Ermənistanda yaşanan növbəti siyasi qalmaqal bu ölkədə hakimiyyət daxilində həm də yeni parçlanamanın göstəricisi qismində çıxış edir. Baş verənlər həm də onu göstərir ki, ölkədə öz diktaturasını quran Nikol Paşinyan məhkəmə sistemini tam şəkildə ələ keçirmək üçün bu istiqamətdə təzyiqlərini genişləndirməkdədir.
Hazırda qeyd edilən fonda Paşinyanla Konstitusiya Məhkəməsinin sədri Qrayr Tovmasyan və onun tərəfdarları arasında əsl ölüm-dirim savaşının getməsi müşahidə olunur. Xatırladaq ki, parlamentdə Paşinyanın tərəfdarlarından ibarət “Mənim addımım” blokunun təşəbbüsü ilə iqtidarın mübahisəli və qanunsuz qərarlarına etiraz edən Konstitusiya Məhkəməsinin sədri Qrayr Tovmasyanın istefası barədə qərar qəbul edilib. Ermənistan parlamentinin 98 deputatının lehinə səs verdiyi bu təşəbbüs təsdiq edilib və müvafiq qərar baxılması üçün Konstitusiya Məhkəməsinə göndərilib. Onun səlahiyyətlərinə xitam verilməsi üçün məhkəmənin 9 üzvündən 6-nın parlamentin qərarını təsdiq etməsi tələb olunur.
Ölkənin ədliyyə naziri Rustam Badasyan bildirib ki, Konstitusiya Məhkəməsinin sədri bir sıra ciddi səhvlərə yol verib. Ermənistan parlamentinin spikeri Ararat Mirzoyan da Konstitusiya Məhkəməsinin sədrinin öncəki hakimiyyətin əsas müdafiəçilərindən biri olduğunu bildirib. Onun sözlərinə görə, sabiq prezidentlərin komandaları ölkəni talan edib və Qrayr Tovmasyan kimi hüquqşünaslar vasitəsilə məsuliyyətdən yaxa qurtarmağa çalışırlar. Ermənistan parlamentinin vitse-spikeri Alen Simonyan isə Tovmasyanı sabiq prezidentlər Robert Köçəryan və Serj Sarkisyanı müdafiə etdiyi üçün “şeytanın vəkili” adlandırıb. Belə ki, hakimiyyət nümayəndələri Tovmasyanın Köçəryanın işi üzrə məhkəmə iclasında iştirakını qanunsuz hesab edir. Onlar bildirir ki, Konstitusiya Məhkəməsinin sədri ölkənin üçüncü prezidenti Serj Sarkisyanın partiyasının tərəfdarıdır və siyasi sifarişləri yerinə yetirir. Qrayr Tovmasyan isə jurnalistlərə müsahibəsində bildirib ki, Konstitusiya Məhkəməsinin ətrafında cərəyan edən proseslər siyasi xarakter daşıyır. Onun sözlərinə görə, bu təqiblərin məqsədi Konstitusiya Məhkəməsini neytrallaşdırmaq yolu ilə qəbul ediləcək qanunsuz siyasi qərarların önünü açmaqdır. Bundan başqa, bu yaxınlarda onun bacısı, jurnalist Anjela Tovmasyan da Paşinyanın Dağlıq Qarabağla bağlı bəyanatlarını tənqid etdiyi üçün hakimiyyət tərəfindən təqiblərə məruz qalıb. Onun ofisinə basqın edilib, əleyhinə qarayaxma kampaniyası başladılıb. Buna səbəb onun “Əliyevin Paşinyana tutarlı cavabı” sərlövhəli məqalə dərc etməsidir. Anjela Tovmasyan Valdayda Azərbaycan rəhbərinin Paşinyana kifayət qədər sərrast və sərt cavab verdyini bəyan edib və bundan sonra ona qarşı hücumlar başlanıb. Anjela Tovmasyan hökumətdən bu məqaləyə və qardaşının mövqeyinə görə təqiblərə son qoyulmasını tələb edib. Onun sözlərinə görə, Paşinyanın tərəfdarları bir neçə dəfə onun ailəsinə və özünə xəbərdarlıq mesajları göndəriblər.
