Aprelin ortalarında koronavirusa yoluxma dalğası daha yüksəyə qalxmışdı, yoluxma sayı 27 apreldən 3 mayadək yenidən artıb. Trend-in məlumatına görə, bunu İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev Nazirlər Kabineti yanında Operativ Qərargahın mətbuat konfransında deyib.
Onun sözlərinə görə, bu say artımı karantin rejiminin yumşaldılması ilə bağlıdır: “Əvvəl insanlar fərdi qoruyucu vasitələrdən istifadəyə üstünlük verirdilərsə, vətəndaşlar artıq maskalardan istifadə etmir, sosial məsafəni qorumurlar. Əvvəl küçədə 10 nəfərdən 4-5 nəfərində maska görmək olurdusa, son günlərdə 1-2 nəfərdə belə maska görmək çətin olur”.
Z.Əliyev qeyd edib ki, koronavirus pandemiyası başlayandan Azərbaycan dövləti üçün əsas məsələ vətəndaşların təhlükəsizliyinin təmin edilməsi olub: "Son iki ay ərzində ölkə ərazisində karantin tədbirləri tətbiq edilib. Bu rejimin tətbiqi nəticəsində Azərbaycanda virusa yoluxma vəziyyətinə nəzarət edilir. Hazırda ölkədə koronavirusa gündəlik olaraq yoluxma qeydə alınır, aktiv xəstələr xüsusi xəstəxanalarda müalicə edilir".
Sədr əlavə edib ki, ölkə üzrə yoluxmaların müəyyənləşdirilməsi üçün nəzərdə tutulan bütün məntəqələr qısa müddətdə tam avtomatlaşdırılıb: “Bunun nəticəsində artıq bütün nümunələri elektron qaydada müəyyən edə, yoluxma təmaslarını daha tez aşkarlaya bilirik. Bununla da yoluxmanın qarşısını daha yaxşı ala bilirik”.
Z.Əliyev bildirib ki, indiyədək ölkə üzrə ümumi yoluxma sayı 2127 nəfərdir, 1536 nəfər sağalıb. Hazırda aktiv xəstələrin sayı 563 nəfərə çatır.
Bakıda koronavirusa ən çox yoluxma zonaları - Yasamal və Sabunçu…
Z.Əliyev deyib ki, Bakıda koronavirusa ən çox yoluxma halları Yasamal və Sabunçu rayonlarında olub. Onun sözlərinə görə, Yasamalda bir neçə infeksiya ocağı müəyyən edilmişdi: “Bir nəfər çoxlu sayda insanı virusa yoluxdurmuşdu. Artıq həmin vətəndaşlar izolyasiya edilib və onların çoxu sağalıb”.
Sədr qeyd edib ki, Gəncədə də yoluxma sayının artmasının səbəbi müəyyən edilib: “Təəssüflər ki, orada karantin rejiminə bir o qədər də əməl edilmir. Digər tərəfdən, bütün yoluxmalara baxdıqda daha çox yoluxma hallarının ailə üzvləri arasında olduğu aydın görünür. Nəticədə, 1 nəfər 4-5 nəfəri yoluxdurur. Yoluxmalar həm də tibb işçiləri arasında olur ki, bu hallar da Gəncədə müşahidə edilib. Hazırda orada bütün tədbirlər görülür ki, neqativ hallar aradan qalxsın. Şimal bölgəsində Rusiyadan keçən bir neçə nəfərdə testlərin nəticəsi pozitiv çıxıb. Eyni zamanda, cənub bölgəsində də İranla gediş-gəliş olduğu üçün orada yoluxma halları çox olub”.
Z.Əliyev əlavə edib ki, virusa yoluxanların daha çoxu 50-59 yaşlı insanlardır: "Yoluxanların 54 faizi isə qadınlardır. Vəfat edənlər əsasən 60-69 yaşlı insanlardır. Ölənlərin 43 faizini məhz bu yaşda olanlar təşkil edir”.
