Xalqın etimadını itirmiş radikal müxalifətin bütün fəaliyyəti Azərbaycanda ictimai-siyasi sabitliyi pozmağa, vətəndaş qarşıdurması yaratmağa, Prezident İlham Əliyevin rəhbərliyi ilə həyata keçirilən islahatları gözdən salmağa yönəlib. Onlar hələ də hesab edirlər ki, 90-cı illərin əvvəlində olduğu kimi, indi də bu yolla siyasi hakimiyyəti ələ keçirəcək, ölkəni istədikləri kimi idarə edə biləcəklər. Lakin Azərbaycan ictimaiyyəti radikalların bu qeyri-ciddi istəklərinin reallaşmasına imkan vermir, onların antimilli çağırışlarını sərt şəkildə qınayır.
O da məlumdur ki, Azərbaycan inkişaf etdikcə, ölkəmizin tərəqqisini gözü götürməyən qüvvələr, xaricdəki müəyyən dairələr bunun qarşısını müxtəlif yollarla almağa çalışıblar. Bu zaman Azərbaycanın daxilindəki öz maraqlarını hər şeydən üstün tutan, dövlətimizin inkişafını gözü götürməyib, xaosa sürükləyən, ümumiyyətlə, məhvini istəyən qüvvələrin xidmətindən istifadə edirlər. Radikal müxalifətin, xüsusən də AXCP və xarici qüvvələrin layihəsi olan Milli Şuranın son dövrdəki fəaliyyəti bunu bir daha sübut etdi. Bu düşərgəyə daxil olan dəstələrin məqsədi, hansı yolla olur-olsun, Azərbaycanı xaosa sürükləmək, dövlətçiliyə zərbə vurmaqdır.
Müsavat Partiyasının qərargahında İsa Qəmbər, Arif Hacılı, Əli Kərimli, Cəmil Həsənli, Əli İnsanov, Pənah Hüseynin bir araya gəlməsi deyilənlərin bariz nümunəsidir. Hansı ki, bu qüvvələr bir-birinə patoloji nifrət edirlər. Bunu cəmiyyət də bilir. Belə olan halda, adıçəkilən şəxslərin bir araya gələrək guya Azərbaycandakı mövcud ictimai-siyasi vəziyyət və yaranmış durumdan çıxış yolları ilə bağlı müzakirələr aparması gülünc təsir bağışlayır. Aydın məsələdir ki, onlar səmimi deyillər. Çox güman ki, xarici anti-Azərbaycan dairələrin sifarişinə uyğun olaraq, onlar bir araya gəliblər. O baxımdan maraqlıdır, bəs ekspertlər bunu necə dəyərləndirirlər? Radikalların toplantısı xarici sifariş əsasında ola bilərmi?
“Digər tərəfdən, onlar bununla görüntü yaradıb ictimai rəyi çaşdırmaq istəyirlər”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, radikalların məhz xarici dairələrin sifarişi əsasında bir araya gəlmələri ehtimalı böyükdür: “Çünki sözügedən şəxslər bir-birinə nifrət edirlər. Müxtəlif zamanlarda bir-birinin ünvanına olmazın təhqirlər səsləndiriblər, ən ağır formada ittihamlarla çıxış ediblər. Belə olan halda, necə olur ki, indiki vaxtda bir araya gəlirlər? Çox güman ki, onların xaricdəki ağaları belə istəyiblər. Çünki onların hər biri anti-Azərbaycan qüvvələrin əlində alətdir. Azərbaycana qarşı yönəlmiş çirkin kampaniyanın önündə gedirlər və xaricdən gələn sifarişə görə hərəkət edirlər. Bunu radikal müxalifət əməllərində də, fəaliyyətində də dəfələrlə təsdiq edib. Zaman-zaman biz bunun şahidi olmuşuq. Azərbaycanla bağlı uğurlar olan kimi, bəzi xarici dairələr radikallardan bir alət kimi istifadə edirlər. Digər tərəfdən, onlar bununla görüntü yaradıb ictimai rəyi çaşdırmaq istəyirlər. Necə deyərlər, özlərinin varlıqlarını təsdiq etmək, siyasi arenada mövcudluqlarını ortaya qoymaq üçün müəyyən mənada ictimai rəyi çaşdırmaq istəyirlər. Yoxsa, belədə heç cür mümkün deyil ki, bir-birinə patoloji nifrət edən bu şəxslər bir araya gəlsinlər. Bunların səmimiyyətindən söhbət belə gedə bilməz”.
Vidadi ORDAHALLI
