02/06/2020 04:45
728 x 90

Koronavirusla mübarizədə Azərbaycan dövlətinin üzə çıxardığı güc parametrləri...

Elçin Mirzəbəyli: “Koronavirusla mübarizədə, üzləşdiyimiz bu çətin vəziyyətdə gücümüz həm də milli həmrəyliyimiz və birliyimizdir”

img

Azərbaycan dövlətinin COVID-19-a qarşı həyata keçirdiyi mübarizə tədbirləri davamlı xarakter alıb. Ölkəmizin bütün strukturları bu virusla mübarizə cəbhəsində məsuliyyətlə döyüşür, koronavirusun tarixə qovuşmasına nail olmaq üçün əllərindən gələni edirlər.

Məlum olduğu kimi, Prezident aprelin 6-da Sumqayıt Kimya Sənaye Parkında “Bakı Tekstil Fabriki” MMC tərəfindən yaradılan tibbi maska istehsalı müəssisəsinin açılışında iştirak edib və burada bir sıra məsələlər, o cümlədən də koronavirusla bağlı dövlətimizin həyata keçirdiyi mübarizə tədbirlərindən danışıb.

“...Bir sözlə, Azərbaycan dövləti bu ciddi vəziyyətlə üzləşərək yenə də öz gücünü göstərdi. Onu göstərdi ki, bizim əsas vəzifəmiz xalqımızı, dövlətimizi qorumaqdır. Buna nail olmaq üçün istənilən addımların atılması mümkündür və biz bunu edirik. Operativ tədbirlər nəticəsində imkan vermədik ki, bu bəla ölkədə geniş vüsət alsın. Ancaq bizim gələcək uğurumuz bundan sonra böyük dərəcədə insanların hərəkətlərindən asılı olacaq. Dövlət nə mümkünsə, onu edib. Bu gün sərtləşdirilmiş, məhdudlaşdırıcı tədbirlər qüvvədədir. İnsanlar məsuliyyətli olmalıdırlar, özlərini, yaxınlarını, ailə üzvlərini qorumalıdırlar. Necə ki, biz birlik, həmrəylik göstəririk, eyni tərzdə məsuliyyət və nizam-intizam göstərməliyik”.

  • “...dövlətimiz bu istiqamətdə gördüyü işlərlə də əhalisinin sayı bizdən kifayət qədər çox olan ölkələri üstələyir”

Koronavirsla mübarizədə Azərbaycan dövlətinin güc parametrlərinin nələrdən ibarət olduğunu şərh edən “Xalq cəbhəsi” qəzetinin baş redaktoru, tanınmış politoloq Elçin Mirzəbəyli “Bakı-Xəbər”ə bildirdi ki, Azərbaycan dövləti bu məsələdə bütün resurslarını səfərbər edərək öz gücünü göstərə bildi. “Cənab Prezident həm də onu bildirdi ki, koronavirusla bağlı Azərbaycanın atdığı addımlar ardıcıl olub və problemin həlli istiqamətində çevik reaksiya göstərilib, önləyici tədbirlərin həyata keçirilməsi yönündə addımlar atılıb.

Dövlətimiz bu ağır vəziyyətdə özünün  həm iqtisadi, həm siyasi, həm də mənəvi gücünü göstərə bildi və vətəndaşının sağlamlığı, təhlükəsizliyi naminə bütün resurslarını səfərbər etdi. Bildiyimiz kimi, bu gün Azərbaycanda 45 min test keçirilib, yoxlamalar aparılıb. Bu rəqəm isə  dünyada əhalisinin sayı Azərbaycanla müqayisədə qat-qat çox olan ölkələrdən çoxdur. Məsələn, əhalisini sayı 42 milyon nəfər olan Ukraynada indiyə qədər 6 minə yaxın test keçirilib. Bu göstərici əhalisinin sayı 208 milyona yaxın olan Pakistanda 35, əhalisinin sayı 43 milyondan çox olan Argentinada 8500, əhalisinin sayı 126 milyon olan Yaponiyada 46 mindir. Bu faktın özü də sübut edir ki, Azərbaycan öz gücünü, imkanlarını səfərbər edərək, öz vətəndaşlarının təhlükəsizliyinin təmin edilməsi istiqamətində addımlar atıb, dövlətimiz bu istiqamətdə gördüyü işlərlə də əhalisinin sayı bizdən kifayət qədər çox olan ölkələri üstələyir. Bu fakt, əslində, bir çox məqamın özünə də aydınlıq gətirir. Cənab Prezident öz çıxışında kifayət qədər ciddi məqamlara və istiqamətlərə toxundu. Bunlardan biri də milli həmrəyliyin və birliyin təmin olunması, eyni zamanda, bu həmrəyliyin, birliyin təməlində dayanan real faktorlarla bağlı məsələlərə də diqqət yetirdi. Ölkə başçısı qeyd etdi ki, milli birlik və həmrəylik nümayiş etdirdiyimiz kimi, həmçinin,  nizam-intizamlı, məsuliyyətli olmalıyıq. Qeyd edim ki, bu təkcə bu gün üçün deyil, bütün dövrlər üçün əhəmiyyətə malikdir. Çünki milli həmrəylik və birlik əsasında məsuliyyət, nizam-intizam yoxdursa, o halda mütəşəkkillik də yoxdur. Mütəşəkkillik olmayan yerdə isə həmrəylik və birlik haqqında səsləndirilən fikirlər şüarçılıqdan o yana keçmir. Bu aspektdən də düşünürəm ki, Azərbaycan Prezidentinin xalqa müraciəti özü bir platforma xarakteri daşıyır, bundan sonra necə hərəkət etməli olduğumuzu göstərir. Koronavirusla  mübarizədə, üzləşdiyimiz bu çətin vəziyyətdə gücümüz həm də milli həmrəyliyimiz və birliyimizdir” - deyə E.Mirzəbəyli vurğuladı.

İradə SARIYEVA

Son xəbərlər