Xüsusi karantin rejiminin aprelin 27-dən yumşaldılması ilə ölkədə bir çox müxtəlif ticarət və xidmət sahəsinin, o cümlədən, ofislərin və ictimai iaşə müəssisələrinin fəaliyyətinə icazə verilib. Hərçənd ki, Azərbaycanda sağalanların sayında artım olsa da, gündəlik koronavirusa yoluxma halları davam edir. Xüsusilə də Bakı, Sumqayıt, Gəncə və Lənkəran şəhərlərində və Abşeron rayonunda koronavirus ocaqları qalmaqdadır.
Bu baxımdan xüsusi karantin rejimində mərhələli yumşalmanın yenidən sərt tədbirləri aktuallaşdırmaması üçün müəyyən profilaktik tədbirlərin görülməsi vacibdir. Nəticədə bu məqsədlə koronavirus infeksiyasının (COVID-19) profilaktikasına aid metodiki vəsait hazırlanıb. Sənəd ictimai iaşə müəssisələrində çalışan əməkdaşlar və əhalinin sağlamlığının qorunması məqsədilə hazırda COVID-19 infeksiyasına dair aparılan elmi araşdırma faktlarına əsaslanaraq tərtib olunub.
Koronavirusun yayılmasının qarşısını almaq üçün ölkədə müəyyən profilaktik tədbirlər görülür. Əsas məqamlardan biri də ictimai iaşə müəssisələrində müəyyən olunmuş xüsusi qaydalara riayət etməkdir. Ekspertlər hesab edirlər ki, bu qaydalara riayət edilməzsə, koronavirusun ikinci dalğası yaşana bilər.
“…işçi heyət dəyişəkli təmiz iş geyimi ilə təmin olunmalıdır”
Sosioloq Aytəkin Kamranqızı bildirdi ki, ictimai iaşə sahəsində çalışan işçilərin şəxsi gigiyena qaydalarına əməl etməsi vacib amillərdən biridir: “Təlimatda qeyd edildiyi kimi, işçi heyət dəyişəkli təmiz iş geyimi ilə təmin olunmalıdır. Həmçinin, gün ərzində bir çox insanla təmasda olması nəzərə alınaraq, maska, əlcək, dezinfeksiyaedici məhlul və lazımi hallarda digər gigiyenik vasitələrlə də təmin olunmalıdır. Bununla yanaşı, onlar şəxsi gigiyena qaydalarına riayət etməli, işə başlamazdan, qida məhsulları ilə təmasdan öncə, çiy qida məhsulunun emalı, qablaşdırılması və satışa hazırlanmasından, tullantılarla təmasdan, təmizlik işlərindən, sanitar qovşaqdan istifadədən, asqırma və öskürmədən, pulla təmasdan, siqaret çəkdikdən sonra işçilərin əllərini təmiz yuması və ya dezinfeksiyasına nəzarət edilməlidir. İnsanlar reallığı başa düşərək, karantin rejimi qaydalarına riayət etməlidirlər ki, koronavirusun ikinci dalğası bəşəriyyəti cənginə almasın”.
Günel CƏLİLOVA
