“Yoluxmaların artması icazə rejimi tətbiq olunmamışdan əvvəl karantin qaydalarına əməl edilməməsinin nəticəsidir”
Hazırda Azərbaycanda koronavirusa yoluxan xəstələrin ümumi sayı 822 nəfərdir. Ümumi sağalmaların sayı 63, ölüm hallarının sayı 8-dir. Trend-in məlumatına görə, bunu Nazirlər Kabineti yanında Operativ Qərargahın mətbuat konfransında qərargahın üzvü, Tibbi Ərazi Bölmələrini İdarəetmə Birliyinin (TƏBİB) sədri Ramin Bayramlı deyib deyib.
Onun sözlərinə görə, hazırda aktiv xəstələrin sayı 750 nəfərdir.
R.Bayramlı qeyd edib ki, yoluxma hallarının artması icazə rejimi tətbiq olunmamışdan əvvəl karantin qaydalarına əməl edilməməsinin nəticəsidir.
“Əgər vətəndaşlar bu günlərdə karantin qaydalarına əməl etməsələr, biz daha sərt tədbirlərin görülməsi üçün ölkə rəhbərliyinə və Nazirlər Kabineti yanında Operativ Qərargaha müraciət etmək məcburiyyətində qalacağıq” deyən Ramin Bayramlının sözlərinə görə, əgər vətəndaşlar 2-3 həftə səbr etsələr, yoluxma zəncirini qıraraq öz normal həyatlarına dönə biləcəklər: “Bəzən vətəndaşlarımız karantin rejiminə tam əməl etmirlər, onun ciddiliyini anlamırlar. Amma başa düşmək lazımdır ki, karantin qaydalarına əməl edilməsə, süni tənəffüs aparatlarına qoşulan insanların sayı artacaq və onda bizi daha acı nəticələr gözləyir. Çünki bu halda ölüm halları çoxalır”.
R.Bayramlı əlavə edib ki, hazırda koronavirusla bağlı fəaliyyət istiqamətlərini həm müalicə və diaqnostika istiqamətində, həm də profilaktika istiqamətində davam etdirirlər.
R.Bayramlı vurğulayıb ki, laboratoriyaların sayı 15-ə yaxınlaşır: "Gələn həftə Şəkidə və Sumqayıtda laboratoriyalar açılacaq. Hazırda 3000-ə qədər test edirik. Yaxın gələcəkdə testlərin sayını 5000-ə çatdıracağıq. Testlərlə bağlı da xüsusi logistika planları da hazırlanıb. Çağırışlar olan kimi evlərə gedilir, xəstələrdən analizlər götürülür. Onlara müayinə nəticələri məlum olana kimi evdə karantində qalmaq tapşırılır. Pandemiya ilə mübarizəyə ayrılan müəssisələr yalnız koronaviruslu xəstələrin müalicəsi ilə məşğul olduğu üçün digər müəssiələrin də üzərinə məsuliyyət düşür”.
R.Bayramlı qeyd edib ki, bu gün 3000-dən artıq müayinə aparılıb və 105 xəstə aşkarlanıb.
