Məlum olduğu kimi, koronavirus infeksiyasının yayılmasının qarşısını almaq məqsədilə bütün səviyyələrdə hərəkətin məhdudlaşdırılması və sosial təcridin gücləndirilməsi gerçəkləşdirilib.
Bildiyimiz kimi, bu məqsədlə rayonlar və şəhərlərarası sərnişindaşıma prosesi dayandırılıb, Bakı metropoliteni də artıq fəaliyyət göstərmir. İnfeksiyanın yayılmasının qarşısının alınması üçün metronun bağlanması ən optimal üsullardan biridir. Metrodan insanların kütləvi şəkildə istifadəsinin xəstəlik risqinin artmasına səbəb olan bir amil olduğu məlumdur. Hətta mütəxəssislər metro bağlandıqdan sonra proqnoz verirdilər ki, karantin tədbirləri tam sərtləşdirilsə, marşrut avtobuslarının da fəaliyyəti dayandırılacaq. Artıq bu məsələyə rəsmi reaksiya verilib. Bakı Nəqliyyat Agentliyinin mətbuat katibi Mais Ağayev KİV-ə açıqlamasında bu ehtimalı təkzib etməyib və bildirib ki, Bakıda müntəzəm marşrut avtobuslarının fəaliyyəti dayandırıla bilər: "Çox güman ki, belə davam etsə, müntəzəm marşrut avtobuslarının fəaliyyəti dayandırılacaq. Avtobuslar ancaq həyati əhəmiyyətli sahələrdə çalışanlar üçün xidmət göstərəcək"
O, həmçinin, qeyd edib ki, metronun fəaliyyəti dayandırılandan sonra metrostansiyalararası ekspress avtobuslar istifadəyə verilib. Həmçinin, müntəzəm marşrut avtobuslarının sayı artırılıb. Buna baxmayaraq, sərnişindaşımada sıxlıq yaşanır:
"Çox təəssüf ki, insanlar Nazirlər Kabineti yanında Operativ Qərargahın tələbinə əməl etmirlər. Ekspress avtobuslar əsasən həyatı əhəmiyyətli sahələrdə çalışanları daşımaq üçün nəzərdə tutulub. Amma sərnişinlər bir çox halda ehtiyac olmadan evdən çıxırlar. Bu isə həyatı əhəmiyyətli sahələrdə çalışan sərnişinlərin daşınmasında çətinliklər yaradır. Çox güman ki, belə davam etsə, müntəzəm marşrut avtobuslarının fəaliyyəti dayandırılacaq. Avtobuslar ancaq həyati əhəmiyyətli sahələrdə çalışanlar üçün xidmət göstərəcək. Əks halda, sərnişindaşımada yaranan sıxlığın qarşısını almaq çətindir. Bu da virusun yayılma təhlükəsini artırır. Əlbəttə ki, sərnişindaşıma ilə bağlı qərar Operativ Qərargah tərəfindən verilir. Operativ Qərargahın belə bir qərarı olsa, biz onu icra edəcəyik".
“Avtobuslar fəaliyyətini dayandırdıqdan sonra yayılma olsa da, lokal olacaq və buna az adam yoluxacaq”
Nəqliyyat üzrə tanınmış ekspert Rauf Ağamirzəyev baki-xeber.com-a bildirdi ki, Bakıda müntəzəm marşrut avtobuslarının fəaliyyətinin dayandırılması təhlükəsizlik baxımından çox zərurudir. O hesab edir ki, gec-tez bu addım atılmalıdır. “Nazirlər Kabineti yanında Operativ Qərargahın koronavirusa yoluxma halları ilə bağlı məlumatları hər gün, hər saat yenilənir, özümüzü hər gün başqa bir reallığa kökləyirik. Hazırkı qərarla məhdud sayda hərəkət nəzərdə tutulub. Amma hələ ki, avtobusların sayını azaltmayıblar, amma aidiyyəti qurumun qeyd etdiyi kimi, bunun baş verməsi gözlənir. Bildiyiniz kimi, artıq metro da fəaliyyətini dayandırıb. Elektrik qatarları isə yalnız Pirşağı üzərindən Bakı-Sumqayıt arasında işləyir. Belə getsə, yaxın günlərdə elektrik qatarlarının da fəaliyyəti məhdudlaşdırılacaq. Virusla bağlı vəziyyət günü-gündən kritikləşir və bacardıqca evdə oturmaq lazımdır.
Bakı şəhərində hərəkət edən avtobusların fəaliyyətinin dayandırılması və onların yalnız həyati əhəmiyyətli sahələrdə çalışanlar üçün xidmət göstərməsi hazırda çox vacibdir. Çünki epidemiyanın sürətli yayılmasına yalnız bu səbəb ola bilər. Avtobuslar fəaliyyətini dayandırdıqdan sonra yayılma olsa da, lokal olacaq və buna az adam yoluxacaq. Marşrut avtobuslarının fəaliyyətinin dayandırılması yoluxanların çevrəsinin tez müəyyən olunmasına səbəb olacaq. İzolyasiya tədbirləri də bunu hədəfləyib. TƏBİB-in nümayəndəsinin son çıxışında bu məsələ əksini tapıb” - deyə müsahibimiz vurğuladı.
İradə SARIYEVA
