Məlum olduğu kimi, Nazirlər Kabineti tərəfindən təsdiq edilmiş Tədbirlər Planında işsiz kimi qeydiyyata alınan şəxslərə aprel-may aylarında hər ay üçün yaşayış minimumu həcmində (190 manat) birdəfəlik ödəmə verilməsi nəzərdə tutulub.
Əmək və Əhalinin Sosial Müdafiəsi Nazirliyindən verilən məlumata görə, işsiz kimi qeydiyyata alınmaq və ya birdəfəlik ödəməni (190 manat) almaq üçün karantin rejimini pozub evdən çıxaraq Məşğulluq Mərkəzlərinə müraciət etmələrinə heç bir ehtiyac yoxdur. Xüsusi karantin rejimi ilə əlaqədar hazırda mərkəzlərdə vətəndaş qəbulu da həyata keçirilmir.
Eyni zamanda, işsiz şəxslərin qeydiyyatı yalnız elektron qaydada aparılır. Belə ki, işsiz şəxs qeydiyyata alınması üçün www.e-sosial.az portalına daxil olaraq “e-xidmətlər” bölməsindən “Vətəndaşların işaxtaran və işsiz kimi qeydiyyata alınması, qeydiyyatdan müvəqqəti çıxarılması və qeydiyyatın ləğv edilməsi” xidmətini seçməlidir.
Birdəfəlik ödəmənin verilməsində ünvanlılıq prinsipi, şəxsin ailə gəlirləri nəzərə alınacaq. Bununla bağlı mexanizm hazırlanır. Bu proses yaxın günlərdə başa çatdıqdan sonra birdəfəlik ödəmə vəsaitləri işsizlərə nağdsız qaydada (bank xidmətləri vasitəsilə) ödəniləcək.
İşsiz şəxslərə birdəfəlik ödəməni almaq və ya işsiz kimi qeydiyyata alınmaq üçün məşğulluq mərkəzlərinə müraciət etməmələri, bunun üçün evdən çıxaraq xüsusi karantin rejimini pozmamaları tövsiyə edilir.
Onu da qeyd edək ki, dövlətin sosial dəstək tədbirləri 1 milyon 900 min insanı əhatə edəcək.
Koronavirus dövründə işsizlərə ayda 190 manat yardım verilməsi dövlətin əhalinin bu kəsiminə növbəti sosial dəstəyinin örnəklərindən biridir.
“Unutmayaq ki, indiki şəraitdə, vəziyyətdə, məbləğindən asılı olmayaraq, əhalinin bu həssas təbəqəsinə maddi yardımların edilməsi bir dəstək formasıdır, stimullaşdırıcı amildir”
İqtisadçı Elşad Məmmədov bizimlə söhbətində bildirdi ki, belə ağır günlərdə dövlətin işsiz vətəndaşları unutmaması təqdirəlayiqdir. O hesab edir ki, indiki şəraitdə veriləcək məbləğ işsizlərə maddi-mənəvi stimul olacaq.
“Bu gün görürük ki, sosial probelmlər koronavirusla, bütövlükdə, iqtisadi böhranla bağlı ön plana çıxır. Bu ağır sosial şəraitdə əhalinin işsiz təbəqəsinə birdəfəlik yardımın edilməsi, təbii ki, əhalinin aztəminatlı təbəqələri üçün dövlət dəstəyi olaraq qəbul olunmalıdır. Sözsüz ki, dövlətin əhalinin aztəminatlı təbəqələrinə diqqət göstərməsi, onlara yardımlar etməsi təqdirəlayiqdir. Dövlət işsizlərə 190 manat birdəfəlik yardım etməklə onlara dəstək olur. Ümid edirəm ki, bununla növbəti sosial paket məhdudlaşmayacaq, Azərbaycan sosial statusa malik olan dövlət kimi bundan sonra da sosial siyasətlə bağlı ardıcıl qərarlar qəbul edəcək. O ki qaldı işsizlərə, ödəniləcək 190 manat yardımın onların problemini həll edib-etməyəcəyinə, sözsüz, bunun böyük vəsait olduğunu qeyd edə bilmərik. Eyni zamanda, unutmayaq ki, indiki şəraitdə, vəziyyətdə, məbləğindən asılı olmayaraq, əhalinin bu həssas təbəqəsinə maddi yardımların edilməsi bir dəstək formasıdır, stimullaşdırıcı amildir”.
E.Məmmədovun sözlərinə görə, əhalinin aztəminatlı təbəqəsinə aid olan və 190 manat yardım alacaq işsizlərə ödəniləcək bu vəsait stimullaşdırıcı təsirə malikdir. O hesab edir ki, bu siyasət davam etdirilməlidir. “Amma, eyni zamanda, dövlət tərəfindən işsizlərə 190 manat birdəfəlik yardımın verilməsi, şübhəsiz ki, əhalinin zəif təmin olunmuş təbəqələri üçün sosial dəstək olaraq səciyyələndirilməlidir” - deyə E.Məmmədov vurğuladı.
İradə SARIYEVA
