Uşaqların koronavirusa yoluxduğu barədə iki ziddiyyətli xəbərə həkimlər necə baxır…
Dünyanın bir sıra ölkələri kimi, Azərbaycanda da karantin və sosial təcrid rejimi tətbiq olunub. "Evdə qal!" çağırışı günün şüarıdır indi. Xəstəliyin yayıldığı ilk ərəfələrdə bu virusun uşaqlara deyil, yalnız böyüklərə təsir etdiyi bildirilirdi. Dünya alimləri iddia edirdilər ki, yeni koronavirus nadir hallarda uşaqlara və yeniyetmələrə yoluxur.
"İzvestiya" nəşri yazır ki, bunu Çinin xəstəliklərin nəzarəti və profilaktikası mərkəzinin təhlili əsasında hazırlanan statistika sübut edir. Mütəxəssislər COVID-19 ilə bağlı 70 mindən çox yoluxma faktını araşdırıblar. Bu məlumatlara görə, on yaşa qədər uşaqların və on yaşdan 19 yaşa qədər yeniyetmələrin yalnız 1 faizi koronavirusa yoluxub.
Nijni Novqorod Dövlət Universitetinin Biologiya və Biotibbi İnstitutunun direktoru Mariya Vedunovanın sözlərinə görə, uşaqlar və yeniyetmələr həqiqətən yeni koronavirusdan daha yaxşı qorunurlar. O, yaşlı insanların risq altında olduğunu vurğulayıb. "İnsanın immun sistemi yaş ötdükcə zəifləyir və infeksiyalara daha həssas olur. Xroniki xəstəliklərin olması çox vaxt fəsadlar yaradır" - deyə, Vedunova bildirib.
Ancaq son bir ayda koronavirusun qurbanları arasında uşaqların da olduğu məlum olub. Təəssüf hissi ilə bildirək ki, ölkəmizdə koronavirusa yoluxanlar arasında uşaqlar var. Açıqlanan rəsmi məlumatlara əsasən, koronavirusa yoluxanlar arasında iki yaşında olan uşaq qeydə alınıb.
Nazirlər Kabineti yanında Operativ Qərargahın keçirdiyi mətbuat konfransında Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri Ramin Bayramlı media nümayəndələrinə açıqlamasında qeyd edib ki, bu gün Azərbaycanda koronavirusa yoluxanlar arasında 2 yaşlı uşaq var.
- “Uşaqlar bu xəstəliyi yüngül və fəsadsız keçirirlər, buna görə də koronavirus nəticəsində həyatını itirənlər arasında... ”
Həkim-pediatr Lalə Əliyeva bildirdi ki, uşaqların bu xəstəliyə yoluxmaması ilə bağlı deyilənlər həqiqəti əks etdirmir: "6 aya qədər uşaqların immun sistemi olmadığı üçün onlarda yoluxma risqi aşağıdır. Ancaq bu, təsdiqlənmiş, qəti qənaət deyil. Böyüklərdə tətbiq etdiyimiz gigiyenik normaları uşaqlar üçün də etməliyik. Valideynlərə tövsiyə edirəm ki, uşaqların doğru qidalanmasına diqqət etsinlər, çünki qidalanma immunitetə təsir edən ən vacib göstəricilərdəndir. Təbii qidalara və bol mayeyə üstünlük verilməlidir".
Həmsöhbətimiz onu da əlavə etdi ki, koronavirus heyvanlardan insanlara keçə bilən viruslardandır. Bu virus insanlara keçdiyi zaman mutasiyaya uğraya və insanlar arasında sürətlə yayıla bilir. Bu infeksiya yaşlılara, sağlamlıq problemi olan, immun sistemi zəif olan insanlara daha tez təsir göstərir: “Adətən, uşaqlar bu xəstəliyi yüngül və fəsadsız keçirirlər. Buna görə də koronavirus nəticəsində həyatını itirənlər arasında uşaqlara, demək olar ki, rast gəlinmir. Koronavirus bir insandan qrip virusuna bənzər şəkildə asqırma və öskürmə nəticəsində hava-damcı yoluyla digər insanın yuxarı tənəffüs yollarına ötürülür. İnfeksiyalaşmış əşyalardan da infeksiya ötürülə bilər. Virusun inkubasiya dövrü orta hesabla 5-11 gün olmaqla 2 həftəyə qədər hesab edilir. Quru öskürək, qızdırma, halsızlıq, boğaz ağrısı, burun axması, əzələ ağrıları, təngənəfəslik, boğulma, ishal, ürəkbulanma, qusma, iştahsızlıq xəstəliyin əsas klinik əlamətləridir”.
Günel CƏLİLOVA