İndi Paşinyanın əsas istəyi Qrayr Tovmasyanı Konstitusiya Məhkəməsinin sədri vəzifəsindən uzaqlaşdırıb bura öz adamını gətirməkdir. Yuxarıda qeyd olunduğu kimi, bu xüsusda müvafiq qərar parlament tərəfindən qəbul edilib və baxılması üçün Konstitusiya Məhkəməsinə göndərilib. Konstitusiya Məhkəməsi qanunla parlamentin qərarına 30 gün müddətində baxıla biləcəyini qeyd edib. Lakin Paşinyan və onun tərəfdarları hökumətin siyasətini sərt tənqid edən Tovmasyanın tez bir zamanda vəzifədən kənarlaşdırılmasında təkid edir. Məhkəmədən daxil olan məlumatlar isə yüksək məhkəmənin hakimlərinin parlamentarilərin müraciətinə rədd cavabı verdyini üzə çıxarıb. Yəni bu vəziyyətdə Qrayr Tovmasyanı istefaya göndərmək mümkün olmayıb. Məlumata görə, yüksək məhkəmənin hakimləri məsələyə həftənin bazar ertəsi baxaraq parlamentə rədd cavab verib. Belə vəziyyətdə Paşinyan Tovmasyana qarşı başqa formada həmlə etmək qərarına gəlib. Erməni mediası yazır ki, Xüsusi İstintaq Xidməti müstəqil millət vəkili Arman Babacanyanın müraciəti əsasında bir qrup şəxsin hakimiyyəti qəsb etməyə cəhd göstərməsi ilə bağlı cinayət işi açıldığını bəyan edib. Arman Babacanyan özü isə bildirib ki, onun müraciəti Tovmasyana aiddir. Bu fonda isə Tovmasyana qarşı cinayət işi başlanıb. Ermənistan Milli Təhlükəsizlik Xidmətinin əməkdaşları bundan sonra Ararat rayonunun Darakert kəndindəki Tovmasyanın evinə gedərək, təxminən bir saat orada qalıblar. Daha sonra nə səbəbə gəldiklərini demədən evi tərk ediblər. Konstitusiya Məhkəməsi başçısının atası Vardan Tovmasyan jurnalistlərə deyib ki, xidmət əməkdaşları əsasən evin inşası, xüsusən də damın dəyişdirilməsi ilə bağlı suallar veriblər. O, özünün və oğlunun iki qızının Milli Təhlükəsizlik Xidmətinə çağırıldığını deyib.
Ermənistanın keçmiş baş prokuroru Qevorg Kostanyan baş verənləri ölkə daxilində yeni ciddi qarşıdurma kimi xarakterizə edir. Sabiq baş prokuror Tovmasyana qarşı ittihamları darmadağın edəcəyini deyib: "Konstitusiya məhkəməsinin rəhbərinə bu münasibəti qəbuledilməz hesab edirəm. Çünki bu faktın özü məhkəmələrin müstəqilliyini, eləcə də qanunun aliliyinin əsaslarını pozur. Yaxın vaxtlarda ölkədə cinayət qanunvericiliyinin tənzimlənməsi ilə bağlı peşəkar və beynəlxalq hüquq əsaslı bir bəyanatla çıxış edəcəyəm”. O, həmçinin, Tovmasyana qarşı ittiham irəli sürülmə ehtimalına da toxunub. Bildirib ki, Tovmasyanı təqsirləndirilən şəxs qismində cəlb etmək üçün Konstitusiya Məhkəməsinin qərarı lazımdır, amma burada onun daha sonra danışacağı bir nüans var. Qevorg Kostanyan bildirib ki, Tovmasyana qarşı hücumlar Paşinyanın sifarişi əsasında həyata keçirilir. Erməni ekspert Mikayel Nahapetyan isə qeyd edir ki, “erməni inqilabı” Paşinyanın timsalında tədricən özünün “Lenin”ini yaradır:“Baş verənlər Paşinyanın güclə hər şeyi idarə etmək niyyətini ortaya qoyur. Onun hakimiyyəti liderin mövqeyinin cəmiyyətə güclə tətbiq olunduğu diktaturaya çevrilir. Onun addımları avtoritar lider kimi cəmiyyətdə yerini möhkəmləndirmək, siyasi və iqtisadi strateji planların olmamasını gizlətməyə hesablanıb”.
Bütün bunlar qarşıdakı dövr ərzində Ermənistanı hələ çox ciddi problemlərin gözlədiyini deməyə əsas verir.
Nahid SALAYEV
