“Bu gün iqtidarda olan bəziləri də islahatlara qarşı çıxış edirlər. Bu islahatlar onların şəxsi maraqlarına toxunur”. Bunu Azərbaycan Prezidenti İlham Əliyev oktyabrın 15-də keçirdiyi iqtisadi müşavirədə deyib.
Dövlət başçısı daha sonra bildirib: “Onlar hər vəchlə bizim işimizə əngəl törətmək istəyirlər. İslahatlara meylli olan, yeni təfəkkürə malik kadrları qaralayırlar, o cümlədən, mətbuatda. Mətbuat, bir növ, daxili mübarizə növünə çevrilib. Bu, dözülməzdir. Mən indi dərinə getmək istəmirəm. Amma bildirməliyəm: bu, dözülməzdir, bir hökumətin bəzi üzvləri digər üzvləri tərəfindən şantaj edilir. Onlar ləkələnir. Prezidentin tapşırığı ilə onların apardığı islahatların üzərinə kölgə salınır. Dözülməz vəziyyətdir”.
Ölkə başçısının fikrincə, kimsə hesab edir ki, biz bununla barışmalıyıq, səhv edir: “Çünki islahatlara alternativ yoxdur. Kim bu yolun yolçusudursa, əlbəttə, işləyəcək. Amma kim buna qarşı çıxır və altdan-altdan bizim işimizə mane olmaq istəyir, əlbəttə ki, biz belə adamlarla bir yolun yolçusu ola bilmərik. Ona görə bir də demək istəyirəm ki, əhali də bilsin və hər kəs mənim sözümü eşitsin. Çox güclü siyasi iradə ortaya qoyulub. Biz Azərbaycanı müasir, sürətlə inkişaf edən, şəffaflığı öz siyasətində bayraq edən ölkə kimi görmək istəyirik və buna nail olacağıq. Heç kim bu işdə bizə mane ola bilməz”.
Prezident İlham Əliyevin hakimiyyət komandasında islahatlara maneə yaradanların olması barədə fikirləri geniş müzakirələrə səbəb olub. Ölkə başçısı bunu deməklə çox önəmli məqamlara toxundu. Məlum oldu ki, hakimiyyət daxilində hökumətin apardığı vahid siyasi xəttə qarşı fəaliyyət göstərənlər var. Onlar bu cür xoşagəlməz fəaliyyətlə görülən işləri tormozlamağa, islahtların effektini aşağı salmağa və bunun nəticəsində ictimaiyyətdə narazılıq yaratmağa çalışırlar. Köhnə təfəkkürə malik olan belə məmurlar yenilikləri qəbul etmək istəmir və öz şəxsi mənafelərinə uyğun idarəçiliklə məşğuldurlar. Bununla belə, ehtimal etmək olar ki, müəyyən beynəlxalq dairələr bunlardan öz mənafeləri üçün istifadə edirlər. Yəni bunun nəticəsində hakimiyyətlə xalq arasında uçurum yaransın, daxildə narazılıqlar baş qaldırsın. Çünki sağlam və praqmatik düşüncəyə malik olan məmur dövlətin maraqlarından çıxış edərək görülən işlərə, yeniliklərə mane olmamalıdır. Ancaq aydın olur ki, yuxarıda sadalanan xoşagəlməz işlərlə məşğul olan bəzi məmurlar bu düşüncədən uzaqdırlar. Onlar istəmirlər ki, islahatçı və dinamik hökumət komandası mövcud olsun.
“Köhnə təfəkkürlü, müasir zamanla ayaqlaşmayan, dövlətimizə töhfə vermək əvəzinə...”
Məsələyə münasibət bildirən millət vəkili Fəzail Ağamalının fikrincə, ölkə başçısı müşavirədə çox ciddi məsələlərə toxundu: “Prezident əldə olunan uğurları qeyd etməklə yanaşı, çatışmayan məqamların da təsnifatını önə çəkdi. Bu nöqsanların aradan qaldırılmasının yollarını göstərdi. Prezident bütün nöqsanların aradan qaldırılmasını önə çəkərək hökumətə öz tapşırıqlarını verdi. Cənab Prezident korrupsiyanın, rüşvətxorluğun, kölgə iqtisadiyyatının aradan qaldırılmasına xüsusi diqqət yetirdi. Ölkə başçısı iri şirkətlərin vergidən yayınmasının yolverilməzliyini vurğuladı. Prezident Azərbaycan iqtisadiyyatına, onun inkişafına mane olan digər məqamları da sadalayıb. Prezidentin çıxışında sözügedən amilləri qabartması kifayət qədər narahatedici məqamdır. Ölkə başçısı səviyyəsində belə problemlərin Azərbaycan ictimaiyyətinin diqqətinə çatdırılması düşündürücüdür. Bəzi məmurlara köhnə təfəkkürlə, köhnə metodlarla fəaliyyət göstərmək onlar üçün yaşam tərzidir. Bu da, əlbəttə ki, yolverilən deyil. Prezident tərəfindən köhnə təfəkkürlü məmurlara çox ciddi xəbərdarlıq edildi. Prezidentin çıxışı növbəti kadr islahatlarının anonsudur. Köhnə təfəkkürlü, müasir zamanla ayaqlaşmayan, dövlətimizə töhfə vermək əvəzinə, inkişafa mane olan məmurların vəzifələrindən uzaqlaşacağı gün çox da uzaqda deyil. Deputat və partiya sədri kimi Prezidentin çağırışlarını birmənalı şəkildə müdafiə edirəm”.
Vidadi ORDAHALLI
