17/11/2019 04:49
728 x 90

Faşist Njdenin heykəli məsələsi MDB-nin sammit sənədlərində yer alıb?

Vüqar Rəhimzadə: “Belə bir müddəanın olması Njdenin İrəvandakı heykəlinin sökülməsinə gətirib çıxara bilər”

img

Məlum olduğu kimi, bu günlərdə Türkmənistanın paytaxtında MDB Dövlət Başçıları Şurasının məhdud tərkibdə iclası keçirilib. İclasda Prezident İlham Əliyev də iştirak edib. İclasın gündəliyindəki məsələlərdən biri Böyük Vətən Müharibəsində qələbənin 75 illiyi ilə əlaqədar dövlət başçılarının Birlik ölkələrinin xalqlarına və dünya ictimaiyyətinə müraciəti ilə bağlı olub.

Bu məsələnin müzakirəsi zamanı çox maraqlı hadisə baş verib. Prezident İlham Əliyev faşistlərin qəhrəman kimi qələmə verilməsinin qəbuledilməz olduğunu xatırladıb. Bu kontekstdə Ermənistanda müşahidə edilən bir prosesi tədbir iştirakçılarının diqqətinə çatdırıb: “Təəssüf ki, MDB məkanında, xüsusən Ermənistanda belə hallar baş verir. Orada əvvəlki hakimiyyət Yerevanın mərkəzində faşist cəlladı və satqın, Qaregin Njde ləqəbi ilə alman faşistlərinə xidmət etmiş Qaregin Ter-Arutyunyana heykəl qoyub. MDB ölkələrindən olan müharibə veteranlarının böyük bir qrupu Ermənistanın əvvəlki rəhbərliyinin bu həyasız addımına qarşı dəfələrlə etirazını bildirib”.

Paşinyanın çavab vermək cəhdi isə çox uğursuz olub. Onun açıqlamasından belə məlum olub ki, Njde faşistlərə xidmət etsə də, vaxtilə türklərlə müharibə aparıb, ona görə də "qəhrəman"dır və heykəli olmalıdır. Bununla Paşinyan özünü gülünc vəziyyətə qoyub. İlham Əliyevin toxunduğu məlum məqamlar Njdenin heykəlinin sökülməsi məsələsini gündəmə gətirib. Başqa bir tərəfdən, bəzi məlumatlara görə, MDB Dövlət Başçıları Şurası iclasının sənədlərinə İkinci Dünya Müharibəsində faşistlərə xidmət edənlərin adının əbədiləşdirilməsinin yolverilməz olduğu ilə bağlı məqam daxil edilib. Maraqlıdır bu, Njdenin İrəvandakı heykəlinin sökülməsində necə rol oynaya bilər? Gələn il Böyük Vətən Müharibəsində qələbənin 75 illiyi qeyd ediləcək. O vaxta qədər sözügedən heykəl sökülə bilərmi?

  • “Ancaq gərək digər MDB dövlətləri də bu yöndə səylərini artırsınlar”

Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, belə bir müddəanın olması Njdenin İrəvandakı heykəlinin sökülməsinə gətirib çıxara bilər: “Ancaq gərək digər MDB dövlətləri də bu yöndə səylərini artırsınlar. Prezident İlham Əliyev həmin tədbirdə çox uğurlu çıxış edərək Ermənistanın simasını ortaya qoydu. Onun çıxışı birmənalı şəkildə ədaləti, obyektivliyi ortaya qoydu. Hesab edirəm ki, digər MDB dövlətləri də bununla bağlı lazımi addımlar atmalı və mövqe ortaya qoymalıdırlar. Çünki Ermənistanın Njdeni “qəhrəmanlaşdırması” bütün MDB dövlətlərinə, onların keçmişinə, tarixinə hörmətsizlikdir. Ona görə də bu abidənin hələ də qalması yolverilməzdir. Fikrimcə, sözügedən müddəanın sənədlərdə öz əksini tapması təsdiq olunarsa, bu, Ermənistana güclü zərbə olacaq. Azərbaycan rəhbərliyi bu məsələdə üzərinə düşən işi görüb. İndi növbə digər MDB dövlətlərinindir. Onlar bu işdə siyasi iradə ortaya qoymalıdırlar”.

Vidadi ORDAHALLI

Son xəbərlər