Ölkəmizdə koronavirusa yoluxma hallarının müəyyən edilməsi üçün əsas amil olan testlərin dövlət tərəfindən alınması və koronavirusa yoluxma şübhəsi ilə karantinə alınan şəxslərə tətbiq edilməsi nəticə verməkdədir.
Bildiyimiz kimi, ilkin dövrdə infeksiya faktları müəyyən olunanda Azərbaycan yalnız Ümumdünya Səhiyyə Təşkilatından məhdud şəkildə testlər alırdı və həmin dövrdə mövcud imkanlar çərçivəsində müayinələr aparılırdı. Sonrakı dövrdə ölkəmiz artıq özü kifayət qədər test almağa başladı. İlkin vaxtlar ölkədə gündə cəmi 200-300 test keçirilirdisə, indi müayinələrin sayı mindən çoxdur. Aprelin 4-ə olan rəsmi məlumata görə, ölkədə 35 mindən artıq test keçirilib. Bugünkü məlumata görə isə Azərbaycanda koronavirusla bağlı keçirilmiş testlərin sayı 45 minə çatır. Bu barədə TƏBİB-in Azərbaycanda koronavirusla əlaqədar son sutka ilə bağlı açıqladığl statistik göstəricilərdə qeyd edilib. Məlumatda Azərbaycanda koronavirusla bağlı 3 080 test edildiyi, 63 nəfərin yeni yoluxduğu, iki nəfərin isə öldüyü bildirilib. Statistikaya əsasən, ümumi test sayı 44.753, ümumi yoxlama faktı 584-dür.
Ekspertlər hesab edirlər ki, testlərin sayının 45 min civarında olması faktı, müayinələrin genişlənməsi yoluxma hallarını müəyyənləşdirmək üçün imkanları artırıb.
Adil Qeybulla: “Testlərin sayının 45 minə yaxınlaşdırılması virusa yoluxan daha çox xəstənin müəyyən edilməsində rol oynayır”
Professor Adil Qeybulla “Bakı-Xəbər”ə bildirdi ki, hamının testdən keçirilməsinə ehtiyac yoxdur: “Əslində, hamını testdən keçirmək lazım deyil. Türkiyə təcrübəsi göstərir ki, buna lüzum yoxdur. Sadəcə olaraq karantindən gələn, ölkəyə daxil olan, şübhəli əlamətlərə malik xəstələr yaxşı olar ki, testdən keçsinlər. Qalan halda, insanların kütləvi şəkildə testdən keçirilməsinə heç bir zərurət yoxdur. Testlərin sayının 45 minə yaxınlaşdırılması virusa yoluxan daha çox xəstənin müəyyən edilməsində rol oynayır”.
Leyla Bayramlı: “Ölkəmizdə testlənmənin sayının 10 min fərqlə artması Azərbaycan dövlətinin, səhiyyəsinin vətəndaşlarımıza qayğısının, diqqətinin, onların sağlamlığının keşiyində dayanmasının təzahürüdür”
Həkim-terapevt Leyla Bayramlı isə hesab edir ki, testlərin sayının çoxalması yoluxma hallarının müəyyən edilməsinə və yoluxanlarla bağlı vaxtında müalicə tədbirlərinin həyata keçirilməsinə böyük imkanlar açıb: “Ölkəmiz daha çox test əldə etdikcə, koronavirusa yoluxma halları ilə bağlı daha dəqiq nəticələr, faktlar əldə edə bilirik. Aprelin 4-də ölkəmizdə 35 min test keçirildiyi qeyd edilirdisə, hazırda bu, 45 mini əhatə edir. Koronavirsa yoluxmanın müəyyən edilməsi üçün artıq 45 minə yaxın testin keçirilməsi müsbət haldır. Əlbəttə, ölkəmizdə testlənmənin sayının 10 min fərqlə artması Azərbaycan dövlətinin, səhiyyəsinin vətəndaşlarımıza qayğısının, diqqətinin, onların sağlamlığının keşiyində dayanmasının təzahürüdür” - deyə həkim bildirdi.
İradə SARIYEVA
