Mətbuatı daxili çəkişmələrə alət kimi qoşmaq istəyən məmurlara ağır xəbərdarlıq...

Məlum olduğu kimi, oktyabrın 15-də Azərbaycan Respublikasının Prezidenti İlham Əliyevin yanında iqtisadi müşavirə keçirilib. Ölkə başçısı çıxışında cəmiyyəti narahat edən bir sıra ciddi məsələlərə toxunub və ölkəmizdə həyata keçirilən islahatlara qarşı kampaniya aparan qüvvələrin əməllərini ifşa edib.

Prezident qeyd edib ki, bu gün iqtidarda olan bəziləri də islahatlara qarşı çıxış edirlər. O vurğulayıb ki, bu islahatlar onların şəxsi maraqlarına toxunur. “Onlar hər vəchlə bizim işimizə əngəl törətmək istəyirlər. İslahatlara meylli olan, yeni təfəkkürə malik kadrları qaralayırlar, o cümlədən, mətbuatda. Mətbuat, bir növ, daxili mübarizə növünə çevrilib. Bu, dözülməzdir. Mən indi dərinə getmək istəmirəm. Amma bildirməliyəm: bu, dözülməzdir, bir hökumətin bəzi üzvləri digər üzvləri tərəfindən şantaj edilir. Onlar ləkələnir. Prezidentin tapşırığı ilə onların apardığı islahatların üzərinə kölgə salınır. Dözülməz vəziyyətdir. Əgər kimsə hesab edir ki, biz bununla barışmalıyıq, səhv edir. Çünki islahatlara alternativ yoxdur. Kim bu yolun yolçusudursa, əlbəttə, işləyəcək. Amma kim buna qarşı çıxır və altdan-altdan bizim işimizə mane olmaq istəyir, əlbəttə ki, biz belə adamlarla bir yolun yolçusu ola bilmərik. Ona görə bir də demək istəyirəm ki, əhali də bilsin və hər kəs mənim sözümü eşitsin. Çox güclü siyasi iradə ortaya qoyulub. Biz Azərbaycanı müasir, sürətlə inkişaf edən, şəffaflığı öz siyasətində bayraq edən ölkə kimi görmək istəyirik və buna nail olacağıq. Heç kim bu işdə bizə mane ola bilməz” - deyə Prezident İlham Əliyev qeyd edib.

• “...sosial mediada saxladıqları troll ordusunu da bu məsələyə cəlb edirlər”

Respublikanın Əməkdar jurnalisti, tanınmış media eksperti Azər Həsrət “Bakı-Xəbər”ə bildirdi ki, ölkə başçısının iradları haqlıdır və həqiqətən də bəzi media orqanlarından dövlətin həyata keçirdiyi islahatları hədəfə almaq aləti kimi istifadə edən məmurlar var: “Cənab Prezident yenə də bütün ictimaiyyətə göstərdi ki, o, ölkədə baş verən bütün prosesləri çox yaxından izləyir. Xüsusən də mətbuatla bağlı prosesləri çox yaxşı bilir və kimin hansı şəkildə mətbuatdan sui-istifadə etdiyindən xəbərdardır. Yəni Prezident vurğuladı ki, bizim kadrlara qarşı mətbuatdan istifadə olunur. Bu artıq, faktiki olaraq, köhnə qafalı və ölkədə aparılan islahatlara əngəl olmağa çalışan adamlara sonuncu xəbərdarlıq kimi qəbul edilə bilər. Cənab Prezident özü də qeyd etdi ki, bu davam edərsə, biz yollarımızı ayırmalı olacağıq. Düşünürəm ki, ölkəmizdə aparılan islahatlara, həyata keçirilən yeniliklərə əngəl olmağa çalışan insanları, xüsusən də cənab Prezidentin etimad göstərib irəli çəkdiyi kadrları bəzi media orqanları vasitəsilə sabotaj etməyə, gözdən salmağa çalışanlar ciddi şəkildə düşünməlidirlər. Həqiqətən Azərbaycan insanı bu gün daha yaxşı yaşamağa layiqdir və bu onun haqqıdır. Azərbaycan Prezidenti də vətəndaşların rifah halının yüksəldilməsi üçün durmadan çalışır, sadəcə, köhnə təfəkkür sahibi olan bəzi şəxslər bu islahatları, bu addımları sobataj etməklə məşğuldurlar. Təəssüflər olsun ki, bunu da bəzi məmurlar əllərində saxladıqları media orqanları vasitəsilə həyata keçirirlər, eyni zamanda, sosial mediada saxladıqları troll ordusunu da bu məsələyə cəlb edirlər. Fikrimcə, bu məsələlər öz həllini tezliklə tapmalıdır və o şəxslər bir daha bu cür əməllərlə məşğul olmamalıdırlar. Ümumiyyətlə, nazirin, məmurun, hansısa vəzifəli şəxsin öz ətrafında media orqanı saxlamaq praktikasına son qoyulmalıdır. Azərbaycan dövlətinin media siyasətini Azərbaycan Respublikası Prezidentinin başçılığı altında Prezident Administrasiyası icra edir və təbii, dövlətin bu vacib sahəsinə hansısa vəzifəli şəxslər müdaxilə etməməlidirlər. Düşünürəm ki, cənab Prezident bu ismarıcı verdi və bundan da hər kəs öz hesabını götürəcək”.

A.Həsrət bəzi məmurların bir-birinə qarşı şantaj vasitəsi, aləti seçdiyi bəzi media orqanlarının da müxtəlif məmurlara məxsus olduğunu qeyd etdi. Bu media orqanları ilə bağlı hər hansı bir problem baş verdikdə onun arxasından iri dövlət məmurları çıxır. “Bu qəzetlərin, media orqanlarının sahibləri məmurlar, hakimiyyətdə təmsil olunan vəzifəli şəxslərdir. Tutalım, Mətbuat Şurası tərəfindən həmin media orqanlarının adları “qara siyahı”ya salındıqda, həmin media orqanının arxasından böyük bir məmur, nazir çıxır. Bu tip adamlar cənab Prezidenti və komandasını hədəfə alırlar. Azərbaycan Prezidentinin siyasi komandası vahiddir və bu komandada kimsə ikitirəlik yaratmaq haqqında düşünməsin. İkincisi də vahid komandanın da vahid media siyasəti var. Yəni Azərbaycan Prezidenti vahid media siyasəti yürüdür. O siyasətin də mərkəzində Azərbaycanda mətbuat azadlığının tam təmin edilməsi, jurnalistlərin azad, sərbəst şəkildə fəaliyyət göstərməsi dayanır. Bunu sobataj edən adamlar, sözsüz ki, cənab Prezidentə qarşı çıxan adamlardır. Düşünürəm ki, cənab Prezident də bundan narahatdır və bu ifadələri işlədib onlara öz ismarıcını göndərib. Hesab edirəm ki, yaxınlarda o tip adamlarla cənab Prezidentin yollarının ayrılacağının şahidi olacağıq” -deyə A.Həsrət bildirdi.

İradə SARIYEVA