Baş nazir Əli Əsədov yeni növ koronavirus (COVID-19) pandemiyası ilə mübarizə şəraitində əlilliyi olan şəxslərin əlillik müddətinin uzadılması barədə qərar imzalayıb.
Qərarda deyilir: “Azərbaycan Respublikası Konstitusiyasının 119-cu maddəsinin səkkizinci abzasını rəhbər tutaraq, yeni növ koronavirus (COVID-19) pandemiyası ilə mübarizə şəraitində əlilliyi olan şəxslərin sosial müdafiəsini təmin etmək məqsədilə Azərbaycan Respublikasının Nazirlər Kabineti qərara alır:
1. 2020-ci il martın 1-dən etibarən əlillik müddəti başa çatan əlilliyi olan şəxslərin, o cümlədən, sağlamlıq imkanları məhdud 18 yaşınadək uşaqların əlillik müddəti Azərbaycan Respublikasının ərazisində xüsusi karantin rejiminin bitdiyi tarixdən sonrakı ayın 1-dək uzadılsın.
2. Azərbaycan Respublikasının Əmək və Əhalinin Sosial Müdafiəsi Nazirliyi bu qərardan irəli gələn məsələləri həll etsin”.
Görünən odur ki, koronavirusun yaratdığı məlum vəziyyətlə əlaqədar olaraq əksər sosial təbəqə, o cümlədən, sosial baxımdan daha həssas olan qruplar da diqqətdən kənarda qalmırlar. Bu baxımdan, əlilliyi olan şəxslərin, əlillik müddətinin bir ay uzadılması onlara verilən sosial dəstəyin göstəricisidir.
“Sağlamlıq imkanları məhdud 18 yaşınadək uşaqların sayı hər il dəyişir”
Məsələyə münasibət bildirən Əlil Təşkilatları İttifaqının sədri Davud Rəhimlinin sözlərinə görə, bu, sözügedən kateqoriyadan olan əlilliyi olan şəxslərə göstərilən qayğıdır: “Məsələ ondadır ki, əlilliyi olan şəxslər koronavirusla əlaqədar olaraq müvafiq qurumlara gedə bilmirlər. Nəzərə almaq lazımdır ki, 18 yaşadak əlilliyi olanlara ümumi müavinət verilir. 18 yaşdan sonra isə dərəcələr müəyyən edilir. Mövcud vəziyyətlə əlaqədar olaraq bunları yoluna qoymaq çətindir. Bundan əvvəl ünvanlı sosial yardım alanlar elektron xidmətlərdən itifadə edirdilərsə, indi əlilliyi olanlar da bu xidmətdən istifadə edəcəklər. Yəni əlilliyin təyin olunmasında da bu xidmətdən istifadə ediləcək. Digər tərəfdən, hər hansı bir şəxsin əlillik təyin olunma vaxtı bitibsə, o, karantin müddətində yenidən müraciət etməyə bilər. Çünki əlavə olaraq daha bir ay onlara əlilliyə görə müavinət veriləcək. Onların pensiya təminatı dayandırılmayacaq və əvvəlki kimi müavinət alacaqlar. Bu, indiki çətin dövrdə əlilliyi olan şəxslərə göstərilən sosial qayğı və edilən güzəştdir. Ona görə də sözügedən qərarı alqışlayırıq. Sağlamlıq imkanları məhdud 18 yaşınadək uşaqların sayına gəldikdə isə, bu statistika hər il dəyişir. Hazırda bu statusda olan şəxslərin sayı rəsmən açıqlanmayıb. Çox güman ki, yaxın günlərdə onların sayı açıqlanacaq. Onda bəlli olacaq ki, nə qədər əlilliyi olan şəxs bundan faydalanacaq”.
Vidadi ORDAHALLI
