Koronavirusla mübarizə dövründə də cəmiyyətin həssas qruplarına göstərilən qayğının şahidi oluruq. Bildiyimiz kimi, ölkəmizdə elan olunan karantin rejiminə görə yaşı 65-dən yuxarı olan vətəndaşların evdən bayıra çıxmasına icazə verilmir. Çünki həmin yaş qrupundakı insanların virusa yoluxma təhlükəsi daha böyükdür və bu halın baş verməməsi üçün dövlət müvafiq addımlar atıb.
Əmək və Əhalinin Sosial Müdafiəsi Nazirliyindən verilən məlumata görə, martın 24-dən aprelin 1-dək nazirliyin 142 - Çağrı Mərkəzinə daxil olan 27486 müraciətdən 5278-ni sosial xidmətlərin göstərilməsi ilə əlaqədar müraciətlər təşkil edib. Nazirlikdən bildirilib ki, koronavirus dövründə müraciətlər əsasında yaşı 65-dən yuxarı tənha yaşayan şəxslər olduğu müəyyən edilən 2472 vətəndaş evlərində sosial-məişət xidmətləri ilə əhatə olunub. Bununla da evlərində sosial xidmətlərlə təmin olunan yaşı 65-dən yuxarı tənha şəxslərin sayı 12 minə çatıb.
Nazirliyin sosial xidmət işçiləri tərəfindən könüllülərin də dəstəyilə həmin tənha yaşayan şəxslərə ev təsərrüfatı ilə bağlı işlərdə, öz vəsaitləri ilə əsas tələbat mallarının, dərman vasitələrinin alınmasında, kommunal ödənişlərin edilməsində və digər köməkliklər göstərilir.
“Hesab edirəm ki, bu, dövlətin o insanlara verdiyi dəyərin və sonsuz qayğının nəticəsidir”
“Cəmiyyətin və Vətəndaş Münasibətlərinin İnkişafı” İctimai Birliyinin sədri, tanınmış sosioloq Əhməd Abbasbəyli baki-xeber.com-a bildirdi ki, bu, ahıl insanlara, ömrünün “gümüş dövrü”nü yaşayan vətəndaşlarımıza göstərilən dövlət qayğısıdır.
“Bilirsiniz ki, koronavirus pandemiyası ilə bağlı qabaqlayıcı tədbirlər görən ilk ölkələrdən biri məhz Azərbaycan oldu. Hesab edirəm ki, bu tədbirlərin nəticəsində bu gün ölkəmiz koronavirusa say baxımından az yoluxan ölkələr sırasında dayanır. Düşünürəm ki, lazımi addımların atılması, proseslərin bu istiqamətdə davam etdirilməsi ölkədə qorxulu virusa qarşı mübarizənin effektini artırır. Bu bizim vəziyyətdən az itki ilə çıxmağımıza imkan verir. Bildiyiniz kimi, həm virusa yoluxma, həm qayğı, həm də sosial təminat baxımından ən həssas qruplardan biri də ahıl, yaşlı insanlardır. Beynəlxalq aləmdə bunlara ömrünün “gümüş dövrü”nü yaşayan insanlar deyirlər. Həmin insanlara xüsusi diqqət yetirilməlidir. Bu ağır dövrdə onların sosial, mənəvi cəhətdən qayğı ilə əhatə olunması üçün dövlət tərəfindən atılan addımlar təqdirəlayiqdir”.
Ə.Abbasbəyli qeyd etdi ki, bütün dünyada bu istiqamətdə işlər görülür və dünya dövlətləri sırasında Azərbaycanın həssas qrupa daxil olan insanlara göstərdiyi sosial, mənəvi qayğı daha qabarıq formada özünü göstərir. “Koronavirusla mübarizə dövründə dövlət tərəfindən 12 min nəfər yaşı 65-dən yuxarı olan tənha şəxsə hərtərəfli qayğı və diqqət göstərilməsi çox mühüm məsələdir. Hesab edirəm ki, bu, dövlətin o insanlara verdiyi əhəmiyyətin, sonsuz qayğının nəticəsidir. Dövlət yaşlı insanları qorumaqla, onlara mənəvi-maddi qayğı göstərməklə çox gərəkli, faydalı işi həyata keçirmiş olur. Bu həm də insanlıq baxımından çox yüksək qiymətləndirilməlidir. Deyim ki, bölgələrdə həmin həssas qrupları təmsil edən insanlara rayon rəhbərlilikləri qayğı göstərirlər. Amma təəssüflə qeyd edim ki, bəzi rayonlarda müəyyən qurumlar belə insanlara laqeyd yanaşırlar. Düşünərəm ki, bu da həmin qurumlara rəhbərlik edənlərin şəxsi keyfiyyətlərindən irəli gəlir. Halbuki, ahıl insanları qorumaq, onların qayğısına qalmaq və sosial təminatlarını həyata keçirmək o qurumların borcudur. Hətta elə insanlar, iş adamları, biznes strukturları da var ki, yaşlı insanlara qayğı-diqqət göstərirlər. Dövlətin isə ahıl və tənha insanlara göstərdiyi hərtərəfli qayğı və diqqət onun öz yaşlı vətəndaşlarına bəslədiyi humanist, xeyirxah və qayğıkeş münasibətin təzahürüdür” - deyə Ə.Abbasbəyli vurğuladı.
İradə SARIYEVA
