05/06/2020 07:40
728 x 90

Əmək müqaviləsi olmadan işləyənlərə dövlət dəstəyi kimi çətin problem gündəmdə - Nazirlik nə edəcək...

Vüqar Bayramov: “Qeyri-rəsmi işsiz vətəndaşlar məşğulluq xidmətlərində elektron qeydiyyatdan keçməklə birdəfəlik yardım almaq hüququ qazanacaqlar”

img

Əmək və Əhalinin Sosial Müdafiəsi naziri Sahil Babayev birdəfəlik ödəmə ilə bağlı keçirdiyi mətbuat konfransında deyib ki, əmək müqaviləsi olmayan şəxslərin sosial tədbirlərlə əhatə edilməsi tapşırılıb.

O bununla bağlı bir sıra məqamlara toxunub: “4 istiqamət üzrə insanlara sosial dəstək veriləcək. Həyati vacib obyektlərin işini davam etdirməkdə olan iş yerləri üçün işçi təminatı təmin edilib. Bu gün dövlət sektorunda 910 min nəfər əmək müqaviləsi ilə işləyir”.

Nazir bildirib ki, qeyri-dövlət sektorunda əmək müqaviləsi ilə işləyənlər ikinci istiqamətdə dəstək alacaq işçilərdir: "Bu sektorda 660 min əmək müqaviləsi ilə çalışır. Son 10 gündə əmək müqaviləsi ilə işləyənlərin sayında ciddi artım olub. Ləğv edilən hər bir əmək müqaviləsi üzrə işəgötürənlərlə müzakirə aparılır. Onlara izah edilir ki, bu dövrdə maksimum dərəcədə müqavilələrin ləğvi olmasın".

S.Babayev onu da qeyd edib ki, üçüncü istiqamət işsizlər və əmək müqaviləsi olmadan qeyri-formal məşğulluq sahəsində işləyənlərlə əlaqəlidir: “Onlar da sosial cəhətdən ən çox zərbə alanlardır. Bu gün onların sosial təminatı yoxdur. Bu şəxslərin sosial tədbirlərlə əhatə edilməsi tapşırılıb”.

Məlum olduğu kimi, bu gün ölkədə xeyli sayda qeyri-rəsmi işləyən var ki, indi çətinliklə üzləşiblər. Karantin tədbirləri ilə əlaqədar onlar gündəlik işləyə bilmirlər. Digər tərəfdən, həmin kateqoriyaya aid olan işçilərin bir qismi kirayələrdə yaşayır. Kirayələrdə yaşayanlar əsasən rayonlardan Bakiya işləməyə gələnlərdir. Əmək müqaviləsi olmayanlara da sosial dəstək verilməsinin gündəmə gəlməsi müsbət addımdır.

Maraqlıdır, onların sosial tədbirlərlə əhatə olunması nədən ibarət ola bilər?

  • “Onlara da 190 manat birdəfəlik yardımın verilməsi nəzərdə tutulub”

Sözügedən məsələyə aydınlıq gətirən millət vəkili Vüqar Bayramovun sözlərinə görə, qeyri-rəsmi işləyənlər də birdəfəlik yardım alacaq: “Məlum olduğu kimi, sosial paket elan edilib. Birinci mərhələdə məşğulluq xidmətlərində qeydiyyatda olan 200 min vətəndaşa aylıq 190 manat birdəfəlik yardım ediləcək. Sözügedən yardımların aprel-may ayında edilməsi nəzərdə tutulub. İkinci mərhələdə isə artıq qeyri-leqal sektorda çalışanlara yardımların edilməsi planlaşdırılır. Bu, məşğulluq xidmətlərində qeydiyyatda olmayan və hazırda işləməyən şəxslərə yardımın edilməsini özündə ehtiva edir. Bununla bağlı ƏƏSMN-də iş gedir. Sözügedən paketin məqsədi ondan ibarətdir ki, həmin vətəndaşlara da sosial dəstək verilsin. Yəni qeyri-rəsmi işsizlər də birdəfəlik yardımlar ala bilsinlər. Ona görə də qeyri-rəsmi işsiz vətəndaşlar indiki mərhələdə ƏƏSMN yanında məşğulluq xidmətlərində elektron qeydiyyatdan keçməklə birdəfəlik yardım almaq hüququ qazanacaqlar. Müraciətlərə nazirlik baxacaq və meyarlara uyğun qərar veriləcək. Onlara da 190 manat birdəfəlik yardımın verilməsi nəzərdə tutulub. Bu da onu göstərir ki, sosial paket növbəti mərhələdə daha çox vətəndaşı əhatə edəcək. Xüsusən də koronavirus üzündən iş yerlərini itirən və əmək müqaviləsi olmayan vətəndaşlar da bu yardımdan istifadə hüququ qazanacaqlar. Bu da imkan verəcək ki, daha çox işsiz vətəndaş birdəfəlik yardım almaq hüququ əldə etsin”.

Vidadi ORDAHALLI

Son xəbərlər