25/05/2020 23:35
728 x 90

Vətəndaşlarımızı daha məsuliyyətli olmağa çağıran yeni fakt - 2-3 yaşlı uşaqlar arasında da yoluxma var...

Vaqif Qarayev: “Uşaqlar arasında koronavirusun aşkarlanması valideynlərin uşaqlarını daha çox qorumalı olduğuna dair bir mesajdır”

img

COVID-19 virusunun yayıldığı ilk vaxtlarda uşaqların bu virusa yoluxmadığı və onlarda koronavirusa qarşı təbii immunitet olduğu bildirilirdi. Hətta Ümumdünya Səhiyyə Təşkilatının ilkin hesabatlarında bu virusa daha çox yaşlıların yoluxduğu qeyd edilirdi, bu sənədlərdə uşaqların koronavirusa yoluxmasına dair heç bir informasiya yox idi. Lakin pandemiyanın qonşu İranda geniş yayılması və yoluxma hallarının genişlənməsi nəticəsində uşaqların da bu virusa yoluxduğu üzə çıxdı.

Məlumdur ki, İranda 3, 6 yaşlı uşaqların bu virusdan həyatını itirdiyi barədə məlumatlar yayılmışdı. İranda yaşanan bu acı olaydan sonra başqa ölkələrdə də koronavirusa tutulanlar və bu virusdan ölənlər arasında hətta uşaqların da olduğu rəsmən təsdiqləndi.

Azərbaycanda yoluxmanın qarşısının alınması üçün bütün lazımi tədbirlərin həyata keçirilməsinə, məktəblərin, məktəbəqədər müəssisələrin qapadılmasına, uşaqların ev şəraitində olmasına baxmayaraq, çox təəssüf ki, ölkəmizdə də bu virusa yoluxanlar arasında uşaqlar da var.

TƏBİB-in İdarə Heyətinin sədri Ramin Bayramlı “Diqqət mərkəzi-Yekun” verilişində yaş spektrindən danışarkən bu faktın mövcudluğunu təsdiqləyib. “Azərbaycanda koronavirusa yoluxanlar arasında 2-3 yaşlı uşaq da var” - deyən R.Bayramlının sözlərinə görə, bu virus yaş sərhədi tanımır. “Süni tənəffüs aparatına bağlı bir xəstənin qidalanması, dərmanlarının verilməsi, gigiyenik yardımın göstərilməsi və s. bütün bunlar çox ağırdır. Artıq ölkəmizin bütün regionlarında az və ya çox yoluxma faktı var. Biz bir həftə əvvəl yoluxma faktları ilə bağlı təkxanalı rəqəmlərdən danışırdıq, indi cütxanalı rəqəmlərdən danışırıq. Dua edək ki, gələn dəfə üçxanalı rəqəmlərdən danışmayaq.

Bizim xəstəxana tutumumuz var. Qərar vermişik ki, simptomatik və ya asimptomatik olmasından asılı olmayaraq, bütün pozitiv xəstələri regionlar daxil olmaqla 22 xəstəxanaya yerləşdirək, tibb müəssisələrində onları təcrid edək. İkiaylıq bir təcrübəmiz var. Deyə bilərik ki, özünü qrip adı ilə evdə müalicə etmək istəyən şəxslərin sonradan vəziyyəti yaxşı olmur. Bu gün özünü çox yaxşı hiss edən sabah ağırlaşa bilər. Həmin şəxsləri biz nəzarət altında saxlamaqla, həm də onların ailə üzvlərini qorumuş oluruq.

Bu gün imkanımız buna yol verir. Ancaq gündəlik yoluxma halları üçxanalı rəqəmlərə çıxsa, vəziyyət çətin olacaq. Bizim 2-3 yaşdan 89 yaşa kimi yoluxmuş xəstəmiz var. Bu virusun yoluxması sərhəd tanımır” - deyə qeyd edib.

  • “Azərbaycanda uşaqların koronavirusa yoluxması ilə bağlı məlumata yeni rast gəlinməyə başlayıb, indiyə qədər bu virus uşaqlar arasında müşahidə edilməmişdi”

Tanınmış pediatr, tibb üzrə ekspert Vaqif Qarayev “Bakı-Xəbər”ə bildirdi ki, Azərbaycanda uşaqların bu virusa yoluxması yeni faktdır, bundan əvvəlki dönəmlərdə uşaqlar arasında koronavirus aşkarlanmayıb: “Açığı, Azərbaycanda uşaqların koronavirusa yoluxması ilə bağlı məlumata yeni rast gəlinməyə başlayıb, indiyə qədər bu virus uşaqlar arasında müşahidə edilməmişdi. Onu da qeyd edim ki, əslində, burada təəccüblü heç nə yoxdur, çünki bu virus üçün yaş sərhədi yoxdur. Bilirsiniz ki, ölkəmizdə daha çox böyüklər arasında yoluxma halları mövcuddur və yoluxanlar arasında uşaqların da olması təəssüf doğurur. Dövlət yoluxmanın ilk müşahidə edildiyi dövrdə çox zəruri bir addım atdı, uşaq bağçaları, məktəblər müvəqqəti olaraq bağlandı. Uşaqların evdə qalması və xəstəliyə yoluxmaması üçün bu tədbirin böyük əhəmiyyəti var. Amma, bununla belə, sərhəd tanımayan koronavirus pandemiyası uşaqlardan da yan keçməyib. Hesab edirəm ki, uşaqlar arasında koronavirusun aşkarlanması valideynlərin uşaqlarını daha çox qorumalı olduğuna dair bir mesajdır. Bu xəstəlik təəssüf ki, hər bir insanı yaxalaya bilər və bəzən görürsünüz ki, yaxalayır da”.

İradə SARIYEVA

Son xəbərlər