Ermənistan KİV-i noyabrın 4-də İrəvanda keçirilən "KTMT-nin regional təhlükəsizliyin təmin edilməsində rolu" mövzusunda “dəyirmi masa” zamanı Rusiyanın həmin ölkədəki səfiri Sergey Koprıkinin bəyanatını narahatlıqla qarşılayıblar. O deyib ki, KTMT-nin rolu və səmərəliliyi hər zaman həm KİV, həm də ekspertlərin diqqət mərkəzində olub və misal üçün, baş katibin seçilməsi kimi aktual və s. məsələlər daim diqqət mərkəzində saxlanıb.
Səfir qeyd edib ki, “təşkilat daxilində əməkdaşlıqla bağlı, o cümlədən, ayrı-ayrı ölkələrin Azərbaycanla münasibətləri kontekstində suallar var”.
Səfir sonra qeyd edib ki, Ermənistanın bu narazılığının KTMT-nin fəaliyyətinə heç bir aidiyyəti yoxdur. Söhbət ayrı-ayrı ölkələrin tərəflərlə qurduğu münasibətlərdən gedir. Erməni ictimai rəyi isə bunu səfirin mövzunu yayındırmaq cəhdi kimi dəyərləndirir, hətta belə rəylər yazırlar: “Azərbaycanla əməkdaşlıq etdiyinə görə hansı ölkələrin problemlə üzləşdiyini güman etmək olur? Bu, ilk növbədə, Azərbaycana müasir silah satan Rusiya və Belarusdur. Təbii ki, digər dövlətlə münaqişə vəziyyətində olduğuna görə Ermənistanda bununla bağlı suallar yarana bilər.
Digər tərəfdən, KTMT hərbi-siyasi ittifaq sayılır və üzvlərinin bir-biri qarşısında öhdəlikləri var. Yoxsa hansı blokdan söhbət gedə bilər? Ancaq reallıq fərqlidir və “müəyyən ölkələr” bu kimi məsələlər yarandığına görə Ermənistanla incikdirlər”.
Faktiki olaraq məlum olur ki, səfir Ermənistana günahı KTMT-də deyil, özlərində axtarmağı məsləhət bilir. Səfirin bu mövqeyini necə xarakterizə etmək olar?
- Yeganə Hacıyeva: “Bizim cazibəmiz daim Ermənistanın gözünü qamaşdıracaq və o bunun qarşısını almaqla bağlı acizliyini hər zaman bu şəkildə büruzə verəcək”
Politoloq Yeganə Hacıyeva “Bakı-Xəbər”ə bildirdi ki, KTMT-yə ilk böyük hörmətsizliyi Ermənistan etdi: “Paşinyan meydandan hakimiyyət başına gələn kimi atdığı ilk addımlardan biri rotasiya qaydasına görə quruma rəhbərlik edən erməni generalı həbs etmək oldu. Bunu böyük hörmətsizlik kimi qəbul edən KTMT ölkələri Paşinyana sərt təpki göstərdilər. Yadınızdadırsa, həmin vaxt Nazarbayev və Lukaşenko Paşinyanı açıq mətnlə siyasətdə naşı olmaqda günahlandırdılar. Ermənistan rəsmi dairələri KTMT ölkələrinin belə davranışlarını Azərbaycanla olan sıx münasibətləri ilə əlaqələndirdilər. Biz bunu inkar etmirik. Azərbaycanın KTMT-də təmsil olunan ölkələrlə çox yaxın münasibətləri var. Hətta onların hər biri ilə olan əlaqələrimiz Ermənistanla həmin ölkələr arasındakı əlaqələrdən daha sıxdır. Bunu Ermənistan hamıdan yaxşı dərk edir. Ermənistandakı səfir bir daha bunu anlatdı ki, Ermənistanın bu narahatlıqları əbəsdir. Onlar dərk etməlidirlər ki, blokda təmsilçilik münasibətləri ayrıdır, ikitərəfli münasibətlər ayrı. Ermənistan daim belə zənn edib ki, KTMT onların işğal amilini də dəstəkləyə bilər. Belə təbliğatı açıq aparıblar. Amma anlamırlar ki, Azərbaycan öz torpaqlarını tələb edir, Ermənistanın ərazisini yox. Hərbi əməliyyatlar da başlayacağı təqdirdə, biz antiterror əməliyyatını öz ərazimizdə aparacağıq. Bura KTMT-nin müdaxilə haqqı və hüququ yoxdur. Dəfələrlə bu mövqeni KTMT rəhbərləri də bəyan ediblər. Ermənistanın təsəvvürü isə tam başqadır. Onlar çalışırlar ki, KTMT-yə üzvlüklə bizi şantaj etsinlər. Reaksiyalarından belə görünür ki, oradakı üzv ölkələrin Azərbaycana düşmən münasibətini yaratmaq istəyirlər. Bu isə mümkün deyil. Çünki Azərbaycan həmin ölkələr üçün əlverişli, mühüm strateji tərəfdaş olan dövlətdir. Bizim cazibəmiz daim Ermənistanın gözünü qamaşdıracaq və o bunun qarşısını almaqla bağlı acizliyini hər zaman bu şəkildə büruzə verəcək”.
Məhəmmədəli QƏRİBLİ
.jpg)
.jpg)
