Koronavirus pandemiyasının yayılması ilə bağlı Azərbaycanda vəziyyət qənaətbəxş deyil. Son məlumata görə, indiyədək 53 min 11 nəfər testdən keçirilib. Hazırda reanimasiyada olan xəstə sayı 8, süni tənəffüs cihazına qoşulan xəstə sayı 2 nəfərdir. Qeyd edək ki, Azərbaycanda koronavirusa yoluxanların sayı 822, virusdan ölənlər 8, sağalan xəstə sayı 63, aktiv xəstələrin sayı isə 751 nəfərə çatıb. Verilən rəsmi açıqlamalardan belə məlum olur ki, vətəndaşlarımız heç də karatin rejiminə tam şəkildə əməl etmirlər. Azərbaycan Respublikası Nazirlər Kabineti yanında Operativ Qərargahın keçirdiyi son brifinqdə TƏBİB-in İdarə Heyətinin sədri Ramin Bayramlı deyib ki, hələ də karantin rejiminə əməl etməyib virusu yayan vətəndaşlarımız var. O qeyd edib ki, vətəndaşlar karantin rejiminə əməl etməsələr, hökumət qarşısında daha sərt rejimin yaradılması məsələsi qaldırılacaq.
TƏBİB sədri bildirib ki, nə qədər çox şəxsə vaxtında dəqiq diaqnoz qoyulsa, bir o qədər xəstəliyə yoluxanların sayında azalma əldə etmək mümkün olar:“Testlərlə bağlı xüsusi logistika proqramı hazırlanıb. Təcili yardım briqadaları daim hazır vəziyyətdə olurlar. Ölkə üzrə 22 tibb müəssisəsi karantin üçün ayrılıb. Xaricdə də müşahidə edirik ki, süni nəfəs aparatına qoşulan şəxslərin həyatını çox vaxt xilas etmək olmur. Belə halların bizdə baş verməməsi üçün israrla vətəndaşları karantin qaydalarına əməl etməyə çağırıram. Təəssüf ki, bəzən qaydaları pozanlar arasında savadlı şəxslər də olur. Əgər vətəndaşlar qaydalara əməl etsələr, yoluxmanın sürəti azalar, sağalanların isə sayı artar”.
Nazirlər Kabinetinin mətbuat xidmətinin rəhbəri İbrahim Məmmədov da son açıqlamasında bildirib ki, ölkəmizdə karantin rejiminin müddəti uzadıla, hətta qaydalar sərtləşdirilə bilər:
“Statistika göstərir ki, əksər vətəndaşlar karantin rejiminin qaydalarına əməl etmirlər. Əgər yoluxanların sayı artsa və vətəndaşlar qaydalara əməl etməsələr, karantin rejiminin müddəti uzadıla, hətta qaydalar sərtləşdirilə bilər. Təəssüf ki, bəzən qaydaları pozanlar arasında savadlı şəxslər də olur. Əgər vətəndaşlar qaydalara əməl etsələr, yoluxmanın sürəti azalar, sağalanların isə sayı artar". Göründüyü kimi, hər iki qurum karantin qaydalarının sərtləşməsini məqbul sayır. Proseslərin bu gedişi nə vəd edir?
Elşən Həsənov:“Karantinə görə verilən müavinətlər tələb olunursa, vətəndaşların borcudur ki, qaydalara, qadağalara da əməl etsinlər”
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, Sanitariya-epidemioloji sağlamlıq haqqında Qanununun 25-ci maddəsinə əsasən, Azərbaycan Respublikasında 24 mart 2020-ci il saat 00:00-dan etibarən 20 aprel saat 00:00-dək xüsusi karantin rejimi elan edilib:“Amma buna baxmayaraq, vətəndaşlar qadağaları heçə sayaraq, istədikləri yerə sərbəst şəkildə gedib-gəlirlər. Hətta o dərəcədə ki, marşrut xətlərində iş günlərində olduğu kimi sıxlıq müşahidə edilir. Biz karantinə əməl edilməməsini açıqlanan rəsmi rəqəmlərdə də müşahidə edirik. Hər gün açıqlanan rəqəmlərdən görünür ki, yoluxma sayında artan dinamika var. Hökumət əlindən gələni edir ki, problem həllini tapsın. Ancaq vətəndaşlarımız bəzən bu cür tədbirləri lağa qoyan, buna ironik yanaşan paylaşımlar edirlər. Hətta karantinə itaətsizliyi təşviq edən paylaşımlara da rast gəlirik. Biz nəyi müşahidə edirik? Vətəndaşlar haqlı olaraq dövlətdən almalı olduqları müavinətləri, yardımları tələb edirlər. Qoy etsinlər. Hamı haqqını tələb edə bilər. Amma bununla karantin rejiminə riayət etmək arasında bir uyğunsuzluq görürəm. Əgər karantinə görə verilən müavinətlər tələb olunursa, vətəndaşların borcudur ki, qaydalara, qadağalara da əməl etsinlər. Artıq görürük ki, hokumət karantin vaxtını uzada və daha sərt tədbirlər tətbiq etmək zorunda qala bilər. Çünki başqa yol yoxdur. Hansısa məsuliyyətsiz adamlara görə epidemiyanın geniş yayılmasına imkan verə bilmərik. Karantinə əməl etməyən və bizə “örnək” kimi göstərilən bəzi ölkələr artıq ÜST-dən yardım istəyir. Bu da belə bir nəticəni hasil edir ki, pandemiya ilə zarafat etmək olmaz”.
Məhəmmədəli QƏRİBLİ
