17/11/2019 03:55
728 x 90

Münaqişənin mahiyyətini təhrif etməyə yönəlik Ermənistanın daha bir cəhdi – “Azərbaycan ermənilərsiz Qarabağ istəyir”?...

Mübariz Əhmədoğlu: “Məqsəd, nəyin bahasına olursa-olsun, münaqişənin mahiyyətini təhrif etmək və problemin həllini yubatmaqdır”

img

Ermənistan zaman-zaman Dağlıq Qarabağ münaqişəsinin tənzimlənməsi ilə bağlı səslənən fikirləri təhrif edir. Bu yöndə, fürsət düşən kimi, qarşı tərəf  bununla bağlı cəhdlər edir.

Bu günlərdə Prezident İlham Əliyev Bakının Qaradağ rayonunda məcburi köçkünlər üçün salınmış “Qobu Park-2” yaşayış kompleksinin açılışında iştirak edərkən Dağlıq Qarabağ münaqişəsinin həlli ilə bağlı bir sıra məqamlara toxunub. O cümlədən, ölkə başçısı işğaldan azad edilən ərazilərin bərpasından danışıb: “Əsas məsələ bu gün hələ də işğal altında olan torpaqlar azad ediləndən sonra orada yeni binaların, kəndlərin, şəhərlərin salınmasıdır. Bunu da biz edəcəyik, necə ki, vaxtilə işğal altında olmuş Dağlıq Qarabağ Muxtar Vilayətinin inzibati ərazisində yerləşən Şıxarx qəsəbəsində bu gün gözəl bir şəhərcik salınıb. Orada da 1000-dən çox ailə məskunlaşıb”.

Azərbaycan dövlət başçısının səsləndirdiyi bu fikirləri əlində bayraq edən Ermənistan Xarici İşlər Nazirliyinin mətbuat katibi Anna Nağdalyan iddia edir ki, guya Azərbaycan Qarabağda ermənilərin varlığını istəmir, ermənilərsiz Dağlıq Qarabağı bərpa etmək istəyir. Daha sonra A.Nağdalyan həyasızcasına bunları deyib: “Münaqişənin həllinin Marağa (Şıxarx) versiyasının təşviqi Azərbaycan rəhbərliyinin xalqları sülhə deyil, digər xalqlara qarşı zorakılığa hazırlamaqla bağlı həqiqi niyyətini ortaya qoyur”.

Halbuki, Azərbaycan dəfələrlə bəyan edib ki, Dağlıq Qarabağ işğaldan azad ediləndən sonra Azərbaycan və erməni icmalarının birgə yaşayışı təmin ediləcək. Çünki Dağlıq Qarabağda yaşayan etnik ermənilər Azərbaycan vətəndaşıdırlar. Görünən odur ki, ilk dəfə deyil Ermənistan rəhbərliyi Qarabağ münaqişəsinin mahiyyətini təhrif edən açıqlamalar verir. Bundan bir müddət əvvəl Ermənistanın Baş naziri Nikol Paşinyan BMT-də çıxışında bəyan etdi ki, guya Dağlıq Qarabağ münaqişəsi ərazi mübahisəsi deyil: “Azərbaycan hökuməti Qarabağ münaqişəsini Ermənistanla Azərbaycan arasındakı ərazi mübahisəsi kimi təqdim edir. Biz münaqişənin bu cür təfsiri ilə tamamilə razı deyilik. Bu, Ermənistanla Azərbaycan arasında mübahisə deyil. Bu mübahisə ərazi iddiaları ilə bağlı deyil”.

Hansı ki, Azərbaycanla yanaşı, bütün dünya, o cümlədən, beynəlxalq təşkilatlar Qarabağ münaqişəsini ərazi mübahisəsi kimi qəbul edirlər. O cümlədən, ATƏT-in Minsk Qrupu məsələyə bu cür yanaşır. İndi də Ermənistan XİN rəsmisi A.Nağdalyan da “Azərbaycan ermənilərsiz Qarabağ istəyir” deməklə münaqişənin mahiyyətini təhrif etməklə bağlı uğursuz cəhd edir.

  • “Nağdalyanın səsləndirdiyi fikirlər cəfəngiyyatdır”

Məsələyə münasibət bildirən Siyasi İnnovasiya və Texnologiyalar Mərkəzinin rəhbəri Mübariz Əhmədoğlunun sözlərinə görə, A.Nağdalyanın səsləndirdiyi fikirlər erməni riyakarlığının növbəti nümunəsidir: “Ermənistan tərəfi zaman-zaman Qarabağ münaqişəsinin mahiyyəti ilə bağlı təhrifedici məzmunlu məlumatlar yayıb. İstər əvvəlki hakimiyyətlərin dövründə, istərsə də indiki Paşinyan hakimiyyətinin vaxtında dəfələrlə bunun şahidi olmuşuq. Ümumiyyətlə, belə götürəndə ermənilər natamamlıq kompleksi olan bir millətdir. Ona görə də hərə öz prizmasından çalışır ki, Azərbaycana qarşı iftira atsın. Məqsəd, nəyin bahasına olursa-olsun, münaqişənin mahiyyətini təhrif etmək və problemin həllini yubatmaqdır. Azərbaycan Dağlıq Qarabağa aid olan ərazidə dağıdıcılıqla məşğul  olmayıb, əksinə, həmin əraziləri abadlaşdırır, orada qəsəbə salır. İşğal altında olan digər ərazilər də azad ediləndən sonra bənzər işlər davam etdiriləcək. Azərbaycanın, Ermənistandan fərqli olaraq, bunu etmək üçün iqtisadi imkanları da böyükdür. A.Nağdalyanın məlum yanaşması həm də onu göstərir ki, işğalçı ölkə hakimiyyəti qurub-yaratmağı qəbul etmir. Onların işi ancaq dağıtmaqdır. Bununla yanaşı, Azərbaycan rəsmiləri heç vaxt bəyan etməyiblər ki, Dağlıq Qarabağda etnik ermənilər yaşaya bilməz. O baxımdan Nağdalyanın səsləndirdiyi fikirlər cəfəngiyyatdır. Deyilənlər Qarabağ münaqişəsinin mahiyyətini təhrif etmək və pozuculuq məqsədi daşıyır”.

Vidadi ORDAHALLI

Son xəbərlər