Koronavirus pandemiyasının dünyada geniş vüsət alması müəyyən şarlatanların, qara qüvvələrin, insanlarda xof yaradan şəxslərin meydana çıxmasına səbəb olub. Son günlər sosial şəbəkələrdə “Qiyamət günü”nün yaxınlaşdığını (?) əks etdirən video-audio materialları yayılır. Bu azmış kimi, sözügedən videolar şəxsi mesaj qutularına da atılır.
Bu videolarda qeyd edilir ki, guya pandemiyanın bütün dünyanı ağzına alması “Qiyamət günü”nün əlamətidir və tezliklə bütün bəşəriyyət məhv olacaq. “Dünyanın sonu” gəldiyini iddia etmək, bununla bağlı video-audio materillar hazırlamaq, o materialları böyük həvəslə sosial şəbəkələrdə yaymaq, “Facebook”, “WhatsAppp” vasitəsilə daha çox insana çatdırmaq istəyi, birmənalı olaraq, xof yaratmağa, insanlarda neqativ əhval, qorxu ovqatı formalaşdırmağa xidmət edir.
“Qiyamət günü yaxınlaşır” iddiasını ortaya atanların nəyə əsaslanıb bu fikirləri bildirdiyini bilmirik, amma reallıq göstərir ki, deyilənlər cəfəngiyyatdan başqa bir şey deyil. Bu məzmunda video yayanların bir məqsədi var: psixoloji cəhətdən zəif olan insanları qorxutmaq, onlarda xof, təlaş yaratmaqdır.
Məlumdur ki, indiyə qədər bəşəriyyət saysız xəstəliyə yoluxmalarla sınağa çəkilib. Bu xəstəliklər kütləvi insan tələfatına səbəb olsa da, dünyanın sonunu gətirməyib, dünya insanı xəstəliklərə qalib gələrək yoluna davam edib.
Bu neqativ videoları yayanlar kimlərdir və onlar nəyə əsasən “Qiyamət günü yaxınlaşır”, “Qiyamət günüdür” iddiasını irəli sürürlər?
Qeyd edək ki, Qiyamət - "Diriliş günü ( Din günü, Hökm günü) monoteist və ya təktanrılı dinlərdə və bir çox inancda olan, dünyanın sonunun gəlib bütün ölülərin dirilərək məşhər meydanında toplanacağına inanılan zaman, hesab günü, məşhər günü kimi xarakterizə edilir. Hətta müqəddəs Qurani-Kərimdə də onun əlamətləri qeyd edilib, amma onun zamanı bildirilməyib. Bu öz yerində. Amma söhbət insanlarda qorxu yaradan qüvvələrin naqis əməllərindən gedir.
- Qiymət Məhərrəmli: “Bu gün koronavirus pandemiyasını “Qiyamət günü” əlaməti kimi təqdim etməyin özü absurddur”
Filologiya üzrə fəlsəfə doktoru Qiymət Məhərrəmli hesab edir ki, bu, hansısa qüvvələrin məqsədlərinə qulluq edən bir iddiadır. “Qiyamət günü”nün yaxınlaşdığını deməyin özünün insanlarda böyük təlaş, qorxu yaratdığını deyən Q.Məhərrəmli bu əsassız videoların insanlara mənfi təsir göstərdiyini qeyd etdi. “Biz “Qiyamət günü”nün nə zaman baş verəcəyi haqqında heç nə deyə bilmərik. Amma bu gün kimlərinsə meydana çıxıb “Qiyamət günü”nün gəldiyini, yaxud yaxın vaxtlarda gələcəyini iddia etməsi absurddur. Bir qrup insan pandemiya ilə əlaqədar olaraq meydana çıxır və “Qiyamət günü yetişib” (?) deyə haray çəkir, videolar, audiomateriallar yayır. İnsanları təlaşa, qorxuya salmağın özü böyük mənəvi cinayətdir. Bilirsiniz ki, bəşər tarixində saysız növdə infeksiya, xəstəliklər baş verib, bəlkə onlar arasında yeni növ koronavirus pandemiyasından da dəhşətli xəstəliklər olub, amma o epidemiyaların, infeksiyaların heç biri bəşəriyyətin sonunu gətirməyib, bəşəriyyət yoluna davam edib. Hesab edirəm ki, COVID-19 virusu da bəşəriyyəti məhv edə bilməz. Çünki ölkələrdə tədbirlər görülür, vaksin axtarılır, insanlar, dövlətlər bu virusa qarşı müqavimət göstərirlər. Bu gün koronavirus pandemiyasını “Qiyamət günü” əlaməti kimi təqdim etməyin özü absurddur” - deyə Q.Məhərrəmli bildirdi.
