Dünya yeni bir dəyişikliklə üz-üzə qalıb, gözəgörünməz düşmən - koronavirusla mübarizəyə başlayıb. Qorxu, narahatlıq, həyəcan dolu və “sabah necə olacaq” fikri ilə düşüncələrə qərq olmuşuq. Ancaq önəmli olan odur ki, dünya ölkələri ilə müqayisədə dövlətimiz, ölkə başçısı İlham Əliyev xalqımızı, Azərbaycanımızı qorumaq üçün bütün tədbirlər planını həyata keçirməyə çalışır. Biz də bu xeyirxah niyyətə səs verməklə, “Evdə qal” prinsipinə əməl etməklə dünya üzərində dolaşan bəladan xilas ola bilərik. Bunu anlayan düşüncəli insanlarımız, cəmiyyətdə mövqeyi olan tanınmış simalar əhalimizə evdə qalmağın xeyirli tərəfini izah edirlər. Ölkəmizdə bu yöndə böyük maarifləndirmə kampaniyası aparılır. İlk növbədə vətəndaşlarımıza aşılanıb ki, yalnız bu qaydaya əməl etməklə biz özümüzü və ölkəmizi pandemiayanın fəsadlarından xilas edə bilərik.
Bununla yanaşı, sosial şəbəkələrdə aparılan müzakirələrdən, paylaşılan video və fotolardan görünür ki, “evdə qal”ın müsbət tərəfləri də kifayət qədərdi. Məsələn, görünən budur ki, insanlar ailələri ilə daha çox vaxt keçirməli olurlar, övladlarına , onların dərslərinin hazırlanmasına çox vaxt ayıra bilirlər. Vaxtın çoxluğu onlara maraqlı filmləri izləməyə, mütaliə etməyə imkan verir. Hətta bu müddət ərzində “Facebook”da evdə çox vaxt keçirən kişilərin mətbəxdə hazırladıqları gözəl yeməklərlə bağlı paylaşımlarına da tez-tez rast gəlinir. Ev şəraitində idman edən adamlar da çoxalıb. Eyni zamanda avtomobillərin az hərəkəti, sənaye müəssisələrinin işinə verilən fasilə təbiətin də nəfəs almasına şərait yaradıb. Bunun ekoloji vəziyyətə çox faydasının olduğu bildirilir. Təbiidir ki, hər kəs həyatın normal axara qayıtmasını istəyir. Bu da mütləq olacaq. Ancaq məcburi qaydada əməl etməli olduğumuz özünütəcrid hərəkatı çərçivəsində sadalanan faydalı əməllərdən də yaralanmalıyıq ki, boş vaxtımız hədər getməsin. Bununla yanaşı, biz “evdə qal” kampaniyasına qarşı çıxanlara da ara-sıra rast gəlirik. Onların arqumentləri heç vaxt əsaslandırılmış sayıla bilməz. Çünki hər nə desələr belə, sonda insanların bir müddət təcrid edilməsinin zəruriliyini dərk edəcəklər. Çünki bəşəriyyəti bürüyən bu bəladan yalnız bu yolla xilas olmaq mümkündür.
Bu günlər xalqımızın bir müsbət kefiyyətini də üzə çıxramış oldu. Sonsuz sayda insanların ehtiyacı olan ailələrə maddi və ərzaq yardımı etdiyinin şahidi oluruq. Bu müddət ərzində çoxlu sayda yardımlaşma kampaniyaları aparılır. Hətta bəzi marketlərdə “Ehtiyacın yoxdur ver, ehtiyacın varsa götür” adlı xüsusi bölümlər yaradılıb. İmkanı olan vətəndaşlarımız həmin yerə istədikləri ərzaq növünü qoyur, ehtiyacı olanlar gəlib onları pulsuz götürə bilir. Bütün bunlar bir daha sübut edir ki, biz birlikdə güclüyük. Yalnız birlik nümayiş etdirməklə, qaydalara tabe olmaqla bu bəladan xilas ola bilərik.
Məhəmmədəli QƏRİBLİ
