Məlum olduğu kimi, oktyabrın 3-də Soçidə Rusiya Prezidenti Putinlə görüşdən sonra Azərbaycan Prezidenti İlham Əliyev hərbi-texniki əməkdaşlığı davam etdirmək barədə razılığa gəldiklərini söyləyib. Prezident qeyd edib ki, Rusiya ilə Azərbaycanın 5 milyard dollarlıq müqaviləsi var, onlardan 3 milyard həcmində razılaşma artıq icra olunub: “Hərbi-texniki əməkdaşlıq fəal inkişaf edir. Bu gün biz bu istiqamətdə işi davam etdirmək barədə razılığa gəldik”.
Ölkə başçısının sözlərinə görə, Rusiyadan texnika alınması çərçivəsində ölkələr arasında artıq imzalanmış kontraktların məbləği 5 milyard dollar təşkil edir: “Bunun 3 milyard dolları artıq reallaşıb. Dediyim kimi, biz bu istiqamətdə işi davam etdirmək niyyətindəyik”.
Ümumilikdə, Rusiya ilə Azərbaycan arasında, bütün sahələrdə olduğu kimi, hərbi sahədə də əlaqələr mövcuddur və 2 ölkənin hərbi-texniki əməkdaşlığı strateji xarakter daşıyır.Ötən ayın sonunda Bakıda Azərbaycan və Rusiya arasında Hərbi-Texniki Əməkdaşlıq üzrə Hökumətlərarası Komissiyanın iclasında da iki ölkə arasında hərbi-texniki sahədə əməkdaşlığın hazırkı vəziyyəti və perspektivləri müzakirəyə çıxarılaraq, bu istiqamətdə münasibətlərin inkişaf etdiyi vurğulanıb. Tərəflər 2020-ci il üçün əsas fəaliyyət istiqamətlərini də müəyyən ediblər. Müdafiə naziri Zakir Həsənovun Rusiya Federasiyasının Azərbaycandakı səfiri Mixail Boçarnikovla görüşündə də gələcəkdə hərbi, hərbi-texniki, hərbi təhsil sahələrində əlaqələrin uğurla inkişaf edəcəyinə əminlik ifadə olunub. Görünən odur ki, Rusiya ilə hərbi-texniki əməkdaşlıq yüksələn xətlə inkişaf edir.
O da məlumdur ki, Ermənistan zaman-zaman iki ölkə arasında sözügedən sahədə əməkdaşlıqdan narahat olub və hər zaman buna mane olmağa çalışıb. Ermənistanın müqavimət göstərməsinə baxmayaraq, Rusiya ilə Azərbaycan arasında hərbi-texniki əməkdaşlıq davam edir. Prezident İlham Əliyevin hərbi-texniki əməkdaşlığı davam etdirmək barədə razılığa gəldiklərini qeyd etməsi belə bir ehtimalla çıxış etməyə əsas verir ki, bu sahədə növbəti böyük saziş imzalana bilər. Yəni Rusiya ilə Azərbaycan yeni silah-sursat sazişi imzalaya bilər.
Maraqlıdır, bəs ekspertlər belə bir perspektivi necə dəyərləndirirlər?
“Onların təklif etdiyi məhsulları bədnam qonşumuz olan Ermənistandan fərqli olaraq kreditlə almırıq”
Məsələyə münasibət bildirən hərbi ekspert Üzeyir Cəfərov bunu istisna etmədi. Onun fikrincə, yeni silah-sursat sazişi imzalana bilər: “Belə bir ehtimal var və bu istisna olunmur. Çünki Azərbaycanla Rusiya arasında hərbi və hərbi-texniki sahədə əməkdaşlıq davam etdirilir. Bunda daha çox Rusiya tərəfi maraqlıdır. Ona görə ki, Rusiya Azərbaycanı real alıcı kimi görür. Azərbaycanın maliyyə imkanları ilbəil müdafiə və təhlükəsizlik sahəsində artır. Onlar da görürlər ki, Azərbaycan real alıcıdır. Onların təklif etdiyi məhsulları bədnam qonşumuz olan Ermənistandan fərqli olaraq kreditlə almırıq. Yəni tərəflər arasında danışıqlar aparılır və ona uyğun olaraq razılıq əldə olunur. Əlbəttə ki, 2019-2020-ci illərdə Azərbaycanla Rusiya arasında hərbi və hərbi-texniki əməkdaşlıq davam etdiriləcək. Ötən ay Azərbaycan müdafiə nazirinin maddi-texniki təminat işləri üzrə müavini general-leytenant Fuad Məmmədovla Rusiya rəsmisi arasında 2019-2020-ci illər arasında görüləcək işlərlə bağlı hökumətlərarası protokol imzalanıb. Bu o deməkdir ki, hərbu sahədə birgə əməkdaşlıq davam etdiriləcək. Bütün bunlarla yanaşı, Prezident İlham Əliiyev “Valday”da çox önəmli mesajlar səsləndirdi. Sözsüz ki, bütün bunlar Ermənistanı narahat edir. Ancaq onlar Azərbaycanın Rusiya ilə hərbi-texniki sahədə əməkdaşlığına mane ola bilməyəcəklər. Azərbaycan özünə lazım olan silahları alacaq. Çünki Azərbaycan müstəqil dövlətdir və öz siyasətini yeridir. O siyasətə uyğun da lazım olan addımları atır. Ən azından, Rusiya Azərbaycanla hərbi əməkdaşlıqdan məmnundur”.
Vidadi ORDAHALLI
