Son zamanlaradək elm üçün naməlum qalan virus kəskin ağciyər xəstəliklərinə səbəb olur. “COVID-19” adı verilən koronavirus artıq Azərbaycan da daxil olmaqla, 200-dən çox ölkədə yayılıb. Dünya boyunca, virusun yayıldığı Çin də daxil olmaqla, 860 mindən çox insan koronavirusa yoluxub.
Hər bir ölkə koronavirusun yayılmasının qarşısının alınması məqsədilə müəyyən tədbirlər həyata keçirir. Azərbaycanda da bu istiqamətdə işlər görülməkdə davam edir. Məlum olduğu kimi, koronavirusun ölkəmizdə yayılmasının qarşısının alınması məqsədilə Nazirlər Kabineti yanında Operativ Qərargah yaradılıb. Operativ Qərargahın müəyyən etdiyi tədbirlər, işlər reallaşdırılır.
Bununla yanaşı, yeni növ koronavirus infeksiyası ilə mübarizə tədbirlərinə cəlb edilən könüllülərə 2020-ci il aprelin 1-dən aylıq 250 manat məbləğində mükafat ödəniləcək.
Məlumat üçün bildirək ki, könüllülük dövründə gənclər respublikamızda aparılan islahatların və inkişafın fəal iştirakçısına çevriliblər, “Eurovision” mahnı müsabiqəsi, I Avropa Oyunları, “Formula 1” yarışları, IV İslam Həmrəyliyi Oyunları kimi irimiqyaslı beynəlxalq tədbirlərin həyata keçirilməsində könüllülərin rolu əvəzsiz olub.
Ekspertlər hesab edirlər ki, karantin dövründə virusla mübarizəyə cəlb edilən könüllülərə maddi yardımın verilməsi müsbət addımdır.
“Dövlət tərəfindən koronavirusla mübarizədə aktiv olan könüllü gənclərimizə ayda 250 manat maaş veriləcək”
Gənclər Mərkəzi İctimai Birliyinin icraçı direktoru Kənan Qubadzadə “Bakı-Xəbər”ə açıqlamasında qeyd etdi ki, bu gün dünya pandemiya kimi qəbul olunan koronavirusdan əziyyət çəkir. Təəssüf ki, bu xəstəlik artıq bizdə də yayılıb. Ölkə rəhbərliyi tərəfindən bu virusla mübarizə üçün ilk olaraq yanvarın 24-də Operativ Qərargah və Koronavirusla Mübarizəyə Dəstək Fondu yaradıldı: “Biz gənclər də çalışırıq ki, çətin günlərdə ölkə başçısının uğurlu siyasətinə dəstək olaq, könüllü olaraq koronavirusun nə qədər təhlükəli ola biləcəyi ilə bağlı insanlarımız arasında maarifləndirmə işləri aparaq. Dövlət tərəfindən koronavirusla mübarizədə aktiv olan könüllü gənclərimizə ayda 250 manat maaş veriləcək. Əlbəttə, bu qərar gənclərə və zəhmətimizə verilən böyük dəyərin göstəricisidir. Biz gənclər ordusu olaraq daim cənab Prezidentin yanındayıq. Onun uğurlu siyasətini dəstəkləyirik. İnanıram ki, cənab Prezidentin uzaqgörən və zamanında verdiyi qərarlar sayəsində koronavirus bəlasından tezliklə qurtulacağıq. Hazırda bu məsələdə insanlarımızın üzərinə də böyük sosial məsuliyyət düşür. Bütün vətəndaşlarımıza Operativ Qərargahın qərarlarına və tövsiyələrə əməl etmələrini və şəxsi gigiyena qaydalarına riayət etmələrini məsləhət görürəm. Vətəndaşlarımız yalnız özlərinin təhlükəsizliyi üçün deyil, yaxınları və bütün cəmiyyətimiz üçün evdə qalmalıdırlar. Əminəm ki, biz bu bəladan həmrəy olaraq tezliklə qurtulacağıq”.
Günel CƏLİLOVA
