05/06/2020 06:25
728 x 90

Fərdi sahibkarlar üçün DSMF ödənişləri necə sadələşdiriləcək – Koronavirusla mübarizənin daha bir mütərəqqi sosial təzahürü...

Firdovsi Şahbazov: “Vəziyyətlə əlaqədar regionlar üzrə sığorta ödənişinin məbləği aşağı salınacaq”

img

Əmək və Əhalinin Sosial Müdafiəsi naziri Sahil Babayev bildirib ki, müxtəlif fərdi sahibkarların Dövlət Sosial Müdafiə Fonduna ödəmələri müəyyən qədər yüngülləşdiriləcək. Onun sözlərinə görə, ƏƏSMN İqtisadiyyat Nazirliyi ilə birlikdə DSMF-yə edilən ödənişlərlə bağlı optimallaşdırılmış təkliflər hazırlayıb.

Nazir deyib ki, burada söhbət daha çox müxtəlif fərdi sahibkarlar üçün DSMF-yə ödəmələrin müəyyən qədər yüngülləşdirilməsindən, diversifikasiyasından gedir: “Bakı şəhəri üzrə bir əmsalın, regionlar üçün digər əmsalın tətbiqindən söhbət gedir. Bəzi təxirəsalmalar da ola bilər. Amma sosial sığorta haqqı heç kim üçün silinə bilməz. Çünki sosial sığorta haqqının sahibi nə dövlət, nə də işəgötürən deyil. Onun sahibi işçidir ki, o da bu pulu gələcək pensiyası üçün depozit qoyub. Biz yalnız müəyyən qədər təxirəsalmalar etməklə güzəştlər edə bilərik. Məsələn, hansısa cərimələr, faizlər hesablanmasın, iki-üç ay ləngimələr olsun”.

Nazir hesab edir ki, bu güzəştlər muzdlu işçilərə görə edilməməlidir: “Çünki muzdlu işçilərə əməkhaqqının ödənilməsi üçün dövlət tərəfindən dəstək göstəriləcək və onların sosial sığorta ayırmaları da nəzərə alınacaq. Ona görə də onlar üçün sosial sığorta haqları ödənilməlidir. Fərdi sahibkarlara gəldikdə isə, onlar özləri ödəyicidirlər və özlərinin pensiya təminatını qururlar. Biz müəyyən çətinliklərin olmasını nəzərə alaraq, xüsusilə regionlar üçün yüngülləşdirməyə getməyə planlaşdırırıq”.

Maraqlıdır, DSMF-yə ödənişlər necə sadələşdiriləcək? Regionlar üçün nəzərdə tutulan yüngülləşdirmə nədən ibarət olacaq?

  • “...müvəqqəti olaraq sahibkarların daha az ödəniş edəcəyi gözlənir”

Sözügedən məsələyə aydınlıq gətirən sosial sahə üzrə ekspert Firdovsi Şahbazov bununla bağlı bir sıra məqamlara toxundu. Onun fikrincə, koronavirusla əlaqədar olaraq regionlarda fəaliyyət göstərən fərdi sahibkarların DSMF-yə daha az məbləğdə ödənişlər edəcəyi gözlənir: “Fərdi sahibkarlar üçün sığorta ödənişləri hər kvartal üçün 150 manatdır. Aprel hesabat ayı olduğu üçün vəsait ödənilməlidir. Ancaq koronavirusun yaratdığı vəziyyətlə əlaqədar olaraq ödənişləri ləngitmək mümkün olacaq. Yəni mütləq deyil ki, ödənişlər apreldə edilsin. Bundan sonrakı aylarda sahibkarlar sığorta ödənişlərini hissə-hissə ödəyəcəklər. Əsas güzəşt bununla bağlı olacaq. Ola bilsin ki, vəziyyət tam düzələndən sonra sahibkarlar ödəniş etsin. Hələlik ƏƏSMN bunlara tam aydınlıq gətirməyib. Bir məqamı da qeyd edim ki, sığorta ödənişində Bakı ilə regionlar arasında fərq var. Bakıda bu 50 manatdırsa, regionlarda bu 35 manatdır. Görünür, bu fərq bir az da regionların xeyrinə dəyişəcək. Fikrimcə, vəziyyətlə əlaqədar regionlar üzrə sığorta ödənişinin məbləği aşağı salınacaq. Bunun konkret nə qədər olacağını indidən demək çətindir, amma müvəqqəti olaraq sahibkarların daha az ödəniş edəcəyi gözlənir”.

Vidadi ORDAHALLI

Son xəbərlər