlər (qonaq-qonaq, qonaq-işçi heyəti və işçi heyətin öz arasında) xüsusi diqqət tələb edir: "Odur ki, müəssisənin hər bir heyət üzvü Ümumdünya Səhiyyə Təşkilatı (ÜST) tərəfindən verilən COVID-19-a qarşı əsas müdafiə tədbirlərinə, (əl gigiyenası, sosial məsafənin saxlanması, gözlərə, burun və ağıza toxunmamaq, tənəffüs gigiyenasına riayət etmək) və xəstəliyə uyğun simptomlar varsa evdə qalaraq, tibbi yardım üçün müraciət etmək kimi tövsiyələrinə xüsusi diqqət yetirməlidir. Qeydiyyat işçiləri COVID-19 barədə kifayət qədər məlumatlandırılmalıdırlar ki, qarşılarında qoyulan tapşırıqları etibarlı şəkildə, təhlükəsiz yerinə yetirsinlər və müəssisə daxilində COVID-19-un yayılmasının qarşısını alsınlar”.
“...restoranlara gəlməmişdən əvvəl rezervasiya tətbiq olunmalıdır”
Pandemiya ilə əlaqədar olaraq turizm sektorunda təhlükəsizlik baxımından görülən işlər barədə məlumat verən turizm sahəsi üzrə ekspert Elçin Rüstəmov qeyd etdi ki, turizm müəssisəsinin hər bir heyət üzvü Ümumdünya Səhiyyə Təşkilatı tərəfindən verilən COVID-19-a qarşı əsas müdafiə tədbirlərinə riayət etməlidir. O cümlədən, hotellərdə də pandemiya ilə bağlı olaraq lazımi tədbirlər görülməlidir: “Əl gigiyenası, sosial məsafənin saxlanması, gözlərə, burun və ağıza toxunmamaq, tənəffüs gigiyenasına riayət edilməlidir. Hoteldə istirahət edən şəxslərdə koronavirus xəstəliyinə uyğun simptomlar varsa, o şəxslərə dərhal lazımi dəstək göstərilməlidir”.
Həmsöhbətimiz onu da əlavə etdi ki, hər yerdə qoruyucu vasitələrdən istifadə, masalar arasındakı məsafələr çoxaldılmalı, adam sayının azaldılması, restoranlara gəlməmişdən əvvəl rezervasiya tətbiq olunmalı, otaq təmizliyi, qeydiyyat masasında və s. gigiyena qaydalarına yenidən baxılmalıdır.
Günel CƏLİLOVA
