02/06/2020 09:39
728 x 90

Koronavirusla mübarizədə Azərbaycan Polisinə hər bir vətəndaşın hərəkətlərinə nəzarət imkanı verən texniki mexanizmlər tətbiq oluna bilər

Şəmsəddin Əliyev: “Ümid edirəm ki, vətəndaşların xüsusi cihaz vasitəsilə polis naryadları tərəfindən izlənməsi nəticə verəcək”

img

Koronavirusa yoluxmanın minimuma endirilməsi və bu epidemiyanın geniş miqyas almaması üçün ölkəmizdə karantin rejimi elan edilsə də, bəzi vətəndaşlar bu rejimin şərtlərinə əməl etmək istəmir və zərurət olmadan şəhərə çıxırlar.

Polis əməkdaşlarının xəbərdarlıqlarına, apardıqları maarifləndirmə söhbətlərinə məhəl qoymaq istəməyən vətəndaşlarla bağlı müxtəlif səviyyələrdə ölçülər götürülür, onlar cərimələnir. Amma, deyəsən, bu cərimələr də bəzi vətəndaşların özündə məsuliyyət hiss etməsinə səbəb olmur. Odur ki, artıq bu istiqamətdə tamamilə yeni bir üsul tətbiq ediləcək. Belə ki, elektron cihazlar vasitəsilə polis naryadları Azərbaycanda hər bir vətəndaşın hərəkətlərini izləyəcək.

Bu barədə İctimai TV-yə müsahibəsində Daxili İşlər Nazirliyinin Baş İctimai Təhlükəsizlik İdarəsinin rəis müavini Əziz Baqişev bildirib: “Həmin məlumatı qəbul edən struktur bunu bütün polis orqanlarında olan planşetlərə ötürəcək. Vətəndaş artıq küçədə saxlanılarkən polis əməkdaşları həmin planşetə baxaraq, vətəndaşın evdən çıxmasına icazənin verilib-verilməməsini biləcəklər. Vətəndaş hətta aptekə və marketə getməsi barədə də məlumat verməli olacaq. Artıq bu işlər tamamlanıb. Yaxın zamanda ictimaiyyətə bu barədə ətraflı açıqlama veriləcək”.

O qeyd edib ki, evdən çıxan vətəndaşlar SMS-lə icazə alacaqlar. Onun sözlərinə görə, hər bir vətəndaşın hərəkətləri polis əməkdaşlarında olan elektron cihazlar vasitəsilə izləniləcək: “Yəni vətəndaş evdən çıxarkən müəyyən nömrəyə zəng etməklə və ya SMS göndərməklə evdən çıxmasının səbəbini izah edəcək”.

Nazirlər Kabinetinin Mətbuat Xidmətinin rəhbəri İbrahim Məmmədov isə mətbuata bildirib ki, bu barədə yaxın saatlarda sərəncam veriləcək.

  • “Bu vasitə həm də vətəndaşın lüzumsuz yerə evdən bayıra çıxmasının qarşısını ala bilər”

“Polisə Dəstək” İctimai Birliyinin sədri Şəmsəddin Əliyev baki-xeber.com-a bildirdi ki, vətəndaşların elektron cihazlar vasitəsilə polis naryadları tərəfindən izlənməsi doğru bir iş olardı. Ş.Əliyev qeyd etdi ki, aidiyyəti qurumların bu üsula əl atmasına, bu izləmə prosesini həyata keçirməsinə bəzi məsuliyyətsiz vətəndaşlar əsas verib. O hesab edir ki, yalnız belə vasitələrlə vətəndaşları evdə saxlamaq və onların zərurət olmadan küçələrə çıxmasının qarşısını almaq olar: “Bilirsiniz, koronavirusa yoluxmamaq üçün hər bir vətəndaş əlindən gələni etməlidir. Bu gün bizim əsas işimiz dövlətin qərarlarına, Prezidentin çağırışlarına əməl edib evdə oturmaq və evimizin içindən dövlətə, cəmiyyətə faydalı olmaqdır. Amma çox təəssüf ki, bəzi vətəndaşlarımız öz vəzifələrinə çox məsuliyyətsiz yanaşır və zərurət olmadan küçəyə çıxırlar. Sözsüz ki, bu gün polis, eləcə də digər aidiyyəti qurumlar çox məsuliyyətlə, yüksək peşəkarlıqla öz vəzifələrinin öhdəsindən gəlir. Polis iş başındadır və ölkənin hər yerində öz vəzifəsini yerinə yetirir. Vətəndaş da gərək öz məsuliyyətini anlasın. Yeri gəlmişkən, mən bu məqamda bir məsələni də vurğulayım. Azərbaycanda çoxlu qeyri-hökumət təşkilatı var. O təşkilatlar tədbir keçirir, qəzet nəşr edir və s. Amma bu gün onların üzərinə düşən ən böyük vəzifələrdən biri koronavirus dövründə əhali arasında ciddi maarifçilik işləri aparmaqdır. Onların üzərinə düşən vəzifə Nazirlər Kabinetinin müvafiq qərarlarını, Prezidentin çağırışlarını əhali arasında təbliğ etmək, onun mahiyyətini geniş izah etmək və insanları bu qərarlara, çağırışlara əməl etməyə çağırmaqdır. Bütün bəşəriyyəti caynağına alan bu xəstəlik qarşısında hamımız acizik, hamı bu virusa qarşı mübarizə aparmalı, təlimatlara əməl etməlidir. İnsanlar nə qədər evdə qalsalar, bir o qədər də yoluxma halları azalacaq, insanlar öz iradəsi ilə sanki bu xəstəliyin qarşısına baryer çəkmiş olacaqlar. Dəfələrlə ölkə başçısı çağırışlar etdi, insanları dövlətin qərarlarına əməl etməyə səslədi, ziyalılar, KİV bu sahədə təbliğat, maarifçilik işləri apardılar. Çox təəssüf ki, bəzi vətəndaşların məsuliyyətsizliyi bu sahədə inzibati yollara əl atılmasına səbəb oldu. Qanunu pozan vətəndaşlara qarşı cəzalar, cərimələr, cinayət məsuliyyəti müəyyən edildi, lakin bunlar da yetərli olmadı və indi də yeni bir üsul meydana  çıxdı. Ümid edirəm ki, vətəndaşların xüsusi cihaz vasitəsilə polis naryadları tərəfindən izlənməsi nəticə verəcək. Bu vasitə həm də vətəndaşın lüzumsuz yerə evdən bayıra çıxmasının qarşısını ala bilər”.

Ş.Əliyev, həmçinin, qeyd etdi ki, bu izləmə prosesi də nəticə verməsə, qanunu pozanlara qarşı daha sərt cəzalar tətbiq edilməlidir.

İradə SARIYEVA

Son xəbərlər