Dünyada koronavirusla müalicədə tətbiq edilən dərman və tibbi vasitələr Azərbaycanda da istifadə edilir
Hazırda dünyada koronavirusla müalicədə tətbiq edilən bütün dərman və tibbi vasitələrin Azərbaycanda da istifadə edildiyini deyən Z.Əliyevin sözlərinə görə, müalicə işinin təşkili üçün bütün yeniliklərdən istifadə edilir.
Mayın 31-dək karantin rejiminin davam edəcəyini xatırladan Z.Əliyev hazırda yumşaldılma tədbirlərinin tətbiq edildiyini söyləyib: “Dövlət rəhbərliyi də istəməz ki, ölkə davamlı olaraq, karantin rejimində qalsın. Bu, iqtisadi baxımından da müəyyən çətinliklərin yaranmasına səbəb olur. Bu rejimin aradan qaldırılması bizdən asılıdır. Bizim hər birimiz öz məsuliyyətimizi dərk etməliyik. Biz ictimai nəqliyyatda qoruyucu vasitələrdən istifadə edirikmi, evə gəldikdə əllərimizi yuyuruqmu, sosial məsafəni qoruyuruqmu? İlk növbədə bu suallara cavab verməli və onlara əməl etməliyik. Yaşı 65-dən çox olan insanların evdə qalması da məhz onların sağlamlığı üçün atılan tədbirdir”.
Z.Əliyev bildirib ki, koronavirus testinin cavablarının SMS-lə açıqlanması üçün sınaqlar keçirilib. Onun sözlərinə görə, texniki problemləri aradan qaldırmaq üçün sistem yenidən təkmilləşdirilib.
Z.Əliyev SMS sisteminin yaxın zamanda tam tətbiq ediləcəyinə əmin olduğunu deyib.
Koronavirus xəstəsinin müalicəsi üçün bir gündə nə qədər vəsait xərclənir…
Onun sözlərinə görə, Azərbaycanda ən yüngül vəziyyətdə olan xəstələrin müalicəsi üçün bir gündə təqribən 80, ağır vəziyyətdə olan xəstələrin müalicəsi üçün 150 manat xərclənir: “Amma bu rəqəm xəstənin ağırlıq vəziyyətindən asılı olaraq dəyişir. Bu məbləğə həmin xəstənin yemək, tibbi ləvazimat xərcləri, xəstəni müalicə edən həkimlərin məvacibləri və digər məsələlər daxildir".
Pandemiya Azərbaycanda icbari tibbi sığortanın tətbiqinə təsir etdi
“Təəssüflər olsun ki, koronavirus pandemiyası Azərbaycanda icbari tibbi sığortanın tətbiqinə təsir etdi” – deyən Z.Əliyevin sözlərinə görə, layihə kifayət qədər uğurla başlamışdı: “Xəstəxanalarda gündəlik müraciətlərin sayı 1000-i keçmişdi. Təəssüflər olsun ki, koronavirus məsələsi ortaya çıxanda bütün gücləri onunla mübarizəyə sərf etdik. Həm koronavirusla mübarizəni, həm də icbari tibbi sığoratnın tətbiqinin eyni vaxtda davam etməsi mümkün deyildi. Digər mərhələli rayonlar üzrə layihənin tətbiqi 2021-ci ilin yanvarına qədər ertələndi”.
Koronavirus xəstələrinin sayı çoxalarsa, karantin qaydalarının sərtləşdirilməsi təklif ediləcək
Z.Əliyev bildirib ki, əgər Azərbaycanda koronavirus xəstələrinin sayı kifayət qədər çoxalarsa, xəstəxanalarda xəstə yeri olmasa, karantin qaydalarının sərtləşdirilməsi təklifini verəcəyik. Amma bu qərarları Nazirlər Kabineti yanında Operativ Qərargah verir.
Onun sözlərinə görə, indiyədək koronavirusa yoluxan uşaqlarda hər hansı ağırlaşma halı olmayıb: “Astara, Lənkəran, Cəlilabadda zaman-zaman müəyyən infeksiya ocaqları əmələ gəlib. Onlar aşkarlanaraq izolyasiya edilib. Gəncə Azərbaycanın ikinci böyük şəhəridir, oraya giriş-çıxış kifayət qədər çoxdur. İlk yoluxma halları oraya xaricdən gəlib, daha sonra yoluxma davam edib”.
