12/11/2019 22:44
728 x 90

Türkdilli dövlətlərin onillik inteqrasiya prosesində Azərbaycanın rolu – Prezident konkret istiqamətlər göstərdi...

Elman Nəsirov: “Azərbaycan türkdilli ölkələr arasında inteqrasiya prosesində çox mühüm rol oynayır”

img

Türkdilli Dövlətlərin Əməkdaşlıq Şurasının (Türk Şurası) Bakıda keçirilən VII Zirvə görüşü bir neçə cəhətdən əlamətdar oldu. Bakı sammiti Türk Şurasının getdikcə gücləndiyini, nüfuzlu quruma çevrildiyini bir daha təsdiqlədi. Sammitin gedişində aydın oldu ki, qurum türkdilli ölkələr arasında iqtisadi, siyasi, nəqliyyat-logistika, humanitar, mədəni və digər sahələrdə münasibətlərin daha da dərinləşməsində mühüm rol oynayır.

Ötən on ildə sözügedən ölkələrin inteqrasiyası ilə bağlı bir sıra işlər görülüb. Prezident İlham Əliyev tədbirdə çıxışında bununla bağlı çox önəmli məqamlara toxunub: “Ötən on il ərzində Türkdilli Dövlətlərin Əməkdaşlıq Şurası bir təşkilat kimi əhəmiyyətli inkişaf yolu keçib. Şura ölkələrimiz arasında siyasi, iqtisadi, nəqliyyat, humanitar, turizm, informasiya və kommunikasiya texnologiyaları və digər sahələrdə əməkdaşlığın inkişafında mühüm rol oynayır. Türk Şurasının mötəbər beynəlxalq təşkilatlarla əlaqələri genişlənir. Hazırda BMT, İslam Əməkdaşlıq Təşkilatı, ATƏT, İqtisadi Əməkdaşlıq Təşkilatı kimi qurumlarla səmərəli əməkdaşlıq mövcuddur. TÜRKSOY, Türk Mədəniyyəti və İrsi Fondu, Türk Akademiyası zəngin mədəni irsimizin tədqiqi, maddi və mənəvi dəyərlərimizin dünya səviyyəsində təbliğində əhəmiyyətli rol oynayır”.

Görünən odur ki, ötən 10 ildə türk ölkələri böyük inteqrasiya yolu keçiblər. Bu istiqamətdə bir sıra işlər görülüb. Ümumilikdə, Azərbaycan bu işdə hansı rolu oynayıb?

  • “Bütün bunlar, nəticə etibarilə, Türk Şurası daxilində əməkdaşlıq mühitinin inkişafı üçün geniş imkanlar açır”

Məsələyə münasibət bildirən millət vəkili Elman Nəsirovun sözlərinə görə, Azərbaycanın türkdilli ölkələrin inteqrasiyasında rolu böyükdür: “Azərbaycan türkdilli ölkələr arasında inteqrasiya prosesində çox mühüm rol oynayır. Ötən 10 il ərzində Azərbaycan bu yöndə böyük işlər görüb. Çünki Azərbaycanın bununla bağlı siyasi, iqtisadi, tranzit potensialı, diplomatik imkanları böyükdür. Humanitar sahədəki imkanları çox genişdir. Nəzərə almaq lazımdır ki, Türkdilli Dövlətlərin Əməkdaşlıq Şurasının təsis olunduğu məkan da Azərbaycandır. Sözügedən qurum 2009-cu ildə Naxçıvan şəhərində təsis edilib. O vaxtdan artıq 10 il keçib və Bakı yubiley sammitinə evsahibliyi etdi. Eyni zamanda, türkdilli dövlətlər arasında əməkdaşlığın möhkəmləndirilməsi və inteqrasiya proseslərinin sürətləndirilməsi sahəsində növbəti həlledici addım atıldı. Artıq Özbəkistan da bura daxil oldu. Türkmənistanın da analoji addım atacağı gözlənir. Bütün bunlar onu təsdiqləyir ki, Türk Şurasının cəlbedicilik əmsalı kifayət qədər böyükdür. Prezident İlham Əliyev tədbirdəki çıxışında bəyan etdi ki, Azərbaycan bu günləri dünyada multikultural dəyərləri paylaşır. Birgəyaşayış mədəniyyətini ixrac edir. Millətlər arasında sülh və barışıq istiqamətində çox mühüm işlər görür. Bu məsələdə bir nümunədir. Təbii ki, bütün bunlar, nəticə etibarilə, Türk Şurası daxilində əməkdaşlıq mühitinin inkişafı üçün geniş imkanlar açır. İqtisadi-ticarət, humanitar, mədəniyyət və digər sahələrdə əməkdaşlığın daha geniş perspektivləri var”.

Vidadi ORDAHALLI

Son xəbərlər