- Hacı Təyyar Hüseynli: “Din xadimləri sosial şəbəkələrdə yayılan bu təxribatların, bu platformada dini mövzuda yayılan yanlış, lakin panika yaradan, insanlara psixoloji yük olan, onlara stress yaşadan informasiyaların qarşısını almalı, maarifləndirici informasiyalar yaymalıdırlar”
Tanınmış ilahiyyatçı Hacı Təyyar Hüseynlinin fikrincə də hazırda dünyada pandemiya elan edilən koronavirus zaman-zaman səbəbli və müəmmalı şəraitdə meydana gəlib, müəyyən sayda insan itkisi ilə sona yetib: “Etiraf edək ki, insanların pandemiyadan kütləvi həlak olması insanlar arasında panika yaradıb. Mən bunu onunla əlaqələndirmək istəyirəm ki, dünyada olan bütün insanlar yaşamaq, xoşbəxt olmaq istəyirlər. İnsanların sağlamlığına yönələn iyrənc iqtisadi-siyasi oyunlar nəticəsində çıxılmaz vəziyyətə düşürlər. Bununla da onlar müəyyən qüvvələrə yönəlirlər. Bu, bəzi insanların savadsız, maarifsiz olması ilə bağlıdır. Deyirlər bir cahil quyuya daş atdı, yüz aqil, ağıllı çıxara bilmədi. Yəni insanlarda bu xofun yaranma səbəblərinin ilkin əsasları var. Bu, cəhalətdən irəli gəlmir, bu, reallığın gətirdiyi rəzalətdən irəli gəlir. Digər tərəfdən, “Qiyamət günü” barədə müqəddəs Qurani-Kərimdə verilən proqnozlar çox ciddi, həddindən artıq mürəkkəbdir. Orada əks olunanlar sırf tərcüməsindən başa düşülən informasiyalar deyil. Vaxtilə 25 il praqmatik, sistemli dini təhsil alırdılar. İndi 25 ay, 25 gün, bilmirəm, bəlkə də 25 dəqiqəlik hardansa, kimsə Qurani-Kərimdə Qiyamətlə bağlı olanları oxuyub. Hətta bilinmir ki, Quranda bu deyilənlər “Qiyamət günü” ilə bağlıdır, yoxsa başqa bir məsələ ilə. “Qiyamət günü” ilə bağlı hətta bilənlərin belə qətiyyətlə, cürətli fikir bildirməyə haqqı yoxdur ki, götürüb onu mövcud proseslərlə əlaqələndirsin.
Tutalım, hava proqnozu verirlər. Deyək ki, müəyyən məsələlərlə əlaqələndirib hava şəraitinin necə olacağını deyirlər. Bu, kainatda baş verən elmi insanlara izn verildiyi qədər öyrənə biləcəkləridir. Amma kainatın və ilahi yaradılışın nizamında baş verə biləcəklərin müəyyən bir az faizi haqqında dəqiq məlumat əldə etmək olar. Hətta bu barədə Quranda da var ki, sizə qədərindən artıq öyrənməyə izn vermədik. Bu belə. Qaldı ki, indiki şəraitdə sosial şəbəkələrdə yayılan məlumatlar sadaladığım səbəblərdəndir. Bilirsiniz, belə məsələlərdə söz sahibi olan və qətiyyətli fikir bildirməyi bacaran din xadimləri meydanda olmalıdırlar. Din xadimləri sosial şəbəkələrdə yayılan bu təxribatların, bu platformada dini mövzuda yayılan yanlış, lakin panika yaradan, insanlara psixoloji yük olan, onlara stress yaşadan informasiyaların qarşısını almalı, maarifləndirici informasiyalar yaymalıdırlar. Bir ilahiyyatçı kimi ədalətli olmaq mənim həyat prinsipimdir. Ədalətli olmaq yalnız din xadiminə, jurnalistə, ədliyyə işçilərinə deyil, bütün sahələrdə təmsil olunan, rəhbərdən rəiyyətə qədər hər kəsə lazımdır. Ədalətin içində də ədalətli danışmaq var. Bu mövzuda ədalətlə danışsaq deyərdim ki, birinci, bizim əqidəmizdə bəşəriyyətin ədalətlə dolacağı bir böyük zaman var. Sabah mövludu olan, gözlərə görünməyən bir imamın Yer planetini ədalətlə dolduracağı ilə bağlı bir prinsip var”.
O qeyd etdi ki, mütləq bəşəriyyətdə, ədalətsiz dünyada ilahi ədalət bərqərar olacaq, gözlərə görünməyən, adı Peyğəmbərimizin adına uyğun olan on ikinci imam Mehdi Sahibi Zaman Qiyamətə bir gün qalmış olsa belə kainata gələcək və bəşəriyyəti ədalətlə dolduracaq. H.T.Hüseynlinin sözlərinə görə, koronavirus epidemiyası da sıradan çıxıb gedəcək. “Hər birimiz Azərbaycan xalqına, dövlətinə səmimi, sədaqətli və ədalətli xidmət etməliyik” - deyə ilahiyyatçı bildirdi.
İradə SARIYEVA
