Məlum olduğu kimi, cari ilin 11 oktyabr tarixində Azərbaycanın işğal olunmuş ərazilərində yaradılmış qondarma rejim tərəfindən təşkil olunan məlum tədbirdə Rusiya Federasiyasının Dövlət Dumasının MDB işləri, Avrasiya inteqrasiyası və soydaşlarla əlaqələr komitəsi sədrinin birinci müavini Konstantin Zatulinin iştirakı ilə əlaqədar Rusiya Federasiyasının Xarici İşlər Nazirliyinə Azərbaycan tərəfinin narahatlığını ifadə edən rəsmi nota göndərilib.
Azərbaycanın Rusiyadakı səfirliyinin yaydığı məlumata görə, notada separatçılığı açıq şəkildə dəstəkləyən Konstantin Zatulinin qeyd edilən tədbirdə ölkəmizin suverenliyi və ərazi bütövlüyünə qarşı səsləndirdiyi növbəti təxribat xarakterli bəyanatlarına və Azərbaycan Respublikası ilə Rusiya Federasiyası arasında mövcud olan yüksək səviyyəli əməkdaşlığa xələl gətirən çıxışlarına Rusiya tərəfindən münasibətin bildirilməsi, həmçinin, rusiyalı deputatın işğal altında olan ərazilərə hansı qismdə səfər etməsi və sözügedən səfərin kimin tərəfindən maliyyələşdirilməsi ilə bağlı məlumatın dəqiqləşdirilməsi xahiş edilib.
Bundan əlavə, notada K.Zatulinin mütəmadi şəkildə Ermənistan-Azərbaycan Dağlıq Qarabağ münaqişəsinin həlli ilə bağlı Rusiyanın siyasi mövqeyinə zidd olan fikirlər irəli sürməsinə, tarixi faktları açıq şəkildə təhrif etməsinə, Ermənistanın apardığı işğalçı siyasətə bəraət qazandırmaq cəhdlərinə müvafiq qiymətin verilməsinin vacibliyi vurğulanıb, onun bir deputat kimi öz sözlərinə və hərəkətlərinə görə məsuliyyət daşımalı olduğuna diqqət çəkilərək, Rusiya Xarici İşlər Nazirliyindən lazımi tədbirlərin görülməsi rica edilib.
O da məlumdur ki, son illər Rusiya-Azərbaycan münasibətlərində ciddi yaxınlaşma müşahidə edilir. İki ölkə arasında bütün sahələrdə əlaqələr inkişaf edir, dərinləşir. Aydın məsələdir ki, Ermənistan Rusiya-Azərbaycan münasibətlərinin inkişafından və bu istiqamətdə gedən proseslərdən çox narahatdır. İki ölkə arasında müşahidə edilən bu yaxınlaşmanı həzm edə bilmir və bunu pozmaq üçün müxtəlif təxribatlara əl atır. O cümlədən, Rusiyada ermənilərin mövqeyindən çıxış edən müəyyən dairələr münasibətlərə kölgə salmaq istəyirlər.
Bu baxımdan Zatulinin Dağlıq Qarabağa qanunsuz səfəri, orada səsləndirdiyi fikirlər Rusiya-Azərbaycan yaxınlaşmasını pozmaq üçün təxribat ola bilırmi?
“Kreml iki dövlətin qonşuluq əlaqələrinə qiymət verərək ölkəmizin ərazi bütövlüyünə qarşı bu kimi təxribatlara icazə verməməlidir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, Qarabağda separatçı qurumun keçirdiyi tədbirdə Rusiya Dumasının deputatı K.Zatulinin iştirakı və ölkəmiz əleyhinə bəyanatları birbaşa erməni lobbisinin Rusiya-Azərbaycan əlaqələrinə kölgə salmaq siyasətinin tərkib hissəsidir: “Minsk Qrupunun həmsədri kimi Rusiyanın münaqişə zonasına deputatının gəlişi və digər tərəfə qarşı ədalətsiz mövqeyi Kremlin vasitəçiliyinə kölgə salmış oldu. Ermənistan daim ölkəmiz əleyhinə Rusiya faktorundan yararlanmağa çalışır. Bu məqsədlə bu kimi təxribatlara əl atır. Zatulin Rusiyada erməni lobbisinin əsas dayaqlarından biridir. Azərbaycanın mövqeyi Rusiya Dumasına çatdırıldı. Hesab edirəm ki, Kreml iki dövlətin qonşuluq əlaqələrinə qiymət verərək ölkəmizin ərazi bütövlüyünə qarşı bu kimi təxribatlara icazə verməməlidir. Belə səfərlər ikitərəfli əlaqələrə kölgə salmış olur. Rusiyanın regionda strateji maraqlarını nəzərə alsaq, ermənilər bununla Kremlin region siyasətinə qarşı gəlmiş olurlar. Çünki Rusiya Azərbaycanla əlaqələrə önəm verir. Hazırda Rusiyada bir sıra dairələr Ermənistanın maraqlarının qorunması istiqamətində işlər aparırlar. Hesab edirəm ki, Azərbaycanın mövqeyi qəti şəkildə Moskva tərəfindən nəzərə alınacaq. Artıq 10 il bundan əvvəlki dövr deyil ki, Azərbaycanın maraqları nəzərə alınmaya. Hazırda kifayət qədər siyasi cəhətdən möhkəmlənərək, regionda öz şərtlərimizi diktə edə bilirik. Məhz bu kontekstdə Ermənistanın bütün təxribatlarının qarşısını almaq olar”.
Vidadi ORDAHALLI
