Ərdoğanla Pens razılığa gəldi - “Barış Pınarı” əməliyyatı 120 saatlığına dayandırılır, ABŞ YPG-ni sərhəddən geri çəkir, Türkiyəyə qarşı sanksiyaları da ləğv edir...
Bu gün Ankarada Türkiyə Prezidenti Rəcəb Tayyib Ərdoğanın ABŞ-ın vitse-prezidenti Maykl Penslə görüşü olub. Baki-xeber.com Türkiyə mediasına istinadən xəbər verir ki, Ərdoğanla Pens arasında mətbuata qapalı olan təkbətək və geniş tərkibli görüş 4 saat 20 dəqiqə çəkib.
Ilkin məlumatlar görə, görüşün əsas mövzuları Türkiyənin Suriyada apardığı “Barış Pınarı” (Sülh bulağı) əməliyyatı və Vaşinqtonun Ankaraya tətbiq etdyi sanksiyalar olub.
Maykl Pensin rəhbərlik etdiyi nümayəndə heyətinin tərkibinə, ABŞ dövlət katibi Maykl Pompeo, Prezident Donald Trampın milli təhlükəsizlik məsələləri üzrə köməkçisi Robert Obraen və Birləşmiş Ştatların Suriya üzrə xüsusi nümayəndəsi Ceyms Ceffri daxildir.
Görüşdən sonra ilk açıqlamanı Pens verib. Vitse-prezident ABŞ və Türkiyənin Suriyada atəşkəslə bağlı razılığa gəldiyini bildirib. Pens “Barış Pınarı” əməliyyatının 120 saat müddətinə dayandırılacağını, bu vaxt ərzində ABŞ-ın YPG-nin bufer zonanın yaradılacağı bölgədən çəkilməsini təmin edəcəyini deyib. ABŞ rəsmisi YPG-nin çəkilmə əməliyyatına başladığını da açıqlayıb: "Onların çəkilməsi artıq başlayıb”. Pens qeyd edib ki, YPG, bölgədən ayrılmaqla bağlı ABŞ zəmanət verib.
Vitse-prezident Türkiyə və ABŞ-ın İŞİD-in Suriyanın şimal-şərqində tamamilə yox edilməsi mövzusunda həmfikir olduğunu söyləyib.
Pens, Türkiyəyə indiyə qədər tətbiq edilən sanksiyaların da ləğv ediləcəyini bildirib: "120 günlük müddətdə yeni sanksiya olmayacaq. Suriyanın şimal-şərqində davamlı atəşkəs təmin edildikdən sonra mövcud iqtisadi sanksiyalar da qaldırılacaq".
ABŞ dövlət katibi Maykl Pompeo da, Türkiyəyə qarşı yeni sanksiyaların olmayacağını, mövcud sanksiyaların da ləğv ediləcəyini deyərək, Pensin sanksiya bəyanatlarını təsdiqləyib.
Türkiyə xarici işlər naziri Mövlud Çavuşoğlu isə danışıqlarda Türkiyənin istədiyini aldığını deyib: “YPG-nin ağır silahlarının toplanması və mövqelərinin və istehkamlarının məhv edilməsi barədə razılığa gəldik. PKK/YPG-nin 120 saat ərzində çəkilməsi üçün “Barış Pınarı” əməliyyatını dayandıracağıq, bu atəşkəs deyil. Ancaq terror ünsürləri tam çıxdıqdan sonra əməliyyatı dayandıracağıq...
Burada təkcə, YPG silahlılarının geri çəkilməsi deyil, YPG-lilərin əlindəki silahların alınması, bu da kifayət deyil, bütün döyüş mövqeləri və istehkamların dağıdılması, məhv edilməsi də var...
32 kilometr dərinlikdə Fıratın şərqində, İraqla sərhədə qədər, yəni 444 kilometr uzunluğunda bir sahədə hər hansı bir terrorçunun qalmaması və bu bölgənin bufer zona kimi qurulması ... Bu, təhlükəsizliyimiz üçün çox vacibdir”.
Türkiyənin Kobaniyə girib-girməyəcəyinə gəlincə, Çavuşoğlu “Pensin dediyi kimi, ora girməyəcəyimizi söyləmədik. Bizim Kobani və ya başqa bir öhdəliyimiz yoxdur” - deyib.
Xatırladaq ki, Türkiyə Silahlı Qüvvələri oktyabrın 9-da Suriyanın şimalını terrorçulardan təmizlənməsi və sərhədyanı ərazilərdə bufer zonasının yaradılması məqsədilə “Sülh çeşməsi” əməliyyatına başlayıb. Ankara bu ərazilərdə suriyalı qaçqınları yerləşdirmək fikrindədir.
