Azərbaycanda COVID-19-a yoluxma hallarının genişlənməməsi, başqa ölkələrdəki kimi, ölkəmizdə də daha çox insanın bu virusun qurbanına çevrilməməsi üçün dövlət tərəfindən karantin rejimi elan edildi.
Onu da qeyd edək ki, karantin rejiminin elan edilməsi nəticəsində insanların evdən çölə çıxması məhdudlaşdırıldı, onların qarşısına yalnız zərurət olduğu halda bayıra çıxmaq tələbi qoyuldu.
Koronavirusla mübarizə dövründə bəzi təxribatçı fikirlərin, şayiələrin də şahidi oluruq. Son günlər sosial şəbəkələrdə, eləcə də bəzi əldəqayırma saytlarda karantin dövründə ölkəmizdə ərzaq qıtlığı yaranacağı ilə bağlı şayiələr yayılır. Heç şübhəsiz ki, sosial şəbəkələrdə yayılan bu həqiqətə uyğun olmayan məlumatlara sadə vətəndaşlar arasında inananlar da tapılır. Şayiələrə uyan vətəndaşlarımız mümkün qədər daha çox ərzaq tədarükü görməyə çalışırlar.
Bildiyimiz kimi, bu gün ölkəmizin heç bir iri, yaxud xırda mağazasında, supermarketlərdə ərzaq qıtlığı yaşanmır və həmişəki qaydada çeşidli ərzaq növləri təqdim olunur. Hazırda ölkəmizdə nə qida ilə bağlı hər hansı bir qıtılıq yaşanır, nə də bununla bağlı hər hansı bir proqnoz verilir. Azərbaycan dövləti, əlaqədar qurumlar dəfələrlə qeyd ediblər ki, ölkəmizdə heç bir ərzaq qıtlığı yaşanmır və bizdə belə bir problem yoxdur.
“Bu şayiələri yaymaq heç bir halda düzgün deyil və bu qəbulolunmazdır”
Karantin rejimi ilə əlaqədar ölkəmizdə ərzaq qıtlığı yaranacağı, yaxud yarandığı barədə şayiə yayan qüvvələrin bununla öz istəyinə çatmayacağını deyən “Novoye vremya” qəzetinin baş redaktoru Şakir Ağayev “Bakı-Xəbər”ə bildirdi ki, Azərbaycanı istəməyən qüvvələr hər zaman belə təxribatlarla məşğul olublar: “Karantin rejimi vətəndaşlarımızın dünyəvi bəla olan koronavirusdan qorunmasına xidmət edir. Bu rejimə çox ciddi riayət olunmalıdır. Bu iş yalnız dövlətin qoyduğu qayda-qanunlarla həll olunmur, gərək insanların özlərində də məsuliyyət olsun ki, qaydalara əməl etsinlər, nə qədər biz bu qaydalara əməl etsək, bir o qədər bu virusdan tez xilas olarıq. Qaldı ərzaq qıtlığı ilə bağlı qəsdən yayılan şayiələrə, bəzi insanları heç başa düşmürəm, bu əsassız məsələləri niyə yazırlar? Bu gün koronavirus xofundan, təlaşından sui-istifadə edərək müxtəlif şayiələr yayanların hansı məqsədə qulluq etdiyi məlumdur. Mən özüm bazara da, supermarketə də gedirəm, amma heç bir yerdə ərzaq qıtlığına rast gəlməmişəm. Əksinə, kənd təsərrüfatı məhsulları da mağazalarda, bazarlarda boldur. Mövsüm meyvə və tərəvəzlərindən xiyarın, pomidorun, çiyələyin qiyməti hələ bir qədər də ucuzlaşıb. Ona görə ki, hazırda restoranlar, kafelər, şadlq evləri işləmir, sərhədlər də bağlıdır, ölkə daxilində yetişdirilən məhsullar bütün aidiyyəti satış yerlərinə verilir və alıcıları da çoxdur. Azərbaycan bazarında heç bir ərzaq qıtlığı yoxdur, görünmür və hiss olunmur. Bu şayiələri yaymaq heç bir halda düzgün deyil və bu qəbulolunmazdır. Biz hazırda bəşəri bir düşmənlə - cinsiyyəti, dadı, iyi məlum olmayan koronavirusla mübarizə apardığımız bir vaxtda, təbii ki, belə şayiələri yazmaq, yaymaq düzgün deyil”.
Ş.Ağayev qeyd etdi ki, bu gün Azərbaycanda ərzaq qıtlığına hələ rast gəlinməyib, indən sonra da rast gəlinməsi qətiyyən gözlənilmir. “Nazirlər Kabinetindən də bildirildi ki, ölkədə hələ üçaylıq ərzaq ehtiyatı var. Ümumiyyətlə, hesab edirəm ki, Azərbaycanda heç vaxt ərzaq qıtlığı baş verməyəcək. Bu şayiələri yaymaq düzgün deyil və onları qəbul etmirəm. Görülən işləri tənqid etmək də olar, nələrləsə razılaşmamaq da olar. Bəzi çatışmazlıqlar da ola bilər. Çünki ilk haldır ki, bu bəla nəticəsində bütün dünya təcrid olunub. Amma dövlətin imkanları daxilində görülən işlərə obyektiv qiymət vermək lazımdır. Ərzaq qıtlığı ilə bağlı hər hansı bir panika yaratmağa ehtiyac yoxdur. Şükür Allaha, heç bir ərzaq qıtlığı yoxdur, vətəndaşlar da ərzaqla tam təmin olunurlar. Koronavirus bəlasından tez qurtaraq, insanlar işləsinlər, pulları olsun ki, ərzaqları ala bisinlər” - deyə Ş.Ağayev vurğuladı.
Qeyd edək ki, Nazirlər Kabineti yanında Operativ Qərargahın keçirdiyi mətbuat konfransında qurumun Mətbuat Xidmətinin rəhbəri İbrahim Məmmədov bu məsələyə aydınlıq gətirib: “Bu gün bizim üçaylıq ərzaq ehtiyatımız var. Altıaylıq müddətə də özümüzü sığortalamışıq”.
Onun sözlərinə görə, ərzaqla bağlı problem olmayacaq: “Hazırlanan Tədbirlər Planına əsasən, iqtisadi itkilərin minimallaşdırılacağı gözlənilir ki, bu da ərzaqla təminatımızın zəmanətlərindəndir”.
İradə SARIYEVA
