Nazirlər Kabineti yanında Operativ Qərargahın qərarı ilə Azərbaycan ərazisində xüsusi karantin rejiminin yumşaldılması sui-istifadə hallarına səbəb olub. Məsələ burasındadır ki, bütün mütəxəssislər aprel ayının sonlarından etibarən ölkə ərazisində koronavirusun tamamilə məhv olacağını proqnozlaşdırırdı. Əvvəlki həftələrdə sağalmaların yoluxmaları iki-üç dəfə, bəzən də beşqat üstələməsi proqnozların özünü doğrultduğunu ehtimal etməyə əsas verirdi. Lakin ölkə ərazisində karantin rejiminin yumşaldılması nəticəsində tamamilə yeni bir mənzərə ilə qarşılaşmalı olduq.
Aydın şəkildə görsəndi ki, ölkə vətəndaşları yumşalma prosesindən sui-stifadə edir, karantin rejiminin qüvvədə olan vacib qaydalarına əməl etməkdən yayınırlar. Bunun nəticəsdir ki, respublikada 76 yeni koronavirus infeksiyasına yoluxma faktı qeydə alınıb, 28 nəfər isə müalicə olunaraq sağalıb və evə buraxılıb. Bu rəqəm özü göstərir ki, yoluxma sağalmanı az qala üç dəfəyə yaxın üstələyib.
Bildiyimiz kimi, vətəndaşların xeyli hissəsi karantin rejiminin mövcud qaydalarına əməl etmir, avtobuslarda, mağazalarda, eləcə də digər yerlərdə sosial məsafəni qorumur. Hər yerdə insanlar bir-birinə çox yaxın məsafədə dayanır, avtobuslarda sərnişinlər lap sıx-sıx dayanır. Hətta Masazır qəsəbəsində yaşayan daimi oxucularımızdan biri bizimlə əlaqə saxlayaraq insanların kütləvi olaraq yaxın məsafədə dayandıqlarından şikayət edir. Deyir ki, elə bil qəsəbənin içində yarmarka açılıb və insanlar o yarmarkaya gəliblər. Bu hal şəhərimizin müxtəlif yerlərində, ən çox da ucqar qəsəbələrdə yaşanır. Sözsüz ki, bu təqdirdə də yoluxma sayının artması qaçılmazdır.
Yeri gəlmişkən, artıq Tibbi Ərazi Bölmələrini İdarəetmə Birliyi (TƏBİB) məsələyə münasibət bildirib. TƏBİB-in Xəstəliklərin profilaktikası və kontrolu şöbəsinin müdiri Yaqut Qarayeva Nazirlər Kabineti yanında Operativ Qərargahın brifinqində “Situasiya yenidən pisləşsə, karantin rejimi yenidən sərtləşdirilə bilər”- deyə qeyd edib.
O, insanlara karantin tədbirlərinə əməl etməsi üçün çağırış da edib: “Biz yenidən xalqa müraciət edirik ki, karantin rejiminin daha da yumşaldılmasını istəyirik, sərtləşməsini istəmirik. Bizim üçün önəmli olan insanların sağlamlığıdır. Qaydalara əməl etməklə karantindən çıxmaq olar”.
Y.Qarayeva əlavə edib ki, ölkədə yeni yoluxma halları həm Bakıda, həm də regionlarda müşahidə edilib. Onun sözlərinə görə, yumşaldılma tədbirlərinin tətbiq edildiyi ərazilərdə də yoluxma sayı artarsa, karantin tədbirləri yenidən sərtləşdirilə bilər.
Rauf Zeyni: “Yoluxma artırsa, bu, karantin rejiminin sərtləşdirilməsinə gətirib çıxarır”
Azərbaycan Milli Qeyri-Hökumət Təşkilatları Forumunun (MQF) prezidenti Rauf Zeyni təəssüflə qeyd etdi ki, xüsusi karantin rejiminin yumşaldılması nəticəsində vətəndaşların məsələyə münasibətində bir boşluq yaranıb: “Bəzi vətəndaşlar elə düşündülər ki, yumşaldılma baş veribsə, bu, karantin rejiminin sona çatması deməkdir, maskasız da gəzmək, sosial məsafəni qorumamaq da olar, yoluxma ilə bağlı heç bir problem olmaz. Təbii ki, bu, vətəndaşların pandemiyaya laqeyd yanaşmasıdır və bir çox halda məsuliyyəti dərk etməməkdən irəli gələn məsələdir. Biz bu gün də dərk edib anlamalıyıq ki, karantin rejimini hətta postpandemiya dövründə belə özümüzün həyat tərzinə çevirməliyik. Çünki nə qədər ki, bu ümumbəşəri bəla, epidemiya problemi aradan qaldırılmayıb, biz vətəndaşlar məsuliyyətlə karantin rejimini bir həyat tərzi kimi qəbul edib ona əməl etməliyik. Buna əməl etmədikcə və laqeyd, eyni zamanda, məsuliyyətsiz yanaşdıqca, əlbəttə, yoluxma halları 70 də olacaq, 80 də. Bu çox ciddi məsələdir. Təəssüf ki, insanlar məsuliyyətsiz davranaraq, bu problemin ciddiliyini nəzərə almaq istəmirlər. Fürsətdən istifadə edib demək istəyirəm ki, bizim qeyri-hökumət təşkilatları da, vətəndaş cəmiyyətinin təmsilçiləri də, KİV nümayəndələri də bütün vasitələrdən istifadə edərək, çox geniş maarifləndirmə tədbirləri həyata keçirir, amma görürsünüz ki, yumşalma ilə bağlı qərar verilən kimi bəzi vətəndaşlar bundan sui-istifadə edirlər. Əgər istəyiriksə əvvəlki həyat tərzimiz bərpa olunsun, iş səviyyəsi tam qaydasına düşsün, onda vətəndaşlar yumşaldılma qərarından sui-istifadə etməməlidirlər. Vətəndaş məsuliyyətsizliyi, sözsüz ki, yoluxmanın artmasına, eləcə də əvvəlki sərt karantin rejiminin qayıtmasına gətirib çıxara bilər. Biz bunların hamısından nəticə çıxarmalıyıq. Yoluxma artırsa, bu, karantin rejiminin sərtləşdirilməsinə gətirib çıxarır”.
R.Zeyninin sözlərinə görə, vətəndaşlar bütün qaydalara tam əməl etməli, “evdə qal”, sosial təcrid, eləcə də digər məsələləri əsas götürməlidirlər. “Biz birlikdə güclüyük” çağırışına hər bir vətəndaşın əməl etməli olduğunu deyən R.Zeyni hesab edir ki, biz məsuliyyətimizlə, təmkinimizlə, qərarlara əməl etməyimizlə bu epidemiyaya qalib gələ bilərik.
Əhməd Abbasbəyli: “Vətəndaşlar səbrlə, təmkinlə, məsuliyyətlə qaydalara əməl etməlidirlər ki, vəziyyət daha ciddi həddə çatmasın”
“Cəmiyyətin və Vətəndaş Münasibətlərinin İnkişafı” İctimai Birliyinin sədri, tanınmış sosioloq Əhməd Abbasbəylinin fikrincə də vətəndaşlar karantin rejiminin yumşaldılmasından sui-istifadə etməməlidirlər. Onun sözlərinə görə, insanlar sosial məsafə saxlamaq məsələsində daha ciddi olmalıdırlar. Dövlətin həyata keçirdiyi antivirus tədbirlərinin koronavirusun məhvi ilə nəticələnməsinə ictimaiyyətin qaydalara əməl etməklə cavab verməsinin vacib olduğunu qeyd edən Ə.Abbasbəylinin fikrincə, insanların çoxu bu virusu ciddiyə almaq istəmir: “Karantin rejiminin yumşaldılması ilə əlaqədar olaraq vətəndaşlar bəzi qaydalara əməl etmək istəmirlər. Bu gün avtobuslarda mövcud olan sıxlıq, sosial məsafənin qorunmaması və s. məsələlər ciddi problemlər yaradır. İnsanlar yenə də sosial izolyasiya qaydalarına əməl etməli, sosial məsafəni qorumalıdırlar. Ümumiyyətlə, avtobus sürücüləri özləri artıq sərnişin götürməkdən imtina etməlidirlər. Şirkətlər xəttə daha çox avtobus buraxmalıdırlar ki, marşrut avtobuslarının salonunda sıxlıq yaranmasın. Hesab edirəm ki, vətəndaşlar səbrlə, təmkinlə, məsuliyyətlə qaydalara əməl etməlidirlər ki, vəziyyət daha ciddi həddə çatmasın”.
A.Abbasbəyli, həmçinin, qeyd etdi ki, koronavirusdan qorunma ilə bağlı maarifləndirmə işi aparan mütəxəssislərin bəzən bir-birinə zidd açıqlamalar verməsi insanların çaşqınlığına səbəb olur. “Mən prosesi bütün ölkələr üzrə yaxından izləyirəm, beynəlxalq aidiyyəti qurumların, həmçinin, dünya və Azərbaycan alimlərinin məsələyə yanaşmasını müşahidə edirəm. Bu gün virusdan qorunmağın əsas üsullarından biri kimi maska və əlcəkdən istifadə etmək, əlləri tez-tez spirtləmək, həmçinin də yumaq, sosial məsafə saxlamaq və sair tövsiyə edilir. Amma bəzən görürsən ki, həm dünya alimləri, həm də yerli mütəxəssislər deyirlər ki, spirt, maska, əlcək insanları virusa yoluxmaqdan xilas etmir. Başqa bir alim bunun əksini deyir. Təəssüf ki, bu istiqamətdə maarifçilik işi aparan mütəxəssislərin bəziləri əhaliyə ziddiyyətli məlumatlar verirlər. Bu arzuolunmaz hal da insanlarda çaşqınlıq yaradır. Bütün bunlara baxmayaraq, vətəndaşlarımız dövlətin mövcud qərarlarına əməl etməlidirlər” - deyə Ə.Abbasbəyli vurğuladı.
İradə SARIYEVA
