Karantin rejimi nəticəsində insanların evdən çıxmasına qoyulan məhdudiyyətlər, həmçinin, onların hansısa bir sənədləşmə problemini həll etmək üçün aidiyyəti qurumlara getməsinə də şamil edilib. Vətəndaşların sosial problemlərinin həll edilməsi üçün dövlət tərəfindən xüsusi tədbirlər həyata keçirilir. Bu gün vətəndaş bir sıra sosial problemlərin aradan qaldırılmasına evdən çıxmadan, onlayn xidmətdən istifadə edərək nail olur.
Koronavirus təhlükəsinin lokallaşdırılması və bu virusun daha geniş miqyasda yayılmasının qarşısının alınması üçün dövlətin tətbiq etdiyi karantin rejimində belə vətəndaşın problemləri həll edilir.
Məlum olduğu kimi, Ədliyyə Nazirliyi tərəfindən əhaliyə məsafədən göstərilən xidmətlərin genişləndirilməsi üzrə tədbirlər davam etdirilir.
Nazirlikdən baki-xeber.com-a bildirilib ki, bu məqsədlə müasir innovativ metodlardan istifadə olunmaqla yaradılmış "Mobil notariat" proqram təminatı vasitəsilə vətəndaşlara notariat ofisinə müraciət etmədən nəqliyyat vasitələrinin idarə olunmasına dair, həmçinin, vəkillərə verilən etibarnamələrin mobil telefonlar vasitəsilə elektron qaydada rəsmiləşdirilməsi imkanı yaradılıb. Artıq elektron qaydada rəsmiləşdirilən etibarnamələrin sayı minlərlə ölçülür.
Tətbiq edilən yeni xidmət vasitəsilə "Əhalinin sağlamlığının qorunması haqqında" Azərbaycan Respublikasının Qanununa əsasən, pulsuz və ya güzəştli dərman yardımı almaq hüququ olan vətəndaşlara Səhiyyə Nazirliyi ilə əməkdaşlıqda həftənin bütün günü 24 saat ərzində həmin dərmanları əldə etmək üçün evlərini tərk etmədən dövlətin sosial proqramından yararlanmaq məqsədilə digər şəxslərə real vaxt rejimində elektron etibarnamə vermək imkanı yaradılıb.
Sosial etibarnamənin elektron qaydada verilməsi imkanının yaradılması karantin rejimi dövründə sağlamlığının qorunması üçün evlərini tərk etməyə məhdudiyyət qoyulan, bu xidmətlərin əsas istifadəçisi, yaşı 65-dən yuxarı olan vətəndaşlar üçün xüsusi əhəmiyyət kəsb edir.
07.04.2020-ci il tarixdən istifadəyə verilən və 100 mindən çox insanın faydalanacağı "Sosial etibarnamə"dən vətəndaşlar “AppStore” və “PlayStore” platformasından pulsuz "Mobil notariat" tətbiqini yükləyərək, habelə artıq istifadəçi olanlar isə proqramı yeniləməklə yararlana bilərlər.
Qeyd olunmalıdır ki, xüsusi karantin rejimində olan vətəndaşlarımızın durumuna həssas yanaşılaraq xidmət pulsuz göstəriləcək.
Adəm Məmmədov: “...bu vasitədən 100 mindən çox insanın faydalana biləcəyi çox müsbət haldır”
“Sosial etibarnamə”dən 100 mindən çox insanın faydalanacağını yüksək qiymətləndirən tanınmış vəkil, hüquqşünas Adəm Məmmədov bizimlə söhbətində bilidirdi ki, karantin rejimi dövründə insanların sosial xidmətlərlə təmin edilməsinin diqqət mərkəzində saxlanılması vətəndaşlarımıza verilən dövlət dəstəyinin nümunəsidir.
O qeyd etdi ki, etibarnamələrin elektron qaydada alınması bir neçə ay bundan əvvəl də olub, amma ondan istifadəyə indiki kimi zərurət olmayıb: “Karantin rejimi ilə əlaqədar olaraq həyata keçirilən sosial izoloyasiya zamanı vətəndaşların evdən bayıra çıxması, eləcə də hansısa qurumların ofisinə gedib problemlərini həll etməsi çətin məsələdir. Ona görə də dövlət tərəfindən vətəndaş məmnunluğunun, onların rahatlığının təmin olunması üçün xüsusi sosial proqramlar, tətbiqlər işlənib hazırlanır və vətəndaşın istifadəsinə verilir. Karantin rejimi dövründə “Sosial etibarnamə”nin gündəmə gətirilməsi, ondan istifadə üçün vətəndaşlara şərait yaradılması, bu vasitədən 100 mindən çox insanın faydalana biləcəyi çox müsbət haldır. Bu gün elə hallar olur ki, vətəndaşın, xüsusən də yaşlı nəslin etibarnamə verməsinə zərurət yaranır. İndi etibarnamə vermək üçün vətəndaşlar çətinlik çəkməyəcəklər və “Sosial etibarnamə” proqramı vasitəsilə buna nail olacaqlar. Əvvəllər də bu proqram vardı, lakin indiki kimi aktual deyildi. Amma karantin rejimi “Sosial etibarnamə”ni aktuallaşdırdı”.
A.Məmmədov hesab edir ki, karantin rejiminin tələblərinə uyğun onlayn xidmətin dirçəldilməsi və tətbiqi insanlarda çox müsbət vərdişlər yaradacaq, onlar həyatlarının sonrakı vaxtlarında da bundan istifadə edəcəklər.
Əziz Qəmbərov: “Xüsusən də “Sosial etibarnamə”nin karantin rejimi dövründə gerçəkləşdirilməsinin əhəmiyyəti böyükdür”
Digər tanınmış vəkil, hüquqşünas Əziz Qəmbərov da hesab edir ki, “Sosial etibarnamə”nin reallaşdırılması vətəndaşlarımızın rahatlığına xidmət edir: “Hesab edirəm ki, bu olduqca yaxşı bir layihədir. Belə bir xidmətin gerçəkləşdirilməsi həm insanların vaxtına qənaət olunmasına, həm də notariuslarda saatlarla növbəyə durmalarının, eləcə də bəzi neqativ halların qarşısının alınması baxımından çox əhəmiyyətlidir. Xüsusən də “Sosial etibarnamə”nin karantin rejimi dövründə gerçəkləşdirilməsinin, ondan on minlərlə insanın faydalanmasının əhəmiyyəti böyükdür. İnsanlar evdən çıxmadan həmin proqramı telefonlarına yükləməklə asanlıqla etibarnamə problemini həll edəcəklər”.
Ə.Qəmbərov hesab edir ki, “Sosial etibarnamə”nin vətəndaşlar üçün indiki şəraitdə faydası çoxdur və bu da vətəndaş məmnunluğuna xidmət edir. Dövlətin karantin rejimi dövründə vətəndaların sosial problemlərinin həlli üçün həyata keçirdiyi çoxsaylı işdən birinin də məhz “Sosial etibarnamə” layihəsi olduğunu qeyd edən hüquqşünasın sözlərinə görə, vətəndaşlar elektron qaydada onlara verilən etibarnamədən sui-istifadə etməməlidirlər. Belə hal baş verərsə, bunun cinayət əməli olduğunu deyən Ə.Qəmbərov hesab edir ki, bu ağır günlərdə bütün vətəndaşlar dövlətlə, əlaqədar qurumlarla həmrəylik nümayiş etdirməlidirlər.
İradə SARIYEVA
