26/05/2020 20:22
728 x 90

Azərbaycan hətta çətin şəraitlərdə də ünvanlı sosial yardımın çevrəsini genişləndirir – 13 faiz artım, 78 mindən çox ailə...

İlqar Hüseynli: “Hazırkı çətin vaxtda ünvanlı sosial yardımın əhatə dairəsinin genişləndirilməsi müsbət tendensiyadır”

img

Prezident İlham Əliyevin tapşırığına uyğun olaraq, ünvanlı dövlət sosial yardımının əhatə dairəsinin genişləndirilməsi, təyinatın sadələşdirilməsi və aztəminatlı ailələrə əlçatanlığının artırılması üçün işlər davam etdirilir.

Əmək və Əhalinin Sosial Müdafiəsi Nazirliyindən verilən məlumata görə, görülən işlər nəticəsində proqramın əhatə etdiyi ailələrin sayında növbəti artım baş verib. Məlum olub ki, təkcə son 10 gündə ünvanlı dövlət sosial yardımı alan ailələrin sayında 13,2 faiz artım qeydə alınmaqla, bu yardımı alan ailələrin sayı 9 100 vahid artıb. Hazırda 78 130 (330 minədək ailə üzvü) ailə sosial yardım alır. Hər ailəyə düşən yardımın orta məbləği 222 manata çatıb.

Onu da qeyd edək ki, dövlət başçısının 19 mart 2020-ci il tarixli Sərəncamının icrası ilə bağlı Nazirlər Kabinetinin təsdiqlədiyi Tədbirlər Planına uyğun olaraq, xüsusi karantin rejimi müddətində ünvanlı dövlət sosial yardımının təyin olunma müddəti bitən aztəminatlı ailələrə də bu yardımın verilməsi karantin rejimi başa çatdığı tarixdən sonrakı ayın 1-dək uzadılıb.

Görünən odur ki, ən çətin vəziyyətlərdə belə, Azərbaycan ünvanlı sosial yardım alanların əhatə dairəsinin genişləndirilməsinə çalışır. Hansı ki, koronavirus üzündən müəyyən çətinliklər yaranıb. O baxımdan indiki çətin dönəmdə sözügedən artım sosial baxımdan nə deməkdir?

  • “Bu, çoxsaylı aztəminatlı ailənin maddi durumuna müsbət təsir göstərəcək”

Məsələyə münasibət bildirən sosial sahə üzrə ekspert İlqar Hüseynlinin sözlərinə görə, hazırkı çətin vaxtda ünvanlı sosial yardımın əhatə dairəsinin genişləndirilməsi müsbət tendensiyadır: “Koronavirusla əlaqədar sosial problemlərin həlli istiqamətində ən ciddi atılan addımlardan biri vətəndaşların maliyyə təminatının yaxşılaşdırılmasıdır. O cümlədən də birdəfəlik pul yardımlarının edilməsidir. Hər bir ölkənin imkanlarına görə bu yardımlar müxtəlif cür edilir. ABŞ-da, Avropa ölkələrində və digər inkişaf etmiş ölkələrdə bu praktika tətbiq edilir. O baxımdan hesab edirəm ki, indiki ağır dövrdə ünvanlı sosial yardımlar nə qədər çoxsaylı aztəminatlı ailəni əhatə etsə, bu bir o qədər cəmiyyətimiz üçün faydalıdır. Bu mənada istər ünvanlı sosial yardımların sayının artırılması, istərsə də vətəndaşlara aylıq kompensasiya müavinətlərinin verilməsi alqışlanmalıdır. Bu, çoxsaylı aztəminatlı ailənin maddi durumuna müsbət təsir göstərəcək. Hesab edirəm ki, bu imkandan nə qədər çoxsaylı ehtiyacı olan ailə istifadə etsə, bu, bir o qədər sosial baxımdan yaxşıdır. Nəticədə yaranan çətin vəziyyətdən çıxa bilərik”.

Vidadi ORDAHALLI

Son xəbərlər