02/06/2020 06:40
728 x 90

Hamının, hər şeyin virusla mübarizəyə səfərbər edildiyi dövr – marketlərdə 200 manat əməkhaqqı ədalətlidirmi...

Məhərrəm Zülfüqarlı: “Bu onu göstərir ki, supermarket sahibləri işçilərin mənafeyini yox, ancaq öz maraqlarını güdürlər”

img

Koronavirusun ölkədə yayılmasının qarşısını almaq üçün hökumət üzərinə düşən bütün işləri həyata keçirir. Bu işlər müxtəlif formada icra edilir. O cümlədən, həyatını risqə qoyan həkimlərin sosial durumu yaxşılaşdırılır. Bir müddət əvvəl sözügedən həkimlərin maaşları artırıldı.

Ancaq hökumətdən fərqli olaraq, özəl qurumlarda risqli sahələrdə çalışan işçilərin mənafeyini düşünən yoxdur. Məsələn, bu gün supermarketlərdə kassa arxasında gündə minlərlə insana xidmət edən şəxslər var ki, onların məvacibini hökumət artırası deyil. Bunu market sahibləri etməlidirlər. Hansı ki, indiki mövcud vəziyyətlə əlaqədar olaraq onlar da həyatlarını həkimlər qədər risqə qoyurlar. Hər gün minlərlə insan marketlərdən alış-veriş etdikdən sonra məhz həmin kassa arxasında oturan işçilərlə təmasda olur. Ancaq müşahidələr göstərir ki, əksər supermarketdə kassa arxasında çalışanlar bu işin müqabilində çox az məvacib alırlar. Bir çox marketdə onların aldığı maaş 200 manatı ötmür. Bəzilərində, ən yaxşı halda, kassa arxasında oturanların maaşı 300 manatdır. Nəzərə almaq lazımdır ki, kiçik və orta sahibkarlıq subyektləri bir sıra çətinliklərlə üzləşsələr də, supermarketlərdə vəziyyət fərqlidir. İş ondadır ki, son vaxtlar marketlərin gəliri xeyli artıb. Çünki hamı kütləvi şəkildə ərzaq alır. Bu baxımdan, supermarket sahibləri üçün kassa arxasında oturan və həyatını risqə atan işçilərin məvaciblərini artırmaq problem deyil. Ancaq təəssüflər olsun ki, market sahibləri bunu etmək barədə düşünmürlər.

  • “Belə yanaşma onların sosial hüquqlarının özəl qurumlar tərəfindən açıq-aşkar pozulması deməkdir”

Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, özəl qurumların risq altında olan işçilərinə qarşı bu cür biganə münasibət sərgiləmələri təəssüf doğurur: “Bu onu göstərir ki, onlar işçilərin mənafeyini yox, ancaq öz maraqlarını güdürlər. Ona görə də bu məsələ çox düşündürücüdür. Çünki nəinki supermarketlərdə, ayrı-ayrı ərzaq mağazalarında satıcılar insanlarla gündəlik təmasda olduqlarına görə risq qrupuna aiddirlər. Kim zəmanət verə bilər ki, kassa arxasında oturanlar virusa yoluxmayacaq? Ona görə də market sahibləri onların maaşını qat-qat artırmalıdırlar və mütləq onların iş rejimi nəzərə alınmalıdır. Əksər insan evdə oturduğu halda, supermarket işçiləri fəaliyyətdədirlər. Hər gün insanlara xidmət edirlər, amma bunun qarşılığında 200 manat əməkhaqqı alırlar. Əlbəttə, bu ədalətli deyil. Belə yanaşma onların sosial hüquqlarının özəl qurumlar tərəfindən açıq-aşkar pozulması deməkdir. O üzdən, supermarket sahibləri bunu nəzərə almalıdırlar. Marketin sahibi öz qazancı hesabına onların məvacibini artırmalıdır. Çünki onlar əvvəlkindən qat-qat ağır şəraitdə işləyirlər. Həmkarlar təşkilatı bu məsələni diqqətdə saxlamalıdır”.

Vidadi ORDAHALLI

Son xəbərlər