17/11/2019 04:24
728 x 90

Şuşada İran-erməni elm-mədəniyyət mərkəzi? - Açılışda İrandan kimsə iştirak etmədi...

Nəzakət Məmmədova: “Ermənistanın bu əməlinə İranın göz yumması onu da bu qanunsuzluğa ortaq etmiş olur”

img

Erməni mediasının verdiyi məlumata görə, ermənilər Şuşa şəhərindəki Gövhər ağa məscidinin “təmir-bərpa”sından sonra açılış mərasimi keçiriblər. Qeyd edilir ki, İranın “Part Saman Jahan” memarlıq şirkətinin iştirakı və erməni əsilli Rusiya biznesmeni Ruben Vardanyanın “İDEA” fondunun maliyyə yardımı ilə aparılan “təmir işləri”ndən sonra ermənilər 1883-cü ildə ərsəyə gələn Yuxarı Gövhər ağa məscidini “İran memarlığının nümunəsi” olaraq təqdim ediblər.

Qeyd olunub ki, məscidin “təmiri”nə 2014-cü ildən start verilib və nəhayət, işlər başa çatdırılıb. Qondarma qurumun başçısı Bako Saakyanın iştirakı ilə keçirilən tədbirdə sərsəm iddialar səsləndirilib: “İran İslam Respublikasında bizim monastır və kilsələr qorunur. Biz də “Artsax” ərazisində, həmçinin, Şuşada İran mədəniyyəti abidələrinin bərpası ilə məşğul oluruq. Bu, İran-erməni dostluğunun nümunəsidir”. Bildirilib ki, bu kompleks İran-Ermənistan elm və mədəniyyət mərkəzi kimi fəaliyyət göstərəcək.

Rəsmi Bakı bir neçə gün öncə ermənilərin bu tarixi saxtalaşdırmaq cəhdinə etiraz edib. Maraqlıdır ki, Azərbaycanın işğal altında olan şəhərində “təmir” olunan məscidin İran-Ermənistan elm və mədəniyyət mərkəzi kimi fəaliyyət göstərəcəyinə dair xəbər verilir, amma açılışda bir nəfər də olsun İran nümayəndəsi olmayıb. Əgər bu, növbəti erməni təxribatı deyilsə, onda İran dövləti buna niyə etiraz etmir?

  • “İşğal olunmuş Azərbaycan torpaqlarında yerləşən tarixi abidənin işğalçılar tərəfindən təmir olunmasına İran mütləq şəkildə etiraz etməli idi”                        

Politoloq Nəzakət Məmmədova “Bakı-Xəzbər”ə açıqlamasında bildirdi ki, məscidin təmiri İranın Ermənistanın işğalçılıq siyasətinə dəstək verməsinin növbəti təzahürüdür: “Bu, tamamilə qanunsuz bir addımdır. Ermənistanın bu əməlinə İranın göz yumması onu da bu qanunsuzluğa ortaq etmiş olur. İşğal olunmuş Azərbaycan torpaqlarında yerləşən tarixi abidənin işğalçılar tərəfindən təmir olunmasına İran mütləq şəkildə etiraz etməli idi. Digər tərəfdən, İran UNESCO təşkilatının müsəlman üzvü olaraq Ermənistanın Qarabağdakı müsəlman tarixi abidələrinə qarşı barbarlıq əməli baş verən zaman etirazını bildirməli idi. Lakin, görünür, İrana bu sərf edir. Üstəlik, həmin abidəni İran şirkətinin təmir etdiyi bildirilir. İran tərəfi isə guya bundan xəbərsiz olduğunu bildirir. Halbuki, İran çox güclü kəşfiyyatı olan ölkədir və istər ölkədə, istər ölkə xaricində fəaliyyət göstərən şirkətlərin fəaliyyəti barədə müfəssəl məlumatlara malikdir. Həmin abidə İran-Ermənistan mədəniyyət mərkəzi kimi fəaliyyət göstərəcəksə, bu, birbaşa İran xüsusi xidmət orqanlarının nəzarəti altında olması deməkdir. Çünki, bir qayda olaraq, dünyada mədəniyyət mərkəzləri xüsusi xidmət orqanlarının nəzarətində olurlar. Bu baxımdan həmin məscidin İran xüsusi xidmət orqanlarının Azərbaycanın işğal olunmuş ərazilərində fəaliyyət göstərən örtük təşkilatı olacağı şübhə doğurmur. Hesab edirəm ki, İranın "Part Saman Cahan" şirkəti haqda beynəlxalq hüquqi məsuliyyət yaradan tədbirlər görülməlidir. UNESCO təşkilatında İranın məsuliyyəti məsələsi qaldırılmalıdır. Abidənin restavrasiyasında iştirak edən əcnəbi vətəndaşları XİN arzuolunmaz şəxslər siyahısına daxil etməlidir. Məlumata görə, İrandan 12 nəfər, habelə İtaliyadan olan mütəxəssis məscidin bərpasında iştirak edib”.

Məhəmmədəli QƏRİBLİ

Son xəbərlər