Koronavirus pandemiyası ilə bağlı ölkədə elan olunan karantin qaydalarına, təəssüf ki, bütün vətəndaşlarımız əməl etmir. Bu da əlaqədar qurumları daha sərt addımlar atmağa vadar edir. Məlum olduğu kimi, iki gün əvvəl ölkədəki karantin rejimi xüsusi olaraq sərtləşdirilib. Əhaliyə zərurət olmadığı halda küçəyə çıxmamaq tövsiyə olunub. Buna baxmayaraq, paytaxtda və paytaxtətrafı qəsəbələrdə avtomobillərin intensiv hərəkəti müşahidə edilir. Baş Dövlət Yol Polisi İdarəsinin İctimaiyyətlə əlaqələr şöbəsinin rəisi Kamran Əliyev deyib ki, xəbərdarlıqlara baxmayaraq, zərurət olmadığı hallarda vətəndaşların evdən çıxaraq, istər avtomobillə, istərsə də piyada və avtobusla hərəkətində intensivlik azalmır. Onun sözlərinə görə, bununla əlaqədar Abşeron rayonunun Xırdalan şəhərində və digər qəsəbələrində, həmçinin Sumqayıt şəhərində polis postları qurulub:
"Postlarda vətəndaşların sənədləri yoxlanılaraq, zərurət olmadığı təqdirdə hərəkət etmələrinə nəzarət olunacaq və qarşısı alınacaq. Bir daha vətəndaşları Nazirlər Kabineti yanında Operativ Qərargahın müəyyən etdiyi qaydalara riayət etməyə çağırır və koronavirus infeksiyasının yayılmasının qarşısının alınması üçün evdə qalmağa çağırırıq". Sumqayıt və Abşeronda xüsusi məhdudlaşdırıcı tədbirlərin zəruri əsasları nədən doğub?
Mehman Muradlı:“Biz öz əməllərimizlə bu sərtləşmələri zərurətə çeviririk”
üquqşunas Mehman Muradlı “Bakı-Xəbər”ə açıqlamasında bildirdi ki, belə addımların atılması real mənzərədən doğur:“Hüquqi cəhətdən burada hər hansı qanunsuzluq yoxdur. Çünki ölkədə elan edilən karantin rejiminin qaydalarına uyğun addımlardı. Görürsünüz ki, burda hərəkətin tam məhdudlaşmasından söhbət getmir. Müəyyən saatlarda küçəyə çıxmağın tam qadağan edilməsi fövqəladə vəziyyət zamanı tətbiq edilən komendat saatlarında olur. İndi isə əhaliyə qaydalara riayət etmələri ilə bağlı məhdudlaşdırıcı tətbirlər tətbiq edilir. Dediyiniz şəhərlər, demək olar ki, paytaxtın meqapolisinə aiddir. Bakı ilə Sumqayıt arasında məsafə o qədər də böyük deyil. Bu iki şəhərin arasında çox sıx məskunlaşma var. Adi günlərdə, fikir verirdinizsə, həmin istiqamətdəki yolda tez-tez tıxaclar olurdu. Nə qədər qəribə olsa da, biz karantin günlərindəki bəzi saatlarda yenidən həmin yolda tıxacların olduğunu gördük. Bu da onu deməyə əsas verir ki, deməli, bir çox vətəndaşlarımız qadağalara riayət etmir. Həm Sumqayıt, həm də Xırdalandan paytaxtda çoxlu sayda işləyənlər, oxuyan tələbələr gəlirdi. Hazırda onların çoxu üçün paytaxta gəlmək zərurəti yoxdursa, bu sıxlıq niyə var? Deməli, çoxları zərurət olmadan hərəkət edir. Postların qoyulması məsuliyyəti artıracaq. Çünki orda avtomobilləri saxlayıb sənədləri, hara və nə üçün getməyin səbəbləri dəqiq yoxlanacaq. Biz öz əməllərimizlə bu sərtləşmələri zərurətə çeviririk. Ölkədə elan olunan qadağalara riayət edib evdə qalsaq, bu məhdudiyyətlərlə də problemin öhdəsindən gələ biləcəyik. Əlavə sərtləşməyə ehtiyac duyulmayacaq”.
Məhəmmədəli QƏRİBLİ
