Türkiyə Silahlı Qüvvələri tərəfindən Fərat çayının şərqini terror təşkilatlarından təmizləmək məqsədilə oktyabrın 9-dan başladılan “Barış Pınarı” (Sülh bulağı) əməliyyatı davam edir. Baki-xeber.com xəbər verir ki, Türkiyə ordusu və Suriya Milli Ordusu Tel Abyad və Rəsulaynı tam nəzarət altına aldıqdan sonra Menbiçə doğru irəliləməyə başlayıb.
Bu barədə hələlik rəsmi məlumat açıqlanmasa da, Türkiyə mediasında Menbiçi ələ keçirmək üçün əməliyyatın başladığı bildirilir. Suriya Milli Ordusu da əməliyyatın başladığını təsdiqləyib.
Bundan bir gün sonra isə ABŞ-ın rəhbərlik etdiyi koalisiya Amerika qüvvələrinin Türkiyənin hədəfində olan Münbiçdən tam çıxdığını açıqlayıb. Koalisiya bu barədə məlumatı "Twitter" hesabında yayıb.
"Koalisiya qüvvələri Suriyanın şimal-şərqindən geri çəkilir. Biz Münbiçdən kənardayıq" – açıqlamada deyilir.
Rusiya Müdafiə Nazirliyi də ABŞ-ın Münbiçdən çəkildiyini və rus muzdluları və Əsəd qüvvələrinin şəhərə girdiyini açıqlayıb. Şəhərdə Rusiya əsgərlərinin görüntüləri də yayılıb, binalarda Rusiya və Suriya bayraqları asılıb.
Bundan əvvəl isə ABŞ Prezidenti Türkiyəyə qarşı sanksiyalar tətbiq edib. ABŞ Türkiyənin Suriyada həyata keçirdiyi "Barış bulağı" əməliyyatını hədəf alaraq 3 nazir və 2 nazirliyi sanksiya siyahısına aldığını açıqlayıb.
ABŞ Dövlət katibi Mayk Pompeonun sözlərinə görə, sənəd Ankaraya təzyiq göstərərək Türkiyəni Suriyada həyata keçirdiyi əməliyyatı dayandırmağa məcbur etmək üçün nəzərdə tutulub.
Dövlət katibinin yazılı bəyanatında deyilir ki, sanksiya çərçivəsində tətbiq olunmuş məhdudiyyətlər fəaliyyəti ilə regionda "mülki vətəndaşlar üçün təhlükə yaradan və ya sülhü, təhlükəsizliyi və sabitliyi sarsıdan" şəxsləri və təşkilatları əhatə edə bilər.
ABŞ Maliyyə Nazirliyi bildirib ki, sanksiya siyahısına artıq Türkiyənin müdafiə naziri Hulusi Akar, energetika naziri Fatih Donmez və daxili işlər naziri Süleyman Soylu düşüblər. Açıqlamada Türkiyənin müdafiə və energetika nazirliklərinin də sanksiya siyahısına salındığı bildirilib.
Bundan başqa, bir müddət öncə xəbər verilib ki, Vaşinqton Türkiyə istehsalı olan polad üçün tarifləri 50 faizədək artırmaq niyyətindədir. Birləşmiş Ştatlar, həmçinin, Ankara ilə 100 milyard dollar dəyərində razılaşma ilə bağlı danışıqları dayandıracaq